Carlos Dafonte.
O grupo de dirixentes da OTAN e da UE, sempre plantean, como alternativa a quen lles disputa a hexemonía, que eles queren un planeta con normas, unha especie de paraíso, fronte a quen plantea un mundo multipolar, cando a realidade é que durante todos os anos dende a queda da URSS, xa non digamos se ampliamos máis o período, á finalización da IIª Guerra Mundial, os golpes de estado, a imposición de ditaduras, as intervencións contra os dirixentes que querían zafarse do xugo colonial e recuperar a soberanía para beneficiar ao seu pobo, foron constantes, sanguentas e produciron un atraso moi importante na cantidade de estados nos que os colonialistas europeos pousaron as súas poutas.
Como poden agora falar de normas permitindo que Israel leve adiante un xenocidio en Palestina, encuberto baixo a mentira de que Israel “ten dereito a defenderse”?, dereito que non se lle recoñece aos palestinos que levan máis de 70 anos sufrindo baixo a bota sionista, asasinatos masivos, ocupación de terras, destrución de pobos e cidades, de colleitas, divide con muros o territorio, crea asentamentos de xudeus onde non pode, e diante da conculcación de todo tipo de dereito internacional, os que plantean a necesidade de normas, das súas claro, miran para outro lado. Ata se lles permite sen condenar, que os sionistas asalten barcos con cidadanía europea, solidaria co pobo palestino, en augas internacionais nunha acción propia da piratería de hai séculos. E non falamos das ditaduras que os USA implantaron ao longo da segunda metade do século XX, sen que ningún país do “occidente democrático” fixera condena algunha.
E hai catro ou cinco días as normas foron de novo conculcadas cando Israel atacou unha vez máis a Irán, nunha “operación preventiva” contra a posibilidade de que consiga unha bomba atómica. Sabido é que o dereito internacional prohibe as guerras de carácter preventivo e os acordos de Xenebra o ataque a instalacións nucleares. Hai algunha institución que condenara estes feitos contra dereito? Ningunha, todas están en mans de funcionarios “occidentais”, os que defenden a “existencia de normas”...pero non para eles. Serán cínicos!!!
O ataque a Irán ten grande similitude co realizado contra Rusia hai poucos días.
Cando aeroportos onde estaban avións de carácter estratéxico foron atacados dende dentro do territorio ruso, un ataque contra o sistema de disuasión nuclear de Rusia, sobordando unha liña vermella que pode ter importantes consecuencias. Non é trabucado afirmar que o actor intelectual de ambos ataques teñen o mesmo autor, a OTAN, e dentro da mesma os USA, en momentos no que Trump fala de paz. No caso de Irán había negociacións en Oman con representantes dos USA e algúns dos membros da delegación iraniana, foron asasinados. Hai analistas que indican que o ataque israelí a Irán tiña, entre outros, o obxectivo de impedir que as negociacións chegaran a bo porto. Paréceme unha afirmación falsa pois a intelixencia norteamericana, creo está detrás da preparación do mesmo.
Hai que recoñecer que os servizos segredos da OTAN contan en Irán cun importante continxente da colaboradores que prepararon o ataque dende o interior do país, contra a cúpula militar, contra científicos nucleares e capaces de paralizar, cos instrumentos adecuados introducidos no país, en parte a defensa iraniana. Aos militares os asasinaron nas súas casas, en algúns casos voando o edificio enteiro, sen importar o número de mortos civís que produciu o acto terrorista.
Deste ataque Irán debe sacar dúas conclusións como mínimo, a primeira que están en guerra, aínda que os “occidentais” falen de paz e polo tanto os dirixentes deben estar a resguardo dos actos de terror dos inimigos; a segunda, que os “occidentais” non son de fiar, que levan anos e anos mentindo, traizoando a confianza de quen pacta con eles. Unha sinxela revisión da historia permite ter os argumentos que verifiquen a anterior afirmación.
A pesares do dano producido polo “ataque preventivo” israelí, a resposta iraniana está sendo moi contundente e a defensa do territorio por parte dos sionistas empeza a amosar grandes deficiencias. Polo tanto hai dúas alternativas, pois descarto a de que os USA deixen de subministrar armamento aos sionistas, ou unha escalada no conflito coa entrada dos USA no mesmo, que pode levar a unha situación de catástrofe planetaria, ou sentar na mesa aos contendentes con alguén da confianza de ambos; todo parece indicar que a Federación Rusa pode xogar perfectamente ese papel. De escollerse esta última solución, seguro que na guerra de Ucraína a Rusia lle van facer concesións importantes.
Estes días en Alberta, Canadá, xúntase o G-7; Xapón foi moi crítico co ataque israelí, pero Alemaña como autor do holocausto, Francia como colaborador co mesmo e Reino Unido como a potencia colonial do territorio de Palestino que lle regalaron aos sionistas para constituír o seu Estado, manteñen firme o seu apoio ao agresor.
En Galicia no mes de xuño de 2025.
