Carlos Dafonte.
Tamén en Europa, como non podía ser doutro xeito, vivimos os resultados desta onda reaccionaria; hai causas exóxenas e endóxenas, considerando como endóxenas tamén as actitudes da Unión Europea que non fixo nada para illar os avances da dereita máis extrema, antidemocrática e autoritaria á que todo se lle permitiu con tal de apoiar a rusofobia existente, pulada polos USA, ata que a fascista Giorgia Meloni goberne en Italia sen que a UE tomara medidas para impedilo e unha vez elixida para illala; así o pobo italiano, que é soberano para elixir a quen queira, coñecería que elixir a figuras defensoras de ideoloxías fascistas, totalitarias, non sae gratis, ten os seus custos.
Aquí, os avances dos neofranquistas de Vox, non só se acepta con normalidade, senón que arrastra cara as súas políticas a un partido como o PP que lle permite co-gobernar en Comunidades Autónomas, sen que a dirección dos populares europeos digan absolutamente nada.
Tampouco debemos desbotar as causas esóxenas, como o trunfo de Trump e o emprego da forza contra aliados e inimigos, para impor ese dito tan claro dende sempre que orienta a política dos USA, “non temos aliados, só intereses” e que lles leva a apoiar dentro de cada país ás forzas máis reaccionarias que apoien cada paso que a administración trumpista da, tanto a nivel internacional, xenocidio en Gaza, guerra ilegal contra Irán, situar á fronte do goberno de Siria ao islamismo máis radical causante de miles de asasinatos, ata a quen hai pouco tempo consideraban imprescindible derrotar; que aconteceu na democrática UE, “defensora dos dereitos humanos” para este cambio de criterio?
E non esquezo as manipulacións electorais que os USA seguen a practicar no que consideran o seu “patio traseiro” para derrotar a gobernos que queren modificar estruturas e avanzar en darlles mellores condición de vida a toda a cidadanía, e cando poñen aranceis a determinados produtos, observamos como a nivel interno estas forzas, que alardean de patriotas, non fan nin a menor crítica.
Tamén no interior son responsables quen podendo desarticular os grupos neonazis, se lles permite constantemente infrinxir a lei, tanto da Memoria Democrática, Constitución, etc como a ocupación de vías públicas dun xeito ilegal, sen que o Ministerio do Interior reprimise esas manifestacións, o que permitiu que estes grupos considerasen que tiñan conquistado espazos de liberdade para as súas ideas, o que redunda en avances organizativos e envelenar a nivel ideolóxico a sectores da mocidade que sen futuro, ven na crítica dende posicións autoritarias, fascistas, unha saída para a súa realidade sen que coñezan verdadeiramente o que o fascismo pode representar nun futuro e o que representou no pasado.
Hai un feito, a “rusofobia” oculta todo, que non merece información nin discusión algunha nos medios de comunicación nin nos parlamentos europeos; en Ucraína os neonazis atópanse no poder dende o golpe de “estado do Maidán”, poder que acrecentaron apoiando a Zalenski nas súas políticas de limpeza étnica, enfrontamentos coa Federación Rusa e intento de entrar na OTAN e nuclearizar o país. Pois ben dende o principio da “operación especial” iniciada por Rusia milleiros e milleiros de neonazis europeos e doutras partes do planeta, tamén debemos pensar que de España, estiveron en Ucraína e recibiron instrución de manexo de explosivos e outros coñecementos que é posible que despois utilicen nos seus países para crear atentados e confusión, e co apoio mediático necesario, sexan utilizados contra sectores que nada tiveron que ver co mesmo. É dicir cometer actos de “falsa bandeira”. Non esquezamos o que aconteceu despois da creación por parte de dos USA da Al Qaeda e toda unha serie de atentados realizados en Europa e aquí, por moitos dos que estiveran loitando en Afganistán contra a intervención soviética. Tampouco debemos esquecer que toda a serie de asaltos a comercios en Barcelona e Bilbao, os beneficiados polo feito, PP e Vox atribuírono “ á esquerda”. Hoxe coñecemos que non foi a esquerda quen realizou estes actos.
Nestas circunstancias de avance do pensamento da ultradereita e fascista, aparecen tres feitos salientables na política interior, o desbordamento da fronteira en Ceuta e a entrada de miles de persoas na cidade procedentes de Marrocos, que seguro, pois hai declaracións ao respecto, contou co apoio de Israel, os USA e está claro do propio Marrocos, feito que beneficiou en grande medida ao PP e VOX, pois lles daba “munición”, por haber abandonado, o PP hai tempo ser “partido de estado”, contra o goberno ao que acusaron de todo o acontecido, cando partidos que foran verdadeiros nacionalistas, “defensores de España” nunhas circunstancias como as vividas, debían facer piña co Goberno ata solucionar a situación e despois xa viría o tempo da crítica.
Que razón teñen os USA e Israel para tratar así ao Goberno? O primeiro, non apoiar a guerra ilegal contra Irán e non permitir a utilización das bases dos USA no territorio. O segundo, polo recoñecemento ao Goberno palestino e cualificar a actividade dos sionistas en Gaza como un xenocidio. Ámbolos dous queren facerlle pagar ao Goberno polas súas actitudes.
Tampouco debemos esquecer que Marrocos é o máis fiel aliado dos USA e de Israel co que asinou o plano que leva o nome do profeta Abrahám, e por outra banda, sacar do seu territorio a miles de mozos, que sen traballo e perspectiva algunha dunha vida digna, podían ser un foco importante de problemas no futuro.
A morte dunha persoa maior despois de ser desafiunzada do piso onde vivía dende hai ducias de anos, provocou unha contundente mobilización en todo o territorio do estado e numerosas acampadas en prazas de cidades e vilas, que coinciden coa mobilizacións do ensino, sanidade e estudantes en certos territorios, que obrigou á convocatoria por parte dos sindicatos a unha folga xeral para o día 11 de novembro.
E en terceiro lugar a disolución das Cortes e convocatoria de eleccións para o día 29 do mes de novembro.
