Carlos Dafonte
Cando analicei neste
blog, no artigo do 23 de outubro do presente ano, os resultados das
eleccións autonómicas en Galicia, establecín polo menos catro
responsabilidades que AGE adquiriu ó presentarse ó proceso e sobre
todo despois dos bos resultados acadados, non só diante dos seus
electores, senón diante dunha parte importante da sociedade galega
que non a votou, pero que celebrou a aparición dun discurso e un
programa próximo a unha alternativa; tamén a nivel de estado creou
expectativas importantes que non pode defraudar.
Pasados os momentos de
alegría polos resultados, de celebración, creo que deben
reflexionar Esquerda Unida e ANOVA , e dicir AGE, e non por separado,
sobre estes catro aspectos e comezar a dar respostas claras á
sociedade que agarda. De non facelo así, nun tempo prudencial, estes
sectores sociais deberán considerar que a proposta lanzada á
sociedade por AGE e un fraude máis, como outros tantos que se
realizan nas campañas electorais co sinxelo, pero deturpador
obxectivo de acadar votos; unha chacota máis que se lle fai a unha
parte da sociedade galega.
Entendía que AGE
adquiría o compromiso, responsabilidade dicía eu, sobre catro
aspectos que me parecen fundamentais; outros desde o meu punto de
vista non o son tanto.
“En primeiro lugar,
dicía na devandita análise, concreta-la alternativa
anticapitalista, que se ofertou na campaña dun xeito moi vago,
quizais por falla de tempo, para que poda ser discutida e asumida por
amplas capas da sociedade galega, que a liguen ás correntes estatais
e internacionais de loita contra a crise e o capitalismo.
Un segundo aspecto é a
responsabilidade que vai asumir de ser a única forza de oposición
no Parlamento e na rúa, pola ausencia dos que debían compartir esa
responsabilidade.(...)
Un terceiro aspecto no
que AGE ten responsabilidade a partires deste momento, e o que
podemos chamar xenericamente de avanzar na “reconstrución da
esquerda galega”, a creación dun amplo movemento político
cultural, froito da confluencia das esquerdas anticapitalistas, a
internacionalista e a nacionalista.
En cuarto a
responsabilidade de non deixarse engulir pola institución, hai que
prima-lo traballo na sociedade.(...)”
Temos que asumir que a
desaparición de todo un bloque de países que se autodenominaban
socialistas, incluso comunistas, denominación que as forzas
reaccionarias facían súa, foi decisivo para establecer unha nova
correlación na loita de clases a nivel mundial e significou unha
derrota para a esquerda no seu conxunto; non porque o que desaparecía
fora unha sociedade a imitar, senón polo que significaba, tanto como
una experiencia real dunha sociedade onde o capitalismo e a burguesía
fora derrotada, como por representar un contrapeso ós intereses de
recolonización imperialista e freo a unha globalización ó servizo
das multinacionais e os poderes oligárquicos.
O capitalismo converteuse
así, no modo de produción hexemónico, cando comezábase de novo a
sentir na economía a tendencia a decrecer da taxa de ganancia, non
ben se saíra da crise anterior iniciada a finais dos anos 60. Polo
tanto as receitas para a saída da crise, están a ser as que a unha
capa da clase dominante mellor lle permiten derrota-los traballadores
e pula-lo proceso de concentración do capital.
Nos países tamén
chamados de “socialismo real”, a URSS incluída, avanzouse cara o
sistema capitalista, desde o modelo de produción alí establecido,
nun proceso dirixido polas elites que monopolizaran o poder desde a
finalización da II ª guerra Mundial e diante da indiferenza das
clases populares que viron como o que lles pertencía, o sector
público, se despedazaba, vendíase o mellor ofertante, roubábase, e
dun día para outro as vellas elites convertéronse nos dirixentes do
novo réxime; como dixo alguén, pasaron dos despachos das
institucións ós despachos das empresas. Este cataclismo foi moi ben
aproveitado pola clase dominante europea a nivel ideolóxico,
político e social para inducir e apoiar, poñendo os seus medios de
comunicación o seu servizo, a dous procesos: en primeiro lugar a
desaparición dos grandes partidos comunistas como alternativa ó
sistema capitalista; en algúns casos a súa disolución e a
creación, en todos os casos, agás poucas excepcións, de movementos
políticos que asumen nos seus programas as propostas da antiga
socialdemocracia e en segundo, o abandono por parte da
socialdemocracia da súas posicións e a aceptación, dándolle un
certo verniz progresista, ás propostas do neoliberalismo, único
xeito, entenden, de que os poderes económicos lle permitan accede-lo
poder político; pero tamén a socialdemocracia xogará un importante
papel que non me canso de repetir, cooptar para a política
conservadora, neoliberal, sobre todo nos aspectos económicos, a
capas das clases populares e sectores obreiros, que son enganados por
estes partidos que se presentan como de esquerdas, que os medios de
información do sistema tamén os cualifican así, interésalles un
sistema político baseado no bipartidismo, pero que fan políticas de
dereita e polo tanto se teñen convertido en partidos de dereita,
progresistas algunhas veces, pero de dereita. Como di James Petras,
referíndose a cando acceden ós gobernos, “ entran pola esquerda e
saen pola dereita”.
No estado español, os
devanditos dous procesos, produciron un “bipartidismo imperfecto”,
pola existencia de burguesías nacionalistas organizadas, onde PP e
PSOE constitúen unha relación dialéctica; son politicamente
antagónicos, pero en termos sociais son a mesma cousa; ámbolos dous
son a expresión política de dous sectores da mesma clase, a
burguesía. “Tacticamente son antagónicos e estratexicamente
aliados”, lín non me lembro onde, hai algún tempo.
A crise sistémica do
capitalismo actual, agudizou as contradicións sociais e
intercapitalistas e como a crise na estrutura económica se converte
en crise da superestrutura político-ideolóxica, institucións,
partidos políticos, aparellos do estado, etc tamén entran en crise
e converteuse nunha necesidade a reconstrución da esquerda, para
facer fronte a agresión contra @s asalariad@s da capa hexemónica da
burguesía, a oligarquía.
Beiras precisou ben ese
obxectivo cando, eu entendino así, consideraba que a contradición
principal neste momento de forte crise e de ataque ós dereitos d@s
asalariad@s, non era, simplificando, Galicia-estado centralista, que
se concreta na loita polo dereito de autodeterminación, senón a
contradición propia da loita de clases, explotados-explotadores, que
é a que leva, no seu momento, a aparición dos partidos e
organizacións que asumen a teoría revolucionaria que é o marxismo,
o que lle levou a pactar con EU. E así o entenderon, penso, a
maioría dos votantes de AGE e outros moitos que non votaron; que se
estaba a poñer en marcha un instrumento ó servizo dos traballadores
e das capas populares galegas, que ía máis aló do marco
institucional; abríndose unha espectativa superior á estritamente
electoral de conseguir un grupo maior ou menor de deputados no
parlamento, pois desta crise os traballadores van aprendendo que o
estado burgués, e o Parlamento de Galicia forma parte do mesmo, está
o servizo da clase dominante e pouco se pode esperar do mesmo para
solucionar os problemas. Do que verdadeiramente se trataba era da
creación e consolidación, tendo como inicio a vía electoral, dunha
nova estrutura política que cinguira á esquerda internacionalista e
a nacionalista creando un instrumento ó servizo d@s
explotad@s.
A crear esta espectativa,
axudaron as declaracións dos líderes das formacións que ían
configurar AGE, falando de crea-la “Siryza galega” e traendo a
participar en plena campaña á formación grega e a outras que
responden as acenos de identidade de forzas políticas que nacen e se
desenvolven, nos seus países, ó marxe dos partidos da esquerda
tradicional.
Aínda que non estivera
no seu maxín, crear unha estrutura política, movemento
anticapitalista, enfrontada ó sistema, hoxe en Galicia é unha
demanda á que teñen que dar unha resposta positiva. Porque a
pesares da dureza da crise, de todos os recortes que PSOE e sobre
todo o PP foron aprobando, que afectan á “capacidade de manobra”
da clase, situacións como a actual, son tamén unha oportunidade
para os cambios sociais, para formular un proxecto alternativo de
esquerdas Lembremos a celebre sentencia de Mao Zedong, “Todo baixo
o sol é un caos absoluto, a situación é excelente”.
Non chega con que apareza
AGE no Parlamento, ten que aparecer na sociedade cun discurso, un
programa e un proxecto propio, unificado. Será capaz AGE de
construír poder popular e hexemonía ou só vai ser unha oposición
moi combativa, pero pechada nas paredes da rúa do Hórreo, cuxos
deputados de cando en vez xúntanse cos movementos sociais?
E para acadar ese
obxectivo hai que elaborar un programa; na campaña, moitas das
propostas parecían pouco definidas, no programa hai que establecer
obxectivos entendibles pola maioría da xente, que serva para agrupar
e debater non só sobre o que hai que facer hoxe no parlamento e na
sociedade, pero tamén como referencia de como debe se-la futura
sociedade unha vez superada a etapa capitalista. A.G.E presentouse
como unha forza anticapitalista, adquiriu o compromiso de clarexar o
seu significado. Ser anticapitalista non é “lavarlle a face” ó
que temos hoxe, caer na postura fácil de defende-lo estado de
benestar como obxectivo estratéxico, hai que ir máis aló; partindo
dunha critica estrutural do capitalismo, hai que facer propostas que
permitan avanzar cara outro modelo de sociedade que non estea baseada
na explotación da forza de traballo e acadar beneficios a calquera
prezo; pero tamén hai que critica-las formas políticas nas que o
capitalismo se sustenta, a iso que “chaman democracia pero non o
é”. Hai que configurar, en suma, unha ideoloxía alternativa á
que hoxe é hexemónica na sociedade galega, para enfronta-lo
sistema, o que tamén significa establecer aliados, tanto tácticos,
aqueles cos que vas dar os primeiros pasos, como os estratéxicos,
cos que podes chegar ó final do percorrido.
En Galicia no mes de
decembro de 2010
Ola, Carlos.
ResponderEliminarEstou globalmente de acordo co artigo. O que conviña cambiar é o gráfico dos resultados, porque induce a engano. O PP, PSOE e BNG tiveron unha enorme perda de votos respecto de 2009. Ademáis, por arte da lei electoral, o PP co 45% do voto válido (unha barbaridade que indica a súa hexemonía) atribúese o 54% dos deputados. Entre as moitas batallas que compre dar é a de restarlle lexitimadade ó PP para entrar a saco contras dereitos básicos da xente.
Un saúdo
Román