Roberto Laxe
“Mover
ficha”, o programa que deu orixe á candidatura de Podemos, abriu
varios debates na esquerda, desde o organizativo/lideranza, pola
forma na que apresentou-se na sociedade, ao redor dunha figura
mediática, até o programático/político pola maior ou menor
ambigüidade nas súas alternativas, ou o teórico/de proxecto social
coa proposta “por un novo modelo produtivo”, baseado nunha
reconvención ecolóxica, a nacionalización e socialización das
empresas enerxéticas e a soberanía alimentaria.
Todo o que
se diga sobre o organizativo, o político ou o programático non só
é importante, é decisivo posto que aí é onde morren as palabras.
Que política, que programa e que organización se desenvolve para
conseguir o que nos une a todos, a transformación da sociedade, é o
que dá forma á loita por un proxecto social; e non nos confundamos,
a forma política e organizativa é determinante para alcanzalo,
porque é a maneira de expresar eses obxectivos sociais nun momento
histórico concreto.
Non entanto, a estas alturas da crise é preciso entender que un proxecto político, ou ten un proxecto social detrás ou non é máis que un novo lume de artificio para incautos. Por iso, a tarefa non é só responder ás reivindicacións particulares dos movementos sociais, senón darlles unha coherencia cun fin (non teleolóxico, senón práctico) que apuntamento á superación deste sistema que vai de crise en crise... Para iso hai que entrar a fondo no debate de que proxecto social defende cada un, para logo poder chegar a acordos que superen as meras conxunturas electorais.
"Novo"
ou vello modelo produtivo reconvertido
O programa
Mover Ficha dinos que a candidatura defende “un cambio de modelo
produtivo que este ao servizo das persoas a través dunha
reconversión ecolóxica da economía, pola nacionalización e
socialización das empresas enerxéticas e pola soberanía
alimentaria”. Noutro punto do programa, o primeiro, e separado
deste, fálase da nacionalización da banca privada.
Ninguén
cuestionaría a necesidade da reconversión ecolóxica, a
nacionalización da enerxía ou da mesma banca... Pero estas medidas
supoñen un “cambio de modelo produtivo”?, ou son medidas
internas ao vello modelo produtivo. A soberanía alimentaria merece
un punto específico xa que a proposta de reparto da terra e
fortalecemento de mercados de proximidade, apuntan nun sentido
totalmente oposto á socialización dos medios de produción.
Esta claro
que para avanzar debemos saber de que falamos, por iso para
entender-nos xorde unha pregunta de lóxica formal: cal é o modelo
produtivo actual, cales son as súas características? Polo que se
deduce da proposta de Mover Ficha, en ningún momento defínenolo en
base ao seu contido, o modelo produtivo ten como elemento central o
seu carácter “produtivista”, antiecolóxico, polo que hai que o
mudar por un novo a través da reconversión ecolóxica.
Ben, esta
claro para todos, mesmo sectores da burguesía mundial, que esta
reconversión da produción é precisa para ter un futuro, pero isto
non nos resolve que sistema/modelo produtivo temos, cales son as súas
relacións sociais, por iso é polo que sigamos sen saber sobre que
estruturas e relacións, e con que sentido temos que facer esa
reconversión. Polo que pode ser deducido do programa, os seus eixos
centrais serían na industria da enerxía e a propiedade da terra.
Só? Insisto, parece moi curta e parcial a proposta, xa que a crise
do sistema alcanza a outros moitos sectores: que pasa coas mulleres e
os mozos en paro, non son parte dese modelo produtivo; que sucede cos
asalariados/as que constitúen o 70% da poboación activa a nivel
mundial nas zonas urbanas, e o 50% nas rurais. A estes non lles
atinxe o vello modelo produtivo, e por tanto non teñen nada que
dicir no “novo”?
A
afirmación de Marx na Miseria da Filosofía, “as relacións de
produción de toda sociedade forman un todo”, foi substituída por
considerar as relacións económicas como outras tantas fases
sociais, que se xeran mutuamente. A lóxica invístese, en lugar de
ir do todo ás partes, para poder as entender, faise o camiño á
inversa; as partes explícanse non pola súa interrelación coa
totalidade, senón pola súa sucesión, a súa suma unha tras outra.
Desta maneira, o todo, ou sexa, o sistema capitalista, desaparece e
só quedan as súas manifestacións, o saqueo da terra, a pobreza, a
exclusión social, ao redor das que se organizan movementos chamados
sociais e a alternativa non é un proxecto global ao capitalismo,
senón a súa suma aritmética: xero + ecoloxismo + loita obreira +
(aquí ponse o movemento social que se queira), dá un “novo modelo
produtivo”.
Esta é a
lóxica do manifesto, e por iso non teñen ningún problema en situar
o punto central do modelo produtivo capitalista, a banca, fóra da
esixencia de “cambio de modelo”. Para eles a banca, como relación
económica é unha parte máis, e fóra do modelo produtivo, que non
o define; senón que só o parasita, e do que hai que liberalo para
que poida avanzar a “economía produtiva”.
Pois ben, o
capitalismo como modo de produción non é unha suma aritmética de
opresións e saqueos, esa é a versión neoreformista do sistema,
senón que é un todo que o impregna, definido por unha relación
social dominante, a do capital e o traballo, expresada nunha formula:
C=c+v. O Capital é igual á maquinaria morta máis o traballo vivo,
que dá como resultado a explotación do traballo asalariado.
Esta é a
esencia das relacións sociais de produción baixo o capitalismo,
aplicable ao século XIX, ao XX e ao actual. Segundo a OIT, o 70% da
poboación activa a nivel mundial nas zonas urbanas e o 50 no rural,
é asalariada, é dicir, é clase obreira na súa definición máis
ampla posto que vive da venda da súa forza de traballo, non do
produto do seu traballo, que é o que define a un pequeno produtor,
urbano ou rural.
Da mesma
maneira que non debemos confundir nunca o que é unha relación
social, o traballo asalariado como venda da mercadoría forza de
traballo, con outra relación social distinta, a venda do produto do
traballo humano; non confundamos os cambios xurídicos con cambios na
relación social. Por exemplo, un/a precario ou precaria, como o
destaxista, como o traballo a domicilio, se o que o empregador paga é
tempo de traballo que se dedica á fabricación do produto, son
formas de traballo asalariado; se non se paga o tempo de traballo,
senón o produto en se posto no mercado, non é traballo asalariado.
Dito doutra forma, se a diferenza está no que o ser humano leva ao
mercado, se é o seu corpo que incorpora a forza de traballo ou o
produto xa elaborado. Son mercados distintos onde se manifestan
relacións sociais diferentes.
Calquera
“novo modelo produtivo” que non toque esta relación, a destrúa,
non ira ao todo, ao meollo do sistema. Unha reconversión ecolóxica
que non toque esta relación só instaurase un capitalismo verde,
mantendo a explotación do ser humano, calquera nacionalización de
calquera industria, sexa a enerxía, o téxtil, a construción, ou as
químicas, que manteña esta relación asalariada, é dicir, de
explotación do ser humano, só instaurará un sistema de capitalismo
de rostro humano. É este o “cambio de modelo produtivo” que
propoñen á sociedade?
O
imperialismo capitalista, actual modelo produtivo
O
capitalismo desde as súas orixes non ficou estático, senón que a
partir do proceso de acumulación de capital, derivado desa relación
social básica e definitoria de traballo asalariado, desenvólvese a
concentración e centralización do capital en grandes truts,
multinacionais, ou como se lles queira chamar. A partir dun momento,
dado o tamaño da industria que esixen os procesos produtivos, os
investimentos de capital rendibles só pódense realizar baixo a
alianza do capital bancario (ou o máis recente, os Fondos de
investimento), o industrial e comercial. Desta maneira os bancos
fanse accionistas da industria e os grandes industriais ou
comerciantes fixéronse accionistas dos grandes bancos (agora tamén
dos fondos de investimento, Sicav, ou demais empresas de
investimento), creando un novo tipo de capital, o capital financeiro
utilizando o termo de Lenin; que non é a antiga banca comercial,
senón a integración en grandes consorcios financeiros, industriais
e comerciais.
Se no
século XIX a banca prestaba ao industrial ou ao comerciante, e
extraía os seus beneficios a través das taxas de xuro, unha das
maneiras nas que se expresaba a plusvalía obtida na produción de
mercadorías; a partir da aparición do capital financeiro, a banca
suma a esta maneira de ser parte da explotación da clase obreira,
outra directa, ao ser accionistas directos da industria, reverte a
plusvalía coa repartición de dividendos dos socios.
Marx
definiu o movemento do capital a través da fórmula, D-M-D', en
contraposición ao capitalismo mercantil previo de M-D-M'. Nunha fase
superior, o capital financeiro ten a tendencia interna ao “diñeiro
chama diñeiro” (D-D'), á especulación. Pero non pode prescindir
de M (mercadoría), porque é capitalista; é dicir ese diñeiro non
xorde da nada -cando o fan, especulan e fabrican diñeiro sen
respaldo na produción só conseguen desvalorización do seu valor e
inflación- senón dunha relación económica básica, a compravenda
de mercadorías. É na transformación e distribución de valores de
uso que estes se transforman en mercadorías, valores de cambio que
incorporan o traballo socialmente necesario para a súa
transformación e distribución; cando esta mercadoría vai ao
mercado ese tempo excedente, que é meramente contable, tradúcese en
diñeiro (D), a través dos prezos de mercado, que son o tradutor.
Aos
capitalistas individuais gustaríalles reducir ao máximo ese tempo
de traballo par rendibilizar os seus investimentos, sen dúbida, e
para iso esta revolucionando constantemente as forzas produtivas. Ao
facelo, o único que conseguen é baixar o valor en tempo de traballo
das mercadorías que, durante un tempo e a través de mecanismos
artificiais, “forzas contrarrestantes” en palabras de Marx
(ampliación do comercio, crédito, especulación, aumento da
explotación da clase traballadora,...) poderán evitar que esa caída
do valor maniféstese nos beneficios empresariais. Pero tarde ou
cedo, esta caída trasládase ás contas de resultados de empresas e
bancos... e estala a crise. É o que Marx chamou Tendencia Decrecente
da Taxa de Ganancia.
Esta
tendencia “tomou o poder” na economía do capitalismo
imperialista, manifestándose nunha sobreprodución constante de
mercadorías, na maioría dos casos inútiles. Fronte aos moralistas
que sosteñen que é a cobiza do ser humano, a súa natureza, a que
lle conduce a comprar compulsivamente, a realidade é que é unha lei
económica interna ao modelo produtivo capitalista a que provoca a
necesidade de producir, a competencia intercapitalista, sen pensar en
que tarde ou cedo, o mercado non poderá absorbela. É a
irracionalidade do mercado a que introduce o “produtivismo” na
sociedade, non ao revés.
Por isto,
non mencionar as leis do mercado como orixe do problema e deixar á
banca/capital financeiro fora do “cambio de modelo produtivo”,
lévanos a unha concepción sectorializada, parcial, do sistema
capitalista. As multinacionais, o capital financeiro, do que a banca
é un dos seus alicerces, é a esencia actual do sistema, polo que
non pór no centro do “mudanza de modelo produtivo” a súa
expropiación baixo control obreiro é baixar moitos chanzos no que
significa ese “cambio”, deixándoo nunha proposta ultrareformista
que cabe perfectamente dentro dun capitalismo “verde e con rostro
humano”.
O
mercado garantía da soberanía alimentaria
Dentro
desta “mudanza no modelo produtivo” faise fincapé na necesidade
de avanzar na soberanía alimentaria dos pobos, baseada nunha
repartición da terra e os mercados de proximidade, para garantir
“(,..) o DEREITO dos pobos, dos seus Países ou Unións de Estados
a definir a súa política agraria e alimentaria, sen dumping fronte
a países terceiros” (declaración de Vía Campesiña). Este
dereito nos estados imperialistas esta relativamente protexida polas
normativas, como a da Política Agraria Común na UE. A soberanía
política dos estados imperialista garante uns mínimos ingresos ao
campesiñado, a través das subvencións aos prezos agrícolas, etc.
Pola
contra, nos estados semicoloniais, esta soberanía non existe. Son os
organismos internacionais do imperialismo, desde o FMI até a OMC,
desde a ONU até o BM, os que coas súas políticas neoliberais,
liberalizadoras, impoñen as normas pola que se rexe o saqueo da
terra e o mar a nivel mundial.
A reforma
agraria, en todas as súas variantes puras ou desvirtuadas, cumpre un
papel histórico: levar o capitalismo ao campo onde actúan as leis
deste sistema de concentración e centralización de capital, nun
proceso avanzado xa no primeiro estado capitalista, Gran Bretaña,
cando expulso aos arrendadores da terra en Escocia e Irlanda, para
substituílos por gandaría.
Así, da
mesma maneira que o capital na súa orixe disolveu aos gremios para
liberar man de obra barata e “libre” para ser explotada polos
capitalistas, xerou no campo unha ampla pequena burguesía que foi
desaparecendo coas fusións e a aparición do gran capital; a
repartición da terra que supón a reforma agraria só é a
precondición para a aparición de grandes capitalistas na produción
agraria.
A
definición da Soberanía Alimentaria como o dereito dos pobos a
defender a súa política agraria e alimentaria é contraditoria coa
existencia do mercado. As leis do mercado “A man escura do
mercado”, en definición do Adam Smith- son inexorabeis e
automáticas, e non admiten control: só garanten que os capitais
mellor investidos van ter unha rendibilidade superior, e, tarde ou
cedo expulsan da produción aos capitais peor investidos, a través
da renda diferencial da terra. A concentración e centralización do
capital producirase e os gobernos lexislarán para que este proceso
sexa máis ou menos traumático.
A única
garantía dunha verdadeira Soberanía Alimentaria para os pobos é
acabar coas leis de mercado capitalistas, as mesmas que provocaron a
desaparición do artesanado, que nos países imperialistas
concentraron a produción até extremos de monopolio en moitas
ocasións, que saquean a terra e o mar na procura constante de
investimentos rendibles. Son, en fin, as leis do capitalismo que non
garanten a soberanía de nada, posto que se basean na loita a matar
polo control da produción e do excedente xerado por ela.
Fronte a
este caos, a concepción de Soberanía defendida actualmente é unha
volta atrás: é unha ilusión en que “calquera tempo pasado foi
mellor”. As propostas de control de prezos, de proteccionismo, de
defensa de dereito a consumir e a producir o que se queira, sen
cuestionar a esencia anárquica e depredadora do mercado converte en
papel mollado, nun saúdo á bandeira para incautos, toda proposta de
Soberanía que non atenten contra as bases mesmas do sistema
capitalista, contra o mercado e a propiedade privada dos medios de
produción.
A única
garantía do dereito dos pobos a unha alimentación sa é a de acabar
con estas bases, e a proposta campesiña de máis propiedade e máis
mercados só conducen en dirección contraria. A terra é un ben
social que o capitalismo converte en propiedade privada, por iso,
”(...) deixando de lado os pretendidos «dereitos» de propiedade,
eu afirmo que o desenvolvemento económico da sociedade, o crecemento
e a concentración da poboación, que veñen ser as condicións que
impulsan ao granxeiro capitalista a aplicar na agricultura o traballo
colectivo e organizado, a recorrer ás máquinas e outros inventos,
farán cada día máis que a nacionalización da terra sexa «unha
necesidade social», contra a que resultarán sen efecto todos os
razoamentos acerca dos dereitos de propiedade. As necesidades
imperioso da sociedade deben ser e serán satisfeitas, os cambios
impostos pola necesidade social abriranse camiño eles mesmos, e, a
longo prazo ou á curta, adaptarán a lexislación aos seus
intereses” (Marx, A Nacionalización da terra)
Socialismo
e/ou decrecemento
Fronte á
proposta de "mudanza de modelo produtivo" sen modificar as
estruturas de explotación e opresión, levantáronse criticas
situando no centro a necesidade urxente de saírse, xa, do sistema
capitalista, construíndo un novo sobre a base da autoxestión e o
decrecemento.
Desde un
punto de vista obxectivo, a discusión do decrecemento é fácil de
resolver posto que é máis terminolóxica que de contido; de feito
se a sacamos do mundo das ideas e levámola á práctica veremos os
seus límites como proxecto social alternativo: de que decrecemento
falamos, en que lugar do mundo aplicámolo, en que período
histórico.
Que
significa o decrecemento na África Subsahariana ou Haití, por pór
dúas zonas xeográficas dunha pobreza extrema... até onde poden
“decrecer”. Que sectores deben decrecer, a sanidade publica, a
educación publica, o transporte colectivo.
Decrecer en
todo período histórico? Na Rusia revolucionaria cando, tras unha
guerra mundial e unha brutal guerra civil, o PIB de 1921 era o de
1913; decreceran a golpes, ou en Corea do Norte cando como describe o
Che no “informe da visita a países socialistas”, os pilotos
norteamericanos, tras destruír TODAS as súas industrias,
dedicábanse a ametrallar o gando (o propio Che se autocrítica de
que magnificaran os seus sufrimentos porque lles tiñan tirado 40
bombas, cando en Corea sobre unha fábrica tiraron 40 mil). Ou en
Vietnam, con tres millóns de mortos e un terzo da súa nación
deforestada polo axente laranxa.
Pódeselles
criticar de “produtivismo”?
Seguindo ao
mesmo Che, no seu citado “informe”, manifesta a impresión que
leva cando estes países ofrecen a súa axuda a Cuba, “con
condicións”, a da loita antiimperialista; e comprende que Cuba é
unha privilexiada que non tivo que enfrontar unha guerra devastadora,
20 mil mortos mentres en Corea e China cóntanse por millóns;
debendo superar fames, mentres os grandes problemas cotiáns da
poboación cubana eran os desodorizantes (palabras literais).
Pódeselles acusar de produtivismo?
O seu
burocratismo minou as bases non capitalistas dos estados xurdidos das
revolucións, a súa incapacidade para impulsar e ser parte da
revolución mundial, de non enfrontar ao imperialismo coa política
da independencia de clase levoulles a pactar con sectores burgueses;
pero é de moralistas falar de “produtivismo” cando o problema é
de fame física. O Che levou esa sorpresa, porque Cuba era dalgunha
maneira unha provincia directa do imperialismo, e beneficiábase
parcialmente desa posición; mentres, Corea, China, Vietnam,... foron
nacións pobres que tiveron a ousadía de enfrontar e derrotar ao
imperialismo.
É dicir,
non se lles pode criticar o acabar co capitalismo e sentar as bases
dun estado obreiro, senón o que con ese estado só foron capaces de
desenvolver un aparello burocrático que pouco ou nada tenia que ver
co socialismo; por iso é falaz crear unha antinómia entre
socialismo e decrecemento. O seu “produtivismo” non tiña nada
que ver co carácter non capitalista e de transición desas
sociedades, senón co desenvolvemento dunha caste burocrática que se
ergue sobre ese estado, e extrae del os seus privilexios. Para iso
substitúe a planificación democrática da economía pola
planificación burocrática.
Que é o
socialismo
Sexamos
categóricos e acabemos con falsas discusións, o socialismo presupón
non só o decrecemento e a autoxestión, iso é parcial, senón a
expropiación de todos os sectores da economía e a desaparición dos
superfluos, comezando polos que Marx chamou "forzas
destrutivas", mercadorías cuxo uso non aumentan a riqueza
social, senón a súa destrución: o armamento.
Marx
definiu a mercadoría como todo produto do traballo humano para
resolver unha necesidade social, creada ou non, a través da venda no
mercado. Fronte ao capitalismo na súa decadencia, cunha tendencia
inexorable, e irracional, á sobreprodución para contrarrestar os
efectos da caida da taxa de ganancia, fai necesario ter unha política
económica racional, que faga desaparecer a produción de bens
superfluos para a sociedade. Isto non quere dicir pobreza, senón
racionalidade pura e simple: autoorganizarse para producir o que a
sociedade democraticamente decida que necesita. O que os marxistas
expomos é que esa autoorganización social -autoxestión-, mentres
teña que se defender e non atinxa un nivel de desenvolvemento
suficiente para resolver as necesidades sociais (non quere dicir
prosaica produción de mercadorías) significa organizar un estado,
pero ao servizo da construción dunha sociedade socialista; e como
todo estado, opresor respecto dos seus inimigos de clase, os
capitalistas.
Os
marxistas non “imaxinan”a sociedade futura, é imposible “ve-la”
salvo na ciencia ficción, senón na construción desa sociedade a
partir das ferramentas que a realidade dá; e unha fundamental que
temos é a experiencia histórica do que NON é socialismo, aínda
que se expropiou á burguesía. Por iso, volvamos ás definicións
que permitan nos entender. Primeiro para non facer falsas discusións,
como se dixo máis arriba, o que había nos estados obreiros,
chamados “do socialismo real”, non eran estados socialistas,
porque iso é por definición, unha verdadeira antinómia: socialismo
(ou comunismo, que nos é máis que outra fase social) e estado non
caben na mesma frase. O que existiu foron sociedades onde o
capitalismo foran expropiado tras unha revolución, pero estas
dexeneraran pola suplantación do poder obreiro e popular por unha
caste burocrática non propietaria dos medios de produción.
Eran
sociedades de transición onde os mecanismos fundamentais de
explotación da clase obreira, a propiedade privada dos medios de
produción e o traballo asalariado para o mercado, desaparecesen. Os
traballadores/as destes estados no fundamental non se rexían polas
leis do mercado, tanto na determinación dos prezos das mercadorías
como na determinación do valor da forza de traballo, senón por
decisións conscientes adoptadas nos organismos de Planificación
económica e protexidas dos vaivéns do mercado mundial polo
monopolio do comercio exterior. Isto, sen dúbida, evitou que as
riquezas naturais e humanas deses estados fosen saqueados pola
irracionalidade do mercado mundial coma se sucedeu no resto do mundo:
seica é casualidade que hoxe Rusia teña as reservas naturais que
ten, ou que as cidades centroeuropeas salvasen as súas zonas antigas
das gadoupas da especulación urbanística.
A traxedia
destas sociedades foi que esas decisións “conscientes” foron
tomadas por un sector social que se fixo dono do estado, a
burocracia, ao servizo dos seus intereses de caste; e non froito
dunha decisión colectiva, democrática, do conxunto da sociedade
organizada. Esta contradición sentou as bases da súa implosión,
porque a transición ao socialismo a través dun estado non
capitalista, da ditadura do proletariado, é un acto profundamente
consciente, de afirmación da clase obreira como clase dominante. É
a clase obreira xunto cos sectores oprimidos da sociedade, a que debe
detentar o poder a través dos organismos que constrúa
(Soviets/Consellos, Xuntas revolucionarias, etc.), onde tomar as
decisións que afectan o conxunto das relacións sociais e a
resolución das súas necesidades. Non facelo así, só conduce á
dexeneración e ao desastre.
O
socialismo é un paso adiante nesta transición da sociedade de
clases ao comunismo; é o primeiro paso do que Marx describiu como “a
administración das cousas”, fronte “ao goberno das persoas”.
Este “goberno das persoas”, o Estado e as súas institucións, é
necesario en toda sociedade mentres a forma na que se divide e
repártese a riqueza sexa a través das clases sociais -a loita de
clases, de últimas é a loita por esa repartición-, e sobre todo a
sociedade non produza o suficiente para resolver as necesidades
sociais. O socialismo/comunismo é inseparable da superación desas
necesidades a través da abundancia (non confundir con
“sobreprodución”) supérese a división en clases, desta forma o
“goberno das persoas” non será preciso e pasara á
“administración das cousas”. Volvendo a Marx, o comunismo é a
substitución do “reino da necesidade polo reino da liberdade”.
Para iso é preciso abolir as leis económicas e sociais que non
resolven as necesidades sociais, e con elas as políticas que
manteñen a explotación e a opresión; é dicir, as que condenan á
clase obreira e a maioría da poboación á pobreza.
A crise
actual é a máis grande expresión desta necesidade: parafraseando a
Trotski, as bases materiais para a construción dunha sociedade
socialista non só están dadas, senón que están a piques de
podrecer -alguén dixo que “ou nos damos présa en facer a
revolución, ou non teremos planeta onde facela”-. Os datos que
manexan as mesmas institucións burguesas, imperialistas, é que cos
gastos militares, o consumo superfluo e a sobre produción de todas
as mercadorías, desde as máis necesarias até as máis suntuarias,
resolveríanse a maioría das secuelas sociais, a fame e multitude de
enfermidades.
É máis, a
gran capacidade produtiva do ser humano -principal forza produtiva-,
hoxe un obreiro produce máis que miles non fai nin 25 anos, é a que
está na base desta sobreprodución do sistema; e como vimos, tamén
está na base das súas crises, ao provocar a tendencia decrecente da
taxa de ganancia. Esta é a manifestación máis cruel da
contradición na que vive esa relación social que chamamos
capitalismo, e graficamente descrita por Groucho Marx ”no Oeste”,
cando nunha fuxida cara a adiante nun tren, adícase a queimar os
vagóns ao berro de “máis madeira, é a guerra”. Ao final cando
quere darse conta, non ten tren que queimar.
Por iso é
tan importante, e decisivo, ter un proxecto social global co que
enfrontar ao capitalismo. Thatcher non tiña razón cando dixo “que
non había alternativa global” ao capitalismo; o que fixera era
derrotar aos mineiros británicos e con eles ao proxecto social
chamado socialismo. Cando os estados obreiros implosionaron, e o
imperialismo, xunto coas burocracias locais, impuxo a restauración
do capitalismo, terminaron a tarefa de Thatcher acabando co
socialismo no imaxinario colectivo.
O
suxeito social: a clase obreira
A última
discusión que se pon sobre a mesa no Programa de Mover Ficha é o
suxeito social protagonista do proceso de transformación social; e
non é menor esta discusión, posto que ante unha crise como a
actual, en que todos os sectores sociais agredidos -que son case
todos- levantan as súas propostas, imponse de novo a volta á lóxica
revolucionaria de que o todo é superior á suma das partes.
Entramos de
novo en polémica porque tras case vinte anos de retroceso na loita
obreira, e de desaparición do seu proxecto social, o socialismo, a
inmensa maioría das opcións políticas e teóricas da esquerda
romperon coa tradición obreira, sumándose ao método xa descrito da
suma aritmética de opresións fronte ao sistema. O “adeus ao
proletariado” de Alain Touraine e a “sociedade postindustrial”
de Glucksmann de fai máis de corenta anos calaron nas conciencias, e
nun movemento paradoxal, cando a mesma OIT recoñece que o 70% da
poboación urbana activa, e o 50% da rural, son asalariados/as, desde
a esquerda levántanse propostas nas que a clase obreira ou non
aparece, ou esta disolta en termo xenéricos como “cidadán”,
“pobo”, “nación”, etc.
Cando a
clase obreira era minoritaria a nivel internacional, e nacional, a
esquerda dáballe o peso social que tiña, como eixo da alternativa
ao capitalismo. Agora non, cando é maioría esmagadora a nivel
social, aumentando día a día os seus membros coa proletarización
crecente de amplos sectores campesiños nos chamados países
“emerxentes” e non tan emerxentes (África), e das chamadas
clases medias, os profesionais cualificados que cada vez máis forman
parte do proletariado industrial nas potencias imperialistas.
A clase
obreira “en si”, individualizada fronte ao capital, nunca deixo
de existir; por moitos cambios que houbese nas formas xurídicas de
contratación non se modificou a relación salarial. Pero a clase
“para si”, polo triunfo do neoliberalismo, si. E isto é o que
reflicten todas as propostas como Mover Ficha, do Decrecemento,
etc...
A clase
obreira é o suxeito social da revolución non por unha cuestión
moral, senón obxectiva, “en si”, teña conciencia ou non; a súa
revolución, polo papel que cumpre na produción e distribución de
bens e servizos a través da venda de forza de traballo, non supón a
substitución dunha clase dominante por outra como foi coa burguesía
e a aristocracia, senón a abolición de todas as clases sociais.
Calquera outra clase social ou sector social intermedio, como o
campesiñado ou a pequena burguesía tende inexorablemente a
reproducir unha sociedade de clases; ao ser propietaria dos medios de
produción o seu obxectivo final é a defensa desa propiedade, e a
súa reprodución.
Por contra,
a mellor demostración do papel revolucionario da clase obreira é a
implosión dos estados obreiros: xusto porque as clases obreiras
deses estados perderon o poder fronte a castes burocráticas, o seu
camiño foi a restauración do capitalismo. A clase obreira non ten
no seu código xenético manter o poder, posto que non ten ningunha
propiedade que defender; polo que se non avanza cara á súa
disolución e desaparición como clase nunha sociedade socialista,
retrocede ao capitalismo e volve a explotación. Non ten termino
medio.
Isto fai da
clase obreira o suxeito social da revolución socialista. A tarefa
que temos por diante é reconstruír o proxecto social alternativo, o
socialismo revolucionario, na loita contra a crise actual de
capitalismo imperialista, atascado nun anel de sobreprodución e
empobrecemento social que o conduce ao precipicio, a barbarie, ou ao
socialismo.
Galiza, no
mes de febreiro de 2014
No hay comentarios:
Publicar un comentario