Roberto Laxe
Trotski, nun debate nos anos 30 nos EE UU, á pregunta de se nos EE UU
había que construír un partido obreiro, fíxoo cun rotundo, “si”; para, de seguido,
dicir “un partido obreiro reformista,
non”.
Nun paradoxo da historia, no século XXI na Galiza temos unhas
circunstancias políticas con moitas semellanzas á que provocou a resposta de
Trotski; a clase obreira galega, e non só a galega, è hoxe un compoñente mais
de forzas políticas que non teñen como eixo a loita da clase obreira, senón as
esixencias doutros sectores e clases sociais, sen que as súas sinais de
identidade teñen visibilidade.
A crise económica detonada no 2007 moveu todas as cadeiras nas que se asentaba a estabilidade dos partidos e as clases sociais. Todas elas na procura do seu reacomodo na nova situación; o capital busca un novo partido que substitúa os dous axentes metidos de cheo na crise, o PP e o PSOE, ben sexa Cs, a “gran coalición” ou como queira que se chame.
As chamadas “clases medias”, intelectuais, profesores, pequena
burguesía, etc., reorganízanse ao redor do “soño” dunha volta á placidez do
Estado do Benestar, sen se decatar que a crise actual do capitalismo ten un calado
tan profundo que esta volta só é posible sobre a base do anticapitalismo e a
loita consecuente pola transformación socialista da sociedade.
En todos os casos, a clase obreira, as súas reivindicacións proprias
como clase quedan disoltas, invisíbeis, baixo o manto das aspiracións destas
clases sociais. Son soños do pasado que tapan a realidade: a loita de clases
como o motor da historia, a loita entre o capital e o traballo. Ou acaso o FMI,
a UE e a Troika son parvos ao esixir novas reformas laborais. Acaso o capital é
parvo cando a súa teima constante é rebaixa dos salarios dos asalariados / as e
a perda de condicións de traballo.
Mentres a clase obreira sexa a á esquerda das organizacións das clases
medias progresistas, da pequena burguesía liberal, non poderá avanzar na
resolución das súas condicións de vida e traballo. Por iso a tarefa
actual é pular pola ruptura política e organizativa da clase obreira respecto
as outras clases sociais.
Mas, recollendo a idea de Trotski, non é un partido reformista o que ha
que construír. Este tipo de partido existiron o longo de moitos anos, a II
Internacional ante de se pasar con armas e bagaxes o campo do capital; foron os
Partidos Comunistas, sobre todo tras a disolución da III Internacional no anos
40 como “agasallo” de Stalin ás potencias imperialistas. Esta realidade
demostra que só a toma do poder pola clase obreira a través dos seus
organismos, os consellos obreiros, Xuntas ou asembleas, establecendo o seu
control sobre o poder político, é posible “cristalizar” os avances sociais.
Toda reforma que non toque o poder do estado capitalista esta condenada á súa
desaparición, como demostra o desmantelamento calculado do Estado do Benestar
destes anos.
Este é o que diferenza un partido obreiro reformista e un partido
obreiro revolucionario, a actitude fronte o estado. Para un reformista a
transformación social conseguirase a través da acumulación gradual de reformas,
normalmente defendidas coa chegada de gobernos que non cuestionan o estado
capitalista. Un partido revolucionario parte de que o estado é capitalista,
desde a súa institución mais pequena ate o goberno ou o réxime, e so a partir
da loita consciente da clase obreira polo socialismo é que poderá avanzar na
superación das lacras do conxunto do capitalismo.
Esta diferenza cualitativa, programática, que basease na independencia
política e organizativa da clase obreira no camiño da transformación socialista
da sociedade, obriga a construír outro tipo de partido, oposto aos partidos
progresistas e tamén oposto aos partidos obreiros reformistas que teñen como
mero obxectivo o gañar unhas eleccións; obriga a construír un partido obreiro
revolucionario.
Non é autocualificarse como o partido da clase obreira, senón ser
humildes e recoñecer que o que hai é un xermolo dese partido que construirase
cos sectores mais conscientes e activos da clase obreira, e ten como eixos da
súa política a loita contra o réxime do 78 e a ruptura, pola república galega
no cadro dunha libre unión de nacións ibéricas, e dos Estados Unidos
Socialistas de Europa, a partir da loita independente e autoorganizada da clase
obreira como clase internacional que é.
En Galiza no mes de maio de 2016
No hay comentarios:
Publicar un comentario