Carlos Dafonte
Dende o 20 de decembro do
ano pasado, ata que foron convocadas novas eleccións a celebra-lo 26 de xuño,
transcorreu un período rico en ensinanzas que non debemos desaproveitar por
falla de reflexión.
A grande maioría dos medios
de comunicación non foron capaces, como era o seu desexo e posiblemente a
consigna recibida dende a propiedade dos mesmos, de forzar un pacto, ben arredor do PSOE ou do PP co obxectivo de reforza-lo bipartidismo, que sufriu
un forte retroceso, e ó réxime. E hai que recoñecer que xogaron forte, tentando
influír no pensamento da xente afirmando dende o primeiro momento, que non chegar
a un acordo sería un fracaso de todos os políticos, “ca cantidade de problemas
que están a sufri-los españois”; argumento moi feble, pois viña dicir que o
feito de chegar a acordos, ía actuar como o “tónico de fierabrás” e os
problemas se foran solucionar só por ese feito. Hoxe para a maior parte das
cuestións económicas e das consecuencias que delas se derivan, non temos
soberanía para darlles solución; as medidas veñen dadas dende a Unión Europea e
case sempre contrarias ós intereses da maioría, e goberne quen goberne, a non
ser que se enfronte á troika, ten que concretalas a nivel de estado.
Polo tanto, a rede de medios de información en mans da oligarquía, os seus periodistas e os tertulianos conxunturais, dende o primeiro momento convertéronse en oráculos, interpretadores do “que o pobo español quixo dicir” e deixando á marxe, como se non tiveran importancia algunha os programas electorais presentados, nin a memoria que por parte dos votantes ten o acontecido nos últimos corenta anos, tentaron que se realizara un novo fraude político-electoral, ademais do cometido polo PP pola súa financiación ilegal, e que se chegara a acordos que hoxe en día son moi difíciles, a non ser que algunha das forzas políticas engane a quen a votou.
Pois do mesmo xeito que Ana
Botella descubriu que “unha cousa son peras e outra mazás”, se hoxe non hai
goberno PSOE-Podemos-IU, é en primeiro lugar pola razón de que nas primeiras
eleccións no que o bipartidismo sae debilitado, fortalecelo e mestura-los
programas dun partido neoliberal, fiel seguidor das políticas da “troika”,
asinante dos tratado de Maastricht e solicitante do voto afirmativo para a
Constitución Europea, reformador con alevosía conxuntamente co PP, do artigo
135 da constitución, que aproba reformas laborais e de pensións indecentes,
cunha política exterior imperialista, etc, cos de partidos con programas
reformistas, non podía ser aceptado pola maioría dos seus votantes. Programa
reformista por outra banda, moi difícil de levar adiante na situación actual do
capitalismo, na que os mercados e os seus instrumentos, non están dispostos a
facer concesión algunha como amosou o caso grego. Partidos reformistas que non
tentan desborda-los marcos do réxime, pero a crise do mesmo é tan fonda, que
Podemos e IU, sobre todo o primeiro, de non facer unha certa resistencia ó
pacto, podería ter para súa imaxe e supervivencia, consecuencias demoledoras,
como amosou o referendo feito entre os seus afiliados que non están de acordo
con pactos co PSOE. Xa chegarán os tempos de pactar, deberon pensar os seus
dirixentes, pero non se pode nin debe saca-la conclusión de que non haberá
pactos “progresistas, “reformistas” ou de “esquerdas”; o título se adaptará ás
necesidades de quen manda. En Galicia temos una experiencia moi nidia, cando unha
parte reducida de EU fixo un “pacto de esquerdas” co PSOE dirixido por
Francisco Vázquez, para as eleccións autonómicas de 1997. E esa consigna “pacto
de esquerdas” foi repetida dun xeito unánime por todos os medios interesados en
comeza-la demolición de IU. ¡¡O PSOE, do que Paco Vázquez era secretario xeral,
era de esquerdas!!
En segundo lugar a
necesidade de contar cos nacionalistas burgueses periféricos, que en tempos de
crise, teñen maiores contradicións que en tempos de bonanza co nacionalismo centralista
español, polo que asumiron dende hai un tempo dar un paso adiante esixindo o
dereito a decidir como pobo, que nin o PSOE, nin PP, nin C's , o PP bis, están
dispostos a aceptar, polo menos na conxuntura actual.
Había outro pacto posible, o de “todos sen careta”, o da dereita toda, a centralista, a progresista e a conservadora, e
dicir, PP, PSOE e C’s, o PP bis, que daría estabilidade ó quefacer político por
un tempo pero non solucións do xeito que reclama unha parte importante da
poboación. Hai que recoñecer que sería hoxe, un suicidio político tanto para o
PSOE como para C’s, o PP bis. Polo cal ata que non quede outra solución a
“grande coalición” seguirá esperando tempos mellores.
A posición dunha forza de esquerdas nesta conxuntura.
Dende o meu punto de vista,
ó mellor trabucado, unha forza de esquerdas que coñece perfectamente que só a
loita institucional non conduce a cambios nas estruturas, poucos días despois
do 20-D, tiña que lanza-la mensaxe ós asalariados e outras clase e fraccións de
clase afectados pola crise, de “novas
eleccións para seguir avanzando”,
que debía concretarse nunha mobilización popular a todos os niveis, para
explicar directamente á veciñanza o que estaba a acontecer e para fortalecer
ideoloxicamente e organizar novos sectores e reforzar os xa organizados.
Pero a realidade, deixando
claro que dende o meu punto de vista, un dos problemas políticos do estado español é a inexistencia dunha forza de
esquerdas, foi que a suposta esquerda, refírome a Podemos e “confluencias”
e IU, pecháronse entre as paredes do Congreso dos Deputados, e iniciaron unha
frenética carreira de pactos e explicacións nos medios de información da
oligarquía, onde era difícil coñecer que é o que pensaban cada un dos
interrogados, moitas veces enmascarado todo o debate, por parte dos opoñentes,
con medias verdades e falsidades. Co fácil que era, cando a xente modificou o
seu voto e atópase envalentonada por dar un paso adiante que a libera do
bipartidismo, facer actos polos arrabaldes, as saídas das fábricas, nas prazas
dos pobos e cidades e explicarlles o que é evidente, que na democracia liberal,
burguesa, onde moi pouco se vai transformar dende as institucións vale o mesmo
ter 69 escanos que 53; ou pensan que dando o “surpasso”, é dicir obter mellores
resultados que o PSOE, o van a obrigar a darlles un apoio para políticas de
enfrontamento ca “troika”?. Que non se fagan falsos cálculos esta suposta
esquerda, só haberá política reformista
se hai ruptura ca UE e polo tanto co euro, verdadeiro “dogal” sobre a nosa
economía. E para esa política de ruptura, o PSOE non vai dar apoio algún.
O que compre hoxe é
organizar e debater a fondo cos sectores que están a poñer en cuestión o propio
réxime, e non facer o contrario, levar a cabo unha actividade que os leva a pensar
que por medio do voto e de acadar determinado número de escanos, se van
solucionar os seus problemas; nunha situación como a actual do que se debía
discutir, debater e levar á maioría dos votantes que queren modificacións
fondas, é de organiza-lo dobre poder ou
o contrapoder, como queiramos chamalo, e nesa perspectiva non se debe
esquecer o obxectivo estratéxico, a transformación social.
A situación nestes catro
meses transformárona, quen non debía facelo, en confusa. Basta un exemplo como
son as declaracións dun deputado de Podemos na Comunidade de Madrid, cando en
plena discusión con IU para ir xuntos para as próximas eleccións, afirma que
Podemos e IU teñen programas e proxectos distintos e que o proxecto de Podemos
coincide co que presenta el PSOE para as eleccións, non co do día seguinte das
mesmas. O grave das mesmas é que seguro que é un voceiro autorizado, ninguén
vai desmentilas, pero tamén que Podemos
e IU van pactar sen ter un programa, elemento prioritario para chegar a
acordos posteriores.
A situación do PCE e de IU.
Sempre se acusou, para
enredar, a IU de ser un proxecto comunista, do Partido Comunista de España. E
agora que se concretou o pacto Podemos-IU, algúns dos comentaristas e
representantes de partidos reaccionarios, para desvirtualo o que pode
significar que vai ter un efecto sobre o electorado evidente, descoñezo as
razóns de tanto medo, lanzan a acusación de quitarse a careta e aparecer como o
que son, un proxecto comunista.
O problema é o contrario,
diante da desaparición na práctica
do PCE, do proxecto comunista, do proxecto d@s asalariad@s, do proxecto de esquerdas no estado español, IU se desfai,
desintégrase; o PC era a argamasa que permitía o funcionamento dun movemento
tan complexo como era IU. Pero si hai algo certo é que dende o comezo da
crise, o PCE foi incapaz de liderar @s
asalariad@s en primeiro lugar, e o resto de capas e fraccións de clase
afectados e golpeados pola mesma; non tivo alternativa nin mobilizadora nin
institucional, cecais por converterse na etapa do PSOE con Rodríguez Z na presidencia, nun apéndice do mesmo. E
nesas circunstancias IU non xogou papel algún, estivo desbordada polos
acontecementos e en política non hai baleiros; de producirse, axiña o ocupa
outra forza política, neste caso Podemos. Hai bastantes anos analizamos e
chegamos á conclusión que o pacto de IU co PSOE, non lle facía desprazarse cara
a esquerda, senón todo o contrario, desprazaba a IU cara a dereita e en segundo
lugar que un PSOE dominante era a mellor garantía da inexistencia da esquerda
no estado español.
Penso polo tanto, que é a
política subsidiaria respecto do PSOE levada a cabo por IU nestes anos pasados,
a que lle impediu que xogara un papel determinante nesta situación de crise,
pero tamén a inexistencia, na práctica do PCE. Por iso neste blog temos a
teima, dende hai anos, da necesidade da creación do partido d@s traballador@s que a moita xente lle pode parece unha
cuestión baladí, ou un “mantra” que repetimos constantemente, pero nas
sociedades divididas en clases é determinante para establece-lo rumbo político.
A clase obreira é a única obxectivamente interesada en poñer fin ó capitalismo,
pois o proceso de acumulación realízase como consecuencia da explotación da
forza de traballo, da extracción da plusvalía; só conseguirá librarse desta
situación poñendo fin ó capitalismo.
A burguesía, as clases
medias, teñen construído diferentes partidos, algunhas máis dun, ou expresan os
seus intereses a traveso doutros; merece unha reflexión o feito que a maioría
dos asalariados, que son sobre as súas costas como a burguesía tenta
recupera-la taxa de ganancia, non conten co seu propio partido, que actúe dun
xeito independente na defensa dos seus intereses como clase, unha vez que o
PSOE pasouse dende o principio da transición “con armas e bagaxes” ó campo do
neoliberalismo, e o PCE, parece se atopa en proceso de liquidación. Cas miñas
verbas anteriores, non nego a existencia de partidos e organizacións políticas
que tentan xogar ese papel, pero dende o meu punto de vista non deixan de ser
embrións de algo moito máis forte, que máis cedo que tarde debe acontecer.
En Galicia no mes de maio
de 2016
No hay comentarios:
Publicar un comentario