Carlos Dafonte
Estes días, os que
habitamos no estado español, recibimos constantemente noticias que
falan da corrupción, cobros de comisións por obras e servizos para
financiamento ilegal dos partidos, sobresoldos non declarados en
Facenda, enriquecemento ilícito de numerosos políticos, rapina
sempre, das “arcas públicas” que se nutren cos impostos, taxas e
outros tributos, da cidadanía. Hai que clarexar que cando un
empresario paga unha “contribución” a un partido por unha obra o
un servizo, os cartos entregados, os aumenta no presuposto da obra ou
servizo, nunca perde nada, os que perden son os cidadás. Tamén que
ese empresario e tan corrupto como a quen soborna.
Informacións dicía, moitas veces segundo o fío argumental da dereita máis conservadora, que tenta convencernos de que a crise sistémica que sufrimos é resultado destas corruptelas e non do propio desenvolvemento do sistema, das súas leis internas, que sempre nos conducen á crise.
Tentan así de matar dous
paxaros cun só tiro, desprestixia-la política, porque din, produce
efectos nocivos sobre a economía, lle pon regras e controis que
frean a iniciativa privada e a obtención de beneficios, e desvia-la
atención da sociedade para que non se produza o debate que se debía
de estar producindo, sobre o sistema capitalista, as razóns de xerar
tanta miseria, paro, discriminacións, na grande maioría da
sociedade, no sector dos asalariados que é o que xera a riqueza, e
como unha minoría parasitaria, apropiase desta riqueza e vive na
opulencia máis insultante. Aínda que se teña repetido ata a
saciedade, no capitalismo a produción é social, pero os beneficios
non repercuten sobre toda a sociedade, aprópianse dos mesmos unha
parte minoritaria da mesma.
É nas crises, que cada
vez van ser máis prolongadas e fondas, onde o capitalismo amósase
tal como é na realidade; a situación actual é unha guía
extraordinaria, un manual de como funciona o modo de produción
capitalista e o seu estado, confirmando o que moitos levamos dicindo
desde hai moito tempo; ata nunha das zonas onde se acumula unha parte
moi importante da plusvalía producida no planeta, na Unión Europea,
aparece nesta crise, como o sistema desapiadado, que recorta
dereitos, que deturpa ata o concepto que din te-los capitalistas da
democracia, etc, polo que nos podemos facer unha idea certa, das
consecuencias do seu funcionamento na súa periferia, e cales son as
condicións de vida da maioría da poboación mundial.
Na sociedade a corrupción
e a febre, amosa que algo está enfermo, non funciona, pero non é a
enfermidade, o capitalismo herdeiro e sen reciclar do réxime
franquista, o que se chama comunmente “réxime da transición” é
a enfermidade da sociedade; a corrupción económica é un dos
síntomas; como non vai haber corrupción nun sistema no que todo por
principio está apodrentado? Ou non é corrupción que pola venda da
túa forza de traballo, o patrón teña cobertura legal para
obrigarte a traballar varias horas sen cobrar, que redundan no seu
exclusivo beneficio? Que na produción de mercadorías non se teñan
en conta as necesidades da sociedade senón exclusivamente acadar
beneficios?, Non é corrupción que nun sistema que din democrático
a democracia non poda entrar nas empresas?ou que goberne quen non é
elixido? como nos casos de Grecia e Italia. Ou que os programas
presentados, que é o que lexitima o elixido, non se cumpran? Ou que
o sistema electoral non sexa proporcional, para permitir que a clase
dominante, moi minoritaria, sempre monopolice o poder?.
Que non tenten
enganarnos, vivimos nun sistema cuxos alicerces están corrompidos e
que corrompe á sociedade, condición “sine qua non” para
perdurar, e se os partidos políticos representan a clases sociais e
fraccións de clase, aqueles que defenden o sistema, non poden
permanecer ó marxe do mesmo, defenden a corrupción xeneralizada que
é o sistema capitalista.
Hai xa bastantes anos, un
ministro dun goberno presidido por Filipe González, dixo algo
parecido a “en España o que non se fai rico é parvo”, frase que
reflicte perfectamente o pensamento capitalista e neoliberal; estase
neste mundo para facerse rico, a calquera prezo, traballando
abnegadamente non se consegue, e cando se vai ás institucións a
ocupar un cargo público, tamén, polo que estamos a constatar nestes
tempos, parece que ese fose o obxectivo dunha parte dos que ocupan
estes postos, e dixen unha parte, non todos.
A corrupción hoxe, no
estado español anega todas as institucións, desde os partidos ata á
monarquía, poñendo en cuestión o réxime da transición, que lle
garantiu á oligarquía varias décadas de explotación da clase
asalariada. As tramas de Gurtel, o “caso Urdangarín”, as
implicacións dos partidos cataláns en diferentes casos de
corrupción,os numerosos alcaldes, ministros e concelleiros,
conselleiros en activo ou “ex”, que se ven implicados en tramas
de corrupción ou en actitudes fora de toda ética política esixible
para quen goberna nos diferentes niveis da administración, axudan a
facer a atmosfera irrespirable, e digo axudan porque o que a fai
completamente irrespirable é a crise sistémica do capitalismo e as
medidas que os dous grandes partidos foron tomando para garantirlle á
oligarquía a recuperación da taxa de ganancia.
E escóitanse os vellos
sonsonetes de sempre, “é necesario facer unha nova lei de
financiamento dos partidos”, repetido desde hai moitos anos, e nese
saco cabe de todo, desde os que sinalan a necesidade dun modelo como
o norteamericano, onde na realidade, ou se é multimillonario ou son
as grandes corporacións empresariais as que financian ós candidatos
ó Congreso e o Senado, que despois actúan o servizo de quen lles
financiou e non de quen os elixiu co seu voto, ou os que pensan que
permitindo que se recade máis, soluciónase o problema; enorme erro,
que só permitiría que os partidos burgueses recadasen máis o que
faría avanzar cara a un sistema aínda máis bipartidista e con
menos presenza da esquerda, que pouco recadaría das burguesías
estatais e empresas, que son as que teñen capacidade para influír
verdadeiramente nun proceso electoral.
Ademais, na competencia
entre partidos do sistema na formación social capitalista, burguesa,
sempre vai pasar como na competencia intercapitalista en loita polos
mercados e materias primas, que se utiliza calquera recurso, legal ou
non, con tal de desbancar a quen disputas o poder; os grandes
partidos da dereita non son estruturas políticas, que loitan por un
programa, cunha ideoloxía, son estruturas de poder só interesadas
en representar nas institucións a determinados grupos sociais, para
que acaden importantes cotas de beneficio.
A situación é moi
complexa, como atopar una solución para avanzar por parte dos que
sofren a historia e a crise?; a crise da esquerda maniféstase tamén
na crise de alternativas; o fundamental é acertar cunha proposta, e
nestes momentos propoñer calquera cousa con tal de quitarnos ó PP
de enriba, aínda que poda parecer adecuado, ó mellor non é unha
perspectiva que se poida considerar de clase. @s asalariad@s
do estado español, coñecemos que unha alternativa ó PP, ca
intervención do PSOE tampouco é aceptable, o mesmo PSOE das
reformas do 2006, da fiscal, da laboral, o PSOE da lei para axilizar
os desafiuzamentos, da reforma laboral do 2010, do ataque ás
pensións, o dos centros concertados da igrexa, dos ERES de
Andalucía...por non falar da OTAN, da política imperialista
sometida á dos EEUU, ou a aprobación da Constitución Europea, os
tratados que configuran a actual Europa neoliberal e contraria ós
intereses d@s asalariad@s,
o PSOE suxeito de corruptelas múltiples ó longo do territorio
do estado..
Isto o está a percibi-la
xente que nas enquisas realizadas estes días reflicten que o PSOE, a
pesares da queda estrepitosa do PP, apenas “recolle” unhas
décimas. A clase traballadora a grande maioría da sociedade, comeza
a decatarse que ten que illar a estes dous partidos e buscar unha
alternativa propia; dunha vez por todas debe agruparse en algo novo,
independentemente de como lle queiramos chamar, “Fronte de
Esquerdas”, “Unidade Popular”, o nome é o de menos, cun
programa propio que rache co sistema capitalista e abra unha
perspectiva de futuro, capaz de ilusionar, de mobilizar a amplas
masas, polo que sexa importante loitar. Pero non pode ser un
instrumento que nace para participar nas eleccións, co obxectivo de
levar caras novas ós diferentes Parlamentos, Cortes e Concellos, ten
que ser máis que iso, ten que nacer para levantar contrapoder, para
disputa-la hexemonía á clase dominante.
En Galicia no mes de
febreiro de 2013.
No hay comentarios:
Publicar un comentario