Carlos Dafonte
O 14 de abril de 1931
proclámase a república en todo o estado español; os primeiros
lugares foron Redondela e Eibar, o día 13. Cataluña proclamou a
República Catalá e Manuel Azaña tivo que negociar cas autoridades
para que acordaran deixa-la declaración sen efecto ata a aprobación
dunha constitución. Unha vez aprobada en novembro do mesmo ano, e
como se establecese un novo proxecto de estado, onde se lles daba
resposta a moitos dos seus devezos, os catalás decidiron permanecer
dentro do estado español. O novo proxecto de estado que se
configuraba, permitía gozar de autonomía a Cataluña, País Vasco e
Galicia e aprobación de estatutos despois dunha serie de trámites.
A República buscou e atopou, naquel intre, solución para o problema
do estado multinacional español.
Produciuse unha ruptura respecto ó réxime anterior, a oligarquía financeiro-terratenente deixou de monopoliza-las institucións aínda que conservaba un enorme poder. Unha coalición entre a pequena burguesía e o sector máis moderado do movemento obreiro, a chamada “conxunción republicano socialista”, cuxa primeira experiencia iniciárase en 1910, como resposta ós acontecementos coñecidos como a “semana tráxica de Barcelona” e a campaña ¡Maura Non!, que permitirá por primeira vez que un socialista, Pablo Iglesias se convertera en deputado, foi a argamasa que serviu á unidade da grande maioría dos sectores republicanos concretada no Pacto de San Sebastián en agosto de 1930, o Pacto de Lestrove en Galicia, e poñer en marcha a maioría social necesaria para converter as eleccións municipais do ano 1931 nun plebiscito sobre a monarquía, gañalo, e obrigar ó rei a abdicar.
A monarquía perdera a
súa lexitimidade pola participación activa e o apoio á ditadura de
Primo de Rivera, que deixou sen efecto a constitución de 1876 que
lexitimaba a institución despois da queda da I ª República en
1874.
A ruptura política foi
posible pola existencia dun dobre poder, a ditadura por un
lado a cuxa cabeza atopábase o rei, e o Comité Revolucionario
constituído como resultado do Pacto de San Sebastián, que é quen
proclama a República na Porta do Sol o día 14. A mobilización
popular en apoio do poder constituínte, xunto cos votos, fixeron
todo o demais.
A situación política e
social que desde hai uns anos se foi creando no estado español, que
se pode caracterizar como de deterioro xeneralizado da maioría das
institucións, ca da monarquía en primeiro lugar; a perda de
confianza nos dous grandes partidos a pesares de que a inercia
política lles leva recibir un número importante de votos, que teñen
que ver moi pouco con que os votantes consideren que lles van
soluciona-los problemas; a corrupción que penetra nas entrañas do
sistema; a grave crise económica que padece unha parte importante da
cidadanía e a falla de solucións, só existen para os intereses
oligárquicos; a incapacidade para dar unha solución que satisfaga
ós problemas enquistados polo esgotamento da actual articulación
autonómica, etc, só poderán remontarse co entusiasmo e unha
perspectiva de clase, que se produciría ca proclamación da III ª
República e non por medio da segunda restauración monárquica, a
operación política que posiblemente se tente levar adiante. Cambiar
algo para que todo permaneza igual.
Pero sempre tendo
presente que a república sen apelido, aínda que fose un paso
adiante, non acadaría os obxectivos da súa proclamación; é o
contido de clase da mesma o que a fará eficaz ou non. Se o poder
continuase en mans dos grupos económicos, se as institucións
continuasen controladas polos partidos ó seu servizo, a república
sería unha anécdota, importante, pero unha anécdota. A IIIª
República ten que ser ruptura co sistema xurdido na
transición para que sexa eficaz: permita acada-los obxectivos
democráticos necesarios e se poña ó servizo dos intereses da
maioría, que é quen ten que loitar por ela e facela posible.
En Galicia no mes de
Abril de 2014.
No hay comentarios:
Publicar un comentario