Carlos Dafonte
O islamismo máis
radical, que popularmente coñécese como “yihadismo”, practican
a “yihad”, e tamén como “muxadíns”, os homes que están
dispostos a morrer por Alá, non é un proceso endóxeno das
sociedades musulmáns, responde o seu pulo case sempre, a uns
determinados intereses hexemónicos mundiais.
Hai xa moitos anos que
Samir Amín o coñecido economista, escritor e politólogo exipcio,
contou como estando en presencia de Gamal Abdel Nasser presidente de
Exipto, diante da nova que lle comunicaron da celebración dun evento
que xuntaba a un numeroso grupo de musulmáns moi radicais, o
analizou como a resposta dos EEUU ós acontecementos que se estaban a
dar naquel momento.
O principio deste movemento, que hoxe se materializa no que chaman os medios de comunicación o “Estado Islámico”, que ocupa territorios de Iraq e Siria, aínda que un antecedente coñecido pódese considerar a fundación dos “Irmáns Musulmáns” en 1928, hai que establecelo na chamada “guerra de Afganistán”, a maior operación encuberta na historia da CIA, programada como resposta á entrada do exército soviético no país ó ser solicitado por parte do goberno lexítimo, presidido polo comunista Babrak Karmal.
Hoxe coñécese que a
CIA, utilizando como estrutura intermedia o ISI (Interservizos de
Intelixencia) paquistaní, potenciaron unha “yihad”, unha guerra
total dos estados musulmáns, contra a URSS. Dáse a cifra de
aproximadamente 50.000 individuos dos máis radicais dentro do
islamismo, procedentes de corenta países, os que loitaron nos dez
anos que durou a guerra, pero valórase en máis de 100.000 os que
foron influenciados pola “Yihad” afgana. EEUU e Arabia Saudita
foron os principais financiadores da guerra mediante, hoxe coñécese
perfectamente, o comercio do opio producido na “Media Lúa
Dourada”, zona montañosa entre Irán, Afganistán e Paquistán,
onde prodúcese dende hai centos de anos.
En 1985 o presidente dos
EEUU Ronald Reagan amosou claramente o apoio ós “muxadíns” ó
asinar a Decisión de Seguridade Nacional 166, autorizando o apoio co
obxectivo de derrota-lo exército soviético. Subministróuselles
grande cantidade de armamento, só no ano 1987, 65.080 toneladas, así
como a participación de numerosos “especialistas” da CIA e do
Pentágono.
Ó actuar como
intermediario o ISI paquistaní, se afirma por parte de analistas do
evento, posiblemente para lava-la cara, que Osama ben Laden nunca
pensou que os EEUU estiveran detrás do apoio que recibían; pero é
moi dubidoso que así fora, a súa familia tiña numerosos negocios
nos EEUU e sobre todo ca familia Bush en negocios relacionados co
petróleo. Esta relación é a que lle permitiu xoga-lo papel que se
fixo ver que xogaba, en todo o movemento radical.
En calquera caso, como xa
teño aseverado noutros artigos, a retirada dos soviéticos e a caída
do goberno procomunista, foi posible grazas a intervención decisiva
dos EEUU e permitiulles ós islamitas máis radicais do mundo,
valorar positivamente a súa capacidade de enfrontarse a unha grande
potencia, ó tempo que as decenas de miles de participantes directos
nas operacións militares chegados de diversas partes do planeta, e
todos aqueles outros que sen participar directamente foron unha
importante axuda loxística desde os seus países, crearon as redes
que se teñen estendido por todo o planeta e que como un novo
Frankenstein, enfróntase cos EEUU e os seus aliados imperialistas.
Pero creo que é axeitado facernos unha pregunta, si a CIA axudou e
financiou a rede perdeu todo o control sobre ela? Non seguirá a
manipulala a favor dos intereses dos EEUU?
Non contentos ca súa
creación en Afganistán, seguiron a potencia-la rede islamita na
guerra de Iugoslavia, permitindo a chegada de “muxadíns” a
loitar a Bosnia contra Serbia.
Os EEUU levan moitos
anos fabricando Frankensteins.
Os EEUU son uns grandes
especialistas en crear monstros no mundo; non debemos esquecer a
familia Somoza en Nicaragüa, Trujillo en Santo Domingo, as ditaduras
en Cuba anteriores á revolución, Stroessner en Paraguai, Mobutu no
Congo, Suharto en Indonesia, Duvalier en Haití, Barrientos e todos
os demáis en Bolivia e todos que nacen da mente diabólica e
xenocida dun personaxe como Henry Kissinguer, que se concretan no
“Plano Condor”, con Pinochet e Vilela como elementos centrais.
Eran ditadores submisos á potencia hexemónica, necesitaban dos EEUU
para manterse no poder, para que as empresas norteamericanas lles
alimentaran cos dólares que os facían ricos; EEUU era ademais unha
potencia poderosa que impuña os seus criterios intervindo
militarmente cando algún dos “seus ditadores”, un presidente
norteamericano chegou a dicir dun deles “si, é un fillo de puta,
pero é un fillo de puta noso”, como no caso de Noriega en Panamá,
saíase do guión.
Os EEUU impuñan a “pax
americana”, aínda que fora a paz dos cemiterios; pero hoxe é unha
potencia en decadencia e as súas intervencións, sobre todo na área
dominada polo islam e os sectores máis radicais do mesmo, só levan
ó caos e facer un mundo completamente desestabilizado do que
tampouco poden sacar un grande beneficio, como non sexa vendendo
armas.
A utilización do
islamismo radical para desestabilizar gobernos ben de carácter
socialista ou que tentaban estar fora da órbita do imperialismo
ianqui, que non lles permitían ó acceso e explotación neocolonial
das riquezas, nin a plusvalía xerada polos traballadores autóctonos,
aínda que tenten tapar as súas intencións baixo a propaganda de
implantar réximes democráticos, foi un elemento cotiá durante
decenas de anos despois da descolonización. En Afganistán está moi
claro que dun goberno laico, que defendía a igualdade entre homes e
mulleres, pasouse o goberno dos talibáns; o apoio ós Irmáns
Musulmáns na época de Nasser en Exipto para desestabiliza-lo seu
goberno, ou a creación do propio Hamás en Palestina, para opoñelo
á OLP, na súa fundación considerada de carácter filocomunista e
laica.
Iraq, Libia e Siria eran
países con estados que se podían considerar estables; despois do
ataque contra os edificios de Nova Iorque, os EEUU facéndose pasar
por vítima, cando era responsable do pulo do islamismo máis
radical, considerou que debía dar unha imaxe de Iraq fora da
realidade; recordemos as verbas dos voceiros imperiais no senso de
que era a terceira potencia militar do mundo, rexida por un novo
Hitler, e ademais tiña armas de destrución masiva. Foron argumentos
falsos, pero suficientes para provocar a intervención e esnaquizar
un país que funcionaba bastante mellor que o actual, para matar
impunemente a cerca dun millón dos seus habitantes, desestabilizalo
por moitos anos pola introdución do sectarismo e a loita relixiosa,
desmembra-lo seu territorio e darlle pulo e argumentos moi sólidos ó
islamismo máis radical, desexoso de amosar como a intervención da
“cultura cristiá”, só leva ó caos e a destrución, cuxo único
xeito de superalo é a implantación da saharía. Se querían
debilitar a un inimigo de Israel é posible que o conseguiran, pero
fortaleceron a outro.
O caso de Libia é moi
parecido, despois da intervención da OTAN, co PSOE no Goberno e
Carme Chacón de Ministra de Defensa, non o esquezamos, hoxe non
existe nin como país nin como estado e os EEUU viron como se
asasinaba ó seu embaixador e a outros membros da delegación
diplomática; o territorio atópase desmembrado e repartido entre
diferentes milicias, algunhas islamitas moi radicais, e este caos
reflíctese tamén alén da fronteira sur, no Sahel, pois desde o
territorio de Libia subminístrase armas, cartos e loitadores para
determinadas accións armadas ó sur da súa fronteira.
A situación creada en
Libia pola OTAN, colocada estratexicamente na fronteira sur da UE,
debe ser hoxe un grande motivo de preocupación cousa que non debía
ocorrer nos tempos de Gadafi, enfrontado e moitas veces actuando ó
marxe da lei e os dereitos humanos, contra o islamismo radical, como
aconteceu na rexión da Cirenaica.
A guerra en Siria parece
que vai por mellor camiño para os EEUU e os seus aliados; unha
sublevación popular contra o poder dunha familia, que como no caso
de Iraq, fora creando certos aspectos do chamado “estado de
benestar”, con ocasión da crise económica os recortes levados a
cabo, e a falla de democracia, hai eleccións é partidos, pero a
grande maioría representan os intereses do réxime, sectores dicía,
marxinados da sociedade, levántanse contra o réxime e
inmediatamente desde a OTAN, apoiase ó máis reaccionario e
retrógrado da sociedade, a determinados sectores islamitas que
reciben armas e apoio a traveso de Arabia e emiratos árabes. Unha
revolta popular lexítima convértese en guerra civil, onde os
sectores islamitas, adícanse a masacrar ós sectores populares e
destruír as súas conquistas naquelas cidades onde acadaran o poder.
Ca aparición súbita dun
exército de “muxadíns” que constitúen o Estado Islámico, que
ocupa territorios de Iraq e Siria, sobre o que se nos inducen a
prestar toda a atención e téntase crear unha nova situación de
inseguridade no que coñecemos como Occidente, sobre todo despois de
que mataran a tres individuos pertencentes a países desta área do
planeta; non importaron nada os bombardeos sobre Gaza e a morte de
civís, nin a destrución de escolas da ONU ca morte de nenos e todos
cantos alí estaban refuxiados, nin os civís mortos e desmembrados
polos bombardeos da OTAN sobre Iraq, que aparecían en numerosas
fotografías nos medios de comunicación, eses son danos colaterais,
producidos polas boas xentes do “imperio”; pero tres occidentais
asasinados por uns fanáticos a quen o imperio apoia, ese é un crime
tal, que nos obriga a unha nova intervención militar na zona, con
obxectivos nada claros. Supoño que tamén se tenta desvia-la
atención sobre a terceira recesión que se nos ven enriba.
Mentres os Frankenstein
que fabrica o imperio se manteñen baixo as súas ordes, non hai
problema con que mozos europeos e doutros países se alisten nas súas
fileiras para combater ós “xentís”, pero tan pronto como actúa
con autonomía todo ese proceso é condenable e merecen ser
perseguidos. Neste punto podíamos facer unha pregunta moi, creo eu,
pertinente, por que non se persegue ós centos de miles de mozos e
mozas xudeus, procedentes dos EEUU, Gran Bretaña, Australia,
Francia, Alemaña e calquera país do planeta, que se alistan no
exército de Israel e matan impunemente sobre todo a civís
palestinos, pero tamén libaneses e en todos cantos países
interveñen os sionistas?
O Estado Islámico ou
como se queira chamar, unha nova invención do imperialismo dos EEUU.
Hai fotografías que se
publicaron en determinados medios, onde o senador McCain, quen lle
disputou a presidencia a Obama e un dos máis ligados ó complexo
industrial-militar dos EEUU, aparece en xuntanzas con diferentes
persoas pola zona de Oriente Próximo, entre elas ó nomeado
“califa”, sucesor de Mahoma, no chamado Estado Islámico (EI),
Ibrahim al-Badri, cuxo nome de guerra é Abu Bakr al-Bagdadi; McCain
confirmou a entrevista. Despois xuntouse con Obama e pediu a
intervención do seu país na zona para frear o EI. Actuaba Mc Cain
como enviado de Obama? Que pactou cos grupos cos que se xuntou?.
Tamén hai toda unha
serie de cabos soltos que é necesario unir como nun puzzle para ver
si somos capaces de entender todo o que esta a pasar nunha zona tan
importante do planeta. Tendo moi presente que o que está en xogo é
o problema do gas como alternativa ó petróleo, os dous grandes
gasodutos que constrúe Rusia-Gazprom e o Nabucco que atraveso de
Turquía quere ser unha alternativa ós anteriores.
O día dez do mes pasado
o presidente Obama anuncia continuar o plano aprobado na época de
Bush fillo, consiste en redeseñar toda a zona de Oriente Medio e
Próximo, dividindo os grandes estados en pequenos de base étnica
homoxénea, como explicou nun artigo hai certo tempo o coronel Ralph
Peters, publicado na revista “Parameters”, das forzas
terrestres; nel, ademais de sinalar que os EEUU non debían temer o
terrorismo e utilizalo no seu beneficio, afirmaba que o caos xerado
no mundo árabe por esta reestruturación, non debía preocupar, pois
unha vez creados os pequenos estados, só os EEUU serían capaces de
protexelos fronte as apetencias de Israel, converteríanse así en
estados dependentes, da grande potencia mundial.
Segundo parece, este
Plano tivo o seu comezo ca entrada de Israel no Líbano, pero
abandonouse cando o seu exército foi derrotado por Hizbuláh e as
forzas populares libanesas e tivo que retirarse. Pero non debemos
esquecer que naqueles momentos a Secretaria de Estado norteamericana,
Condolezza Rice declarou: “O que vemos aquí -referíndose o que
estaba a acontecer no Líbano-, é, nun senso, o crecemento, os
dolores do parto, dun “Novo Oriente Próximo”, e todo o que nós
facemos, é empurrar para non volver ó anterior”. “Novo
Oriente Próximo” do que xa falara a señora Rice un tempo
antes en Tel Aviv nunha roda de prensa co primeiro ministro Olmert.
Neste plano de
construción dun “Novo Oriente Próximo”, Gaza vai ser un
territorio conquistado por Israel e a maioría dos palestinos deben
pasar a Exipto, e afirma Thyerry Meyssan, a negativa a aceptar esta
cuestión e a que provocou a queda de Mubarak e a chegada dos Irmáns
Musulmáns ó poder, con Mursi que ten pasaporte estadounidense, como
presidente, que sí estaba disposto a abrir a fronteira, polo que o
exército deu un golpe de estado e o xulga por “alta traizón”.
O segundo intento
tampouco deu un grande resultado, a invasión recente de Gaza, e
aínda que preto do corenta por cento da súa poboación foi
desprazada, o exército sionista tívose que retirar e a fronteira
exipcia seguiu pechada para a grande maioría dos palestinos.
O Estado Islámico, este
novo grupo xurdido da nada é moi posible que leve adiante toda unha
serie de obxectivos do plano dos EEUU, aínda que estes cinicamente o
neguen e ata condenen as accións do EI; crear nunha parte de Iraq un
estado homoxéneo sunnita, para o que necesitan desprazar a cristiáns
e outra crenzas relixiosas e que as forzas iraquís non combatan,
consolidar o estado kurdo iraquí, que como é coñecido, atópase
baixo protección de Israel, sufocar a rebelión en Siria, dobregar a
resistencia dos kurdos nese territorio, que son acusados por Turquía
de pertencer o PKK o inimigo principal do estado turco, polo que
permite o paso constante de “muxadíns” chegados de todas partes
do mundo, por Ceylanpinar e por último dividir Siria segundo o mapa
do coronel Ralph Peters, creando no nordeste un pequeno estado.
Hai denuncias de
determinados medios de comunicación que traballan en Siria, no senso
de que os supostos bombardeos sobre concentracións de grupos do EI,
non se realizaron, e si se fixeron sobre refinerías destruíndo
preto dunha decena.
Outro aspecto importante
a considerar é o de establecer a relación entre o que esta a pasar
en Ucraína, o golpe de estado contra o presidente constitucional
levado a cabo por forzas pronazis, co apoio dos EEUU e a UE, e os
acontecementos que se están a producir e que poden levar á creación
do “Novo Oriente Próximo”, non só respecto á que podíamos
chamar “guerra do gas”; hai que dicir que as alianzas asinadas
por Rusia con subministradores de gas, deixan obsoleto o proxecto
Nabucco, do mesmo xeito que a Ucraína que nace do golpe pronazi,
crea dificultades para o abastecemento das dúas redes construídas
por Rusia cara á UE.
Pero tampouco é
desdeñable a influenza que pode ter o EI sobre as importantes
minorías musulmáns de Rusia e China; se teñen detectado a
presencia de iugures, da rexión de china de Xianjiang, que como é
coñecido están enfrontados co goberno chino e practican o
terrorismo, colocan bombas en lugares públicos non só na súa
rexión, senón tamén no resto do territorio, no exército do EI e
sobre todo a influenza en Chechenia, que xa librou unha dura guerra
con Rusia que a ocupa desde tempo inmemorial.
De ser certas todas estas
análises, os diferentes problemas que se presentan, non van a ser
solucionados dentro dun prazo inmediato, pola resistencia dos
diferentes pobos afectados, polo que é necesario pensar que a
desestabilización desa rexión á que tanta importancia lle prestan
as análises de Zbigniew Brzezinski, o home que segue a ter unha
enorme influenza na política exterior norteamericana, vai durar
moitos anos. As forzas de esquerda débenlle prestar especial
atención sobre todo no senso da solidariedade cos pobos que van a
sufrir a aplicación deste novo proxecto imperialista.
En Galicia no mes de
outono de 2014
No hay comentarios:
Publicar un comentario