Polo seu nome en inglés,
o Trasatlantic Trade and Investment Partnership (TTIP) que eu
denominarei “Tratado de Libre Comercio UE-EEUU”, supoño segue a
negociarse entre a máis absoluta desinformación. Por parte da Unión
Europea, negocia un chamado “Grupo de Traballo de Alto Nivel para o
Emprego e o Crecemento” (HLWG), creado en 2011. Cando o
“Observatorio da Empresa Corporativa”, preguntoulle á Comisión
Europea quen formaba parte do mesmo, contestoulle despois dun tempo
que o grupo “non ten membros identificables” e que “non hai
ningún documento que conteña a listaxe dos autores dos informes”.
Tampouco houbo resposta cando se lle preguntou polos “expertos
externos” nin cando solicitaron listaxe das xuntanzas cos grupos
empresariais, que segundo parece, son os que están a marcar a
axenda.
O nove de setembro do ano 2013, escribín un artigo neste blog analizando algunhas das posibles consecuencias de asinarse o Tratado de Libre Comercio entre a Unión Europea e os EEUU de Norteamérica e denunciando que as conversas fosen secretas, que descoñeceramos todo o que se esta a pactar, conculcando un dos principios dun sistema democrático como é que a cidadanía conte ca información necesaria para poder decidir. O grave do caso é que a cidadanía non esta previsto que decida nada; cando este finalizado o tratado, se vai aprobar por determinadas institucións e os que vivimos na Unión Europea, sufriremos as consecuencias, pero non teremos dereito algún a dicir se estamos de acordo ou non con este Tratado. Este xeito de actuar non é novo, as institucións da UE, o servizo das oligarquías, o utilizan con frecuencia, pero é propio de ditaduras que é no que se esta a converter o marco xurídico- institucional baixo o que vivimos.
Desde o meu anterior
artigo hai máis dun ano, imos coñecendo algunhas cuestións novas
relacionadas co tratado, por exemplo que hai unha maioría no
Congreso dos Deputados, formada por PP, PSOE, UPyD e CiU, é dicir
por Rajoy, Pedro Sánchez, Rosa Díez e Artur Mas, que cando un
deputado de IU formulou diversas cuestións sobre o mesmo en maio
deste ano, estas catro organizacións saíron en bloque a defendelo e
a que seguira a ser secreta a súa negociación. Negáronse
terminantemente a que se fixera un referendo antes de que entrara en
vigor. Teñen medo que o pobo, unha vez coñecidas as súas
cláusulas, decida libremente que non esta de acordo e xa se sabe, se
un país négase, non pode entrar en vigor na UE; polo tanto canto
maior sexa o segredo mellor para os intereses dos máis poderosos.
Pero sabemos tamén que
hai un pacto de silencio entre os grandes medios de comunicación,
aqueles que son propiedade do capital financeiro e grandes
empresarios, para os que o devandito Tratado de Libre Comercio
non é un tema interesante como para saír nos seus medios, o cal e
moi sospeitoso. Moi de cando en vez, se di por parte de algún
político que vai ser moi beneficioso para a poboación, pero si así
fose debían estar dispostos a informar a fondo para que esa
poboación que é a que despois vota, lles puidera recoñecer o
beneficio. Cando non o fan, cando non se informa, cando se actúa
respecto ó Tratado dun xeito ditatorial, quere dicir que a súa
sinatura vai beneficiar a moi poucos, as grandes empresas
transnacionais, o capital financeiro e sobre o resto da poboación as
consecuencias van ser, como xa se coñece en EEUU, Canada e México
que levan con un asinado desde hai moitos anos, en absoluto
beneficioso, trouxo máis pobreza, paro e destrución da pequena
empresa. A grande empresa é a única que se beneficiou.
Unha cuestión tan
importante como este Tratado, por moito que tenten manter en
secreto as súas negociacións, sempre terá filtracións, sempre
haberá algunha persoa que ten coñecementos sobre o mesmo que fala,
da a coñecer algún dato, non quere cargar sobre a súa conciencia
cun acto perverso como é que nada se coñeza sobre o mesmo, polo
tanto aínda que dun xeito parcial coñecemos algúns aspectos do
Tratado que nos reafirman na nosa posición contraria ó mesmo
e nos axudan a comprender mellor as razóns de que non se de
información sobre o mesmo.
Este acordo non é novo,
é unha revisión do “Acordo Multilateral sobre Investimentos”
(AMI), negociado en segredo entre os anos 1995-97 polos membros da
OCDE e que coñecidos os seus contidos por unha filtración, levantou
tal grao de protestas, que obrigou ós seus promotores a esquecelo.
O novo Tratado
modifica algúns aspectos do anterior e unha das cuestións máis
graves, é que considera que as lexislacións de ámbolos dous lados
do Atlántico se deben someter ás normas do libre comercio
establecidas para beneficiar ós grandes emporios empresariais e
ameaza, ós países que non cumpran o Tratado, con reparacións moi
cuantiosas ás empresas que se consideren afectadas. En definitiva os
países asinantes terán que garantir que “as súas leis, os seus
regulamentos e os seus procedementos son conformes” o establecido
no futuro Tratado. Como vai funcionar isto na práctica? Pois
dun xeito moi sinxelo; se un país ten lexislación que defende o
medio ambiente, ou laboral que garanta determinados dereitos @s
traballador@s ou que non permite o
uso de transxénicos ou trata-las carnes de porcino e polo dun xeito
determinado, etc, as empresas que se sintan prexudicadas por esa
lexislación, no caso de que non se modifique, poden reclamar enormes
indemnizacións, que serán decididas non por un tribunal do país,
senón por un que se vai crear encargado de sentencia-los litixios
entre investidores e estados e de cuxa composición nada se coñece,
pero seguro que as grandes empresas terán moitas posibilidades de
colocar no mesmo a persoas favorables ós seus intereses. No fondo
sitúa ó capital transnacional nun “status” equiparable o dun
estado-nación, co que este feito significa de ataque ós sistemas
democráticos. Xa hai casos en Perú, Australia, Canadá e Exipto,
países que teñen asinados tratados e existen tribunais por eles
establecidos, que sentenciaron no caso de que se considere que se
actúa contra os investidores; en Exipto o fixeron pola suba do
salario mínimo; Ecuador foi condenado a pagarlle máis de 2.000
millóns de dólares a unha compañía petroleira e Australia tamén
o foi como consecuencia dunha denuncia pola razón de que a unha
marca de tabaco norteamericana, non lle gustaba o deseño do novo
paquete aprobado polo Parlamento.
Como vemos PP, PSOE e
UPyD din defende-la soberanía do estado español fronte ó dereito a
decidir que quere exercer unha parte do pobo catalá, pero non teñen
problema algún en cedela ós intereses espurios das multinacionais.
E non hai que esquecer que operan na UE máis de 14.000 empresas dos
EEUU, cunha rede de máis de 50.000 filiais.
Como se ten falado, é un
dos elementos de propaganda esgrimido polos seus defensores, de que
vai beneficiar dun xeito moi importante á cidadanía, un grupo de
estudos, chegou a concreción de que é certo, de entrar en vigor o
Tratado no ano 2017, a partires do 2029 cada cidadán sacaría un
beneficio de aproximadamente 3 céntimos de euro ó día e o PIB
subiría un 0,65%; como se pode apreciar unha miseria en relación a
cantidade de dereitos de todo tipo que se van perder.
Para finalizar unhas
verbas de John Hilary, director executivo de War of Want e profesor
honorario da School of Politics and International Relations da
Universidade de Nottingham:”Non vai ser un acordo comercial
tradicional que reduza os aranceis sobre as importacións entre dous
socios comerciais, pois os aranceis entre a UE e os EEUU son tan
baixos que apenas se poden reducir xa”. “O verdadeiro e principal
obxectivo do Tratado é elimina-las barreiras regulamentarias que
limitan os beneficios potenciais das corporacións transnacionais nos
mercados europeos e estadounidenses”. “O acordo tamén busca
crear novos mercados abrindo o sector dos servizos públicos e a
adxudicación de contratos por parte da administración ás
corporacións transnacionais, o que ameaza con provocar máis ondas
de privatizacións en sectores moi importantes como a sanidade e a
educación”.
O capital tenta dar unha
nova volta de torca e eliminar toda unha serie de dereitos acadados
pol@s traballador@s
despois de moitos anos de loita. O único xeito de enfrontarse á
situación é loitando, e facéndoo dun xeito organizado. En cada
cidade, en cada vila de Galicia hai que formar Comités contra
o Tratado e levantar unha mobilización de masas, capaz de
frea-la súa aprobación.
En Galicia no mes de
decembro de 2014
No hay comentarios:
Publicar un comentario