Roberto Laxe
Ven a conto esta pregunta, porque desde o comezo da crise, aló polo
2007 (non o 2008 como adoitan dicir, para cinguir a crise ao sector financeiro
e así librar o capitalismo de conxunto da queima), semella que os capitalistas
como "empregadores" son vítimas da crise, igual que os traballadores;
e que so uns poucos financeiros (a lóxica de cinguir o comezo da crise ao 2008)
e especuladores, xunto cos seus políticos corruptos, son os responsábeis. Os
demais, vítimas.
E nada mais lonxe da realidade. Os capitalistas non fan manifestacións,
non fan folgas (fan, en todo caso, peches patronais, que non son o mesmo), non
precisan de piquetes nin escraches.
Non precisan de utilizar as redes sociais para convocar nada, xa teñen o seus
Consellos de Administración, as organizacións empresariais e os seus medios,
para premer á sociedade. Embora, todos sabemos que a
presión sen forza detrás, non serve de nada. A clase traballadora e o pobo
-salvo para algúns seguidores da teoría do discurso sen ancoraxes sociais-
saben que se queren conquistar as súas reivindicacións, teñen que saír á rúa e
loitar. Iso aprenden-no no dia a dia.
Cal son, entón, as ferramentas de presión dos capitalistas para forzar un goberno dubidoso de se enfrontar á poboación? Os artigos de prensa, si; os tertulianos, tamén... As reunións entre eles, etc. Mas con que premen.
Pois teñen unha ferramenta política esencial: o desemprego. Ameazan, ou
fan realidade, con peches, con deslocalizacións, con despidos masivos,
ERE’s,... Os capitalistas individuais, consciente ou
inconscientemente, cando pechan, cando despiden,... están utilizando unha
ferramenta de "loita" para conseguir unha lexislación que lles favoreza.
O desemprego, como "exercito industrial de reserva", ademais dunha
ferramenta económica para premer á baixa os salarios e as condicións de
traballo, son unha ferramenta política de primeiro orde, pois pon ao goberno de
quenda na necesidade de lexislar. Como o goberno é o goberno do capital, a
lexislación adaptará as condicións legais ao que o capital esta a facer, premer
para baixar salarios e condicións de traballo.
Ha gobernos que non necesitan moito, son gobernos que respostan
directamente na súa base electoral ao capital. Ha outros, que presentándose
como progresistas, precisan dun empurrón para que o fagan. O capitalistas son
capaces de desmontar temporalmente a economía dun pais para cambiar a política
dun goberno, ou mesmo de goberno: o peche patronal contra o goberno da Unidade
Popular chilena.
Como forza de choque os grandes capitais utilizan á masa dos pequenos
empresarios, e estes, se non encontran unha alternativa coherente enfronte,
entre a clase traballadora, que demostre na súa práctica e loita que o pequeno
empresario só pode esperar do gran e mediano capital a súa destrución. Dun
xeito falso nas mentes da xente, os pequenos empresarios son presentados, mesmo
polos medios do gran capital, como os grandes criadores de emprego na nación, e
poren os grandes destrutores de emprego, chegado o caso.
Esta "mitoloxía" do poder do pequeno empresario /
emprendedor, fai deles carne de extrema dereita. Se eles crean emprego é porque
traballan para unha gran empresa, que é a que lles "da" o traballo; a
que fai os encargos. En realidade son so "capataces" das grandes
empresas, só que sen as garantías do "empregado". As grandes non se
xogan nada, se non é rendibel, rompen o contrato mercantil e punto. Desta
maneira, nos tempos de crise como os actuais, os grandes capitais,
conscentemente (estos si!), empurran aos pequenos empresarios (os seus
capataces) a se enfrontar cos traballadores / as, baixo a demagoxia e o
populismo da "mitoloxía" do "emprendedor", como a persoa
que arrisca todo ao montar o negocio; mentres o traballador / a é un
conservador que non arrisca nada. Mas, se a aventura empresarial vai mal, o
primeiro que paga o pato é o traballador / a. Isto non o din ninguén.
O capital, na loita de clases, ten, como a clase traballadora, as súas
ferramentas económicas (o desemprego), políticas (os seus partidos, o estado) e
ideolóxicas (a relixión, os medios de "in"comunicación, etc.); e non
se deixan levar por fantasías "post"; eso é para consumo da
intelectualidade e sectores da clase traballadora. O capital ten ferramentas
claras, e cando unha non lles serve para manter a explotación, mudan. A clase
traballadora faino mais lentamente, pois non ten a capacidade de elaboración
que teñen os think thank do capital, embora ten que facer igual; se as súas
organizacións para a loita non lle serven para defender os seus intereses,
deben cambialas.
Mas ha unha diferenza, ao capital sérvelle calquera ideoloxía, teoría
ou mitoloxía que manteña a orde: o exemplo paradigmático foi a utilización do
milenarismo das lendas xermanas polos nazis. Ao gran capital alemán
importáballe ben pouco que Himmler, e as SS, crera en Odin, Wotan ou Thor...,
nas lendas xermánicas e no panxermanismo... O que lle importaba de Himmler e as
SS era si defendían ben os seus interese fronte á clase traballadora. O capital
pode pasar de apoiar a un "loco" xermanico como Himmler a uns Irmáns
Musulmáns, como fixeron nos anos 50 fronte o panarabismo laico de Nasser.
Todas son as ferramentas co que o capital afronta a loita de clases,
desde o mais simple e económico, como o desemprego, ate o ideolóxico. Para a
clase traballadora centrar a resistencia no primeiro aspecto, leva a un
economicismo que fai perder a perspectiva do capital como un todo que atinxe
todas as relacións sociais; cinguirse ao ultimo aspecto, é unha deriva
"intelectualista", que afasta a clase traballadora da loita política
e ideolóxica.
Para acabar coa lacra do desemprego é preciso entender o seu papel na
loita do capital contra os traballadores / as.
En Galiza no mes de maio de 2015
No hay comentarios:
Publicar un comentario