En 1982, tras a crise do partido que o franquismo construíra para “ se reformarse”, a UCD, e as loitas contra o Estatuto dos Traballadores, a agudización das reivindicacións nacionais coa DIADA, a manifestación contra o “aldraxe” en Galiza ou as manifestacións en Andalucía, reivindicándose como nacionalidade histórica; e, sobre todo, a amplitude do rexeitamento social á incorporación á OTAN, que cuestionaba todo o esquema da burguesía española para incorporarse de pleno dereito ao bloque atlantista e europeo, un sector da burguesía impulsa o primeiro “cambio”, baixo unha lema: “OTAN de Entrada, NON”, e como despois viuse, de “saída, tampouco”.
Ese “cambio” traduciuse nalgúns cambios cosméticos da situación española, cuxo símbolo foi a “movida” madrileña impulsada polo alcalde Tenro Galván. Unha “movida” que foi un movemento post moderno, reaccionario, despolitizador e individualista da cultura fronte á cultura social que tivera un papel importante contra o franquismo. Era a “marxista” Escopeta Nacional de Luís Berlanga contra a “post moderna” Pepi Boom e as mozas da chea de Pedro Almodovar.
Pero no fondo, e despois na forma (lei represiva de Corcuera, os GAL, etc.), era unha política reaccionaria ao servizo de desmantelar a mobilización social e de incorporar á división do traballo da CEE (actual Unión Europea) na estrutura económica do estado español: desmantelamento industrial a través das sucesivas reconversións, e redución do aparello produtivo ao turismo e a construción (soa?).
Que en 1997 gañase Aznar e o PP non era máis que a conclusión da desmobilización social fomentada desde o PSOE e a destrución de todas as organizacións da esquerda. O activismo, uns, honestamente, outros por ansias de rubir nun aparello do estado en cambio, incorporáronse masivamente a un PSOE que en 1982 estaba necesitado de cadros dirixentes, que non tiña: ao longo do franquismo non cumprira ningún papel de nada, o eixo vertebrador da loita antifranquista foron o PCE e as organizacións á súa esquerda (PT, ORT, MC, LCR, etc.). De aquí sacou o PSOE eses cadros dirixentes, ben formados e con experiencia (soa?).
O segundo gran momento da utilización desas palabras de “progreso”, “cambio”, etc., foi tras a combinación de folgas xerais contra Aznar, Nunca Mais e a Guerra de Iraq. Millóns na rúa de novo, nas folgas xerais de Galiza do 2001 e a estatal do 2002 contra Aznar; centos de miles contra o insulto do Prestige, e novamente millóns contra a Guerra en Iraq; que culminou co 11M e a noite das eleccións, co semi levantamento popular contra as mentiras dos atentados de Madrid.
ZP e o PSOE, novamente, ao rescate do réxime. Agora non había unha potente esquerda, o PCE, e a extrema esquerda (os antes citados), senón unhas forzas nacionalistas fortes (ERC, BNG) e unha esquerda socialdemócrata, EU. Baixo a lema de todos contra Aznar e o PP (soa?), o goberno do PSOE atopou o apoio de esas forzas políticas, dende fóra... Sen entrar no goberno, facilitaron a desmobilización social, posto que o obxectivo xa estaba cumprido, botar ao PP, e agora tocaba “arrimar o ombreiro para tomar medidas progresivas”. E como FG antes, ZP adoptou algunhas, retirou as tropas de Iraq, para envialas ao Líbano, aprobou a lei de matrimonios gai, a lei da “desmemoria” histórica ou a lei que privatiza o aborto; todo iso presentado polos seus aliados como o “posible”. Máis non se podía facer; a lema reformista de Lula, da “política como a arte de facer o posible”, fronte á política revolucionaria da “política como a arte de facer o necesario”.
Paralelamente en Galiza chegan á Xunta, “os nosos”, o bipartito, e concretamente, o BNG. A lóxica, exactamente a mesma, baixo consígna de “facer o que se poida”, adoptáronse algunhas medidas progresivas (peche durante dous anos do Gaias, banco de terras, etc.), pero mantivéronse as esencias das políticas estatais que supoñen a marxinación e o atraso de Galiza: o caso máis rechamante, o apoio expreso do BNG a esa obra faraónica e semicolonial que é a AVE a Madrid, mentres se pechaban estacións e liñas dentro de Galiza.
A desmobilización social, e as políticas abertamente burguesas de ambos os gobernos conduciron á decepción de amplos sectores da poboación traballadora, abrindo as portas á vitoria do PP en ambos os casos.
O PSOE, como sempre, como axente de desmobilización social sobre a base das palabras “máxicas”, e por iso abstractas, de “cambio”, de “progreso”, que desvían á clase traballadora ao pantano da inactividade política.
E agora, despois de máis dun ano de desmobilización ao servizo dun proxecto electoral, baixo as mesmas palabras abstractas, de “cambio”, de “progreso”, atopámonos na mesma tesitura; o PSOE ao rescate do réxime.
Pero non nos equivoquemos, en ningunha do tres ocasiones, o PSOE só puido facer o que fixo. No primeiro caso, o PCE de Carrillo, que por militancia e estruturación social (non por votos) era o primeiro partido da esquerda, e tenia a maioría nas CCOO, non quixo levar até o final as loitas obreiras do momento, limitándose a accións “propagandísticas” como a Asemblea de Delegados contra o Estatuto dos Traballadores. O PCE e CCOO foron parte desa desmobilización pois fiaron todo ao seu éxito electoral; desviaron toda a forza da mobilización social ao pantano das eleccións (soa?), e cando fracasaron, abriuse unha crise demoledora no PCE (soa?).
No segundo, ERC, o BNG e EU, apoios externos do goberno de ZP, foron os que desde os movementos sociais fomentaron a desmobilizacion social gráficamente expresada en Galiza coa frase “xa estan os nosos na Xunta”, e con eses “nosos” non se refería a xente ao PSOE, senón ao BNG.
Novamente non foi o PSOE só. As ilusións electoralistas vendidas por esas organizacións, en que “os nosos” resolverían xa os problemas, fixo que a forza de Nunca Mais e contra a guerra, das folgas xerais, … fóra malgastada, xerando decepción, e agora vémolo, crises devastadoras en dúas do tres organizacións: EU e o BNG, ERC está a salvarse polo proceso soberanista catalán.
O pasado ano foi o cume dun ascenso das mobilizacións sociais, que ten dúas datas craves: o 22 de Marzo e a dimisión do Rei Juan Carlos, coas subseguintes manifestacións semi espontáneas polo dereito a decidir entre Monarquía ou República.
Desde ese momento a loita social cae a niveis pre crises? O PP e o réxime respiran tranquilo porque a socialdemocracia volveu “ao seu resgate”, agora baixo outra forma, PODEMOS, as súas “confluencias” (vaia termo máis peiorativo) e demais expresións. O PSOE estaba inhabilitado para cumprir o seu histórico papel de desmobilizar e desviar a loita social ao pantano das eleccións; era preciso darlle un tempo para que se reciclase, atopase caras novas que non estivesen asociadas nin aos GAL nin aos recortes, é dicir, nin a FG nin a ZP.
O tempo conseguírono, e agora, de novo, atopámonos coas vellas palabras “máxicas”: “cambio”, “plans de emerxencia social”, “consenso”, “acordo entre todos”, etc. para, de novo, galvanizar á poboación traballadora nun camiño que só conduce a unha nova decepción. Esperemos que á terceira sexa a vencida, e a poboación non faga como nos casos anteriores, que se foron para as súas casas e deixaron o campo aberto á dereita máis casposa, ao PP. Porque agora, coa crise que azouta o capitalismo, a cousa non esta para xogos.
Os que nos prometen “cambio”, “axenda sociais”, “consenso” ou “plans de Emerxencia social”, teñen que explicar á poboación como pode conquistarse ese cambio sen loitar contra a UE e o réxime.
No concreto, alguén que non sexa un inxenuo ou un mentireiro, pode crer que a patronal vai admitir sen pelexar (como o fan eles) a derrogación das reformas laborais, que lles permite ter atada á clase obreira.
Alguén cre que a UE vai admitir a derrogación do articulo 135 da Constitución, o que PP e PSOE pactaron contra os dereitos sociais de todos e todas.
Alguén cre que as grandes aseguradores e empresas privadas de saúde van admitir de bo grado a derrogación da lei 15/97 que lles dá a sanidade para os seus negocios.
Alguén cre que en plena guerra contra o terrorismo, declarada por Bush no 2002 e ratificada por Hollande o pasado ano, vaise a derrogar sen loita a lei Mordaza.
Alguén cre que o réxime, as súas institucións centralizadas e a burguesía ?castiza? que vive ao seu ao redor (ACS, ACCIONA, OHL, etc. etc) vai admitir o dereito á autodeterminación das nacións, é dicir, a perda de control das concesións de servizos municipais e autonómicos.
Alguén cre que a OTAN vai admitir que un dos seus membros máis leais (Rota e Moron) se vaia coma se tal cousa.
Os que nos din, “confiade no cambio” que propomos, votádenos, apoiádenos, “somos a xente”, terán que explicar, primeiro que pactar co PSOE é atarse de pés e mans ante un partido do réxime, da UE e a OTAN, como demostra a experiencia histórica: de FG a ZP, pasando por PS.
Segundo, aprendendo da experiencia (non digo a historia porque aínda é actualidade) de Grecia: se Syriza, que tiña máis estrutura social que nosas “ferramentas do cambio” non foron capaces de resistir as presións da UE e hoxe Syriza é xa parte do problema, dos axustes e a reacción, estas “ferramentas do cambio” canto lle durarían a Merkel e cia? Menos que nada, porque xa nin gobernaron e xa rebaixaron o seu programa a niveis que a Syriza tiveron que imporlle.
Terceiro, alguén cre (ou se cre tan “intelixente” e “líder máximo”) que sen a mobilización social na rúa é posible resistir e gañar ante as tremendas presións que desde o réxime, a UE e a OTAN vanse a desatar contra as aspiracións de cambio que indubidablemente hai na sociedade española.
A mal chamada “axenda social” choca frontalmente coa “axenda política”, porque esta, senón remóvense até os cimentos as institucións actuais, son un freo absoluto para a conquista dos dereitos sociais e laborais. Separar unha da outra é unha falacia que só serve para enganar á poboación e justificar os pactos que se aveciñan.
O que debemos estar a facer é xusto o contrario, denunciar que tras as palabras “máxicas” só hai o baleiro; que esconden as verdadeiras palabras que non queren utilizar para non “asustar” á poboación, provocando a súa reacción en forma de loita e mobilización: o que realmente vén desde o goberno, o que sexa, son máis recortes, máis austeridade, máis privatizacións, máis reformas laborais, máis represión e máis guerra.
Isto é o que hai que estar a dicir á poboación traballadora e que se non nos preparamos para loitar, vannos a coller desarmados? E iso sería un desastre para o que queda dos nosos dereitos.
As palabras “máxicas” son, simplemente, cantos de sirena para enganar e derrotar á poboación. E quen as use, é cómplice.
Galiza, no mes de febreiro de 2016
No hay comentarios:
Publicar un comentario