Carlos Dafonte.
O conflito entre as
institucións lexítimas de Cataluña e as forzas que apoian ó
réxime, iniciou hai días unha nova etapa. Despois da suposta
declaración da República e da independencia e digo suposta, pola
razón de que nin quen a levaron a cabo, o Parlament, nin a cidadanía
sobre as que ía ter unha maior repercusión, actuaron como se o
feito se producira; non se aprobaron os decretos que debían estar
preparados para a ocasión nin se arriou a bandeira do estado
español. Como resposta prodúcesee a aplicación por parte do
Goberno presidido por Rajoy, co apoio do Psoe e Ciudadanos, do artigo
155 que por non estar desenvolvido nin por lei nin reglamento, se
pode estar aplicando cun alto grao de arbitrariedade; circunstancia
que non ten moita importancia nin consecuencias xurídicas neste
réxime, por esta-lo Órgano do Poder Xudicial, Tribunal
Constitucional e Supremo así como a Fiscalía Xeral do Estado
controlados polos partidos que tiveron o poder en todos estes anos
desde a aprobación da Constitución e que nomean ós seus diferentes
membros.
Esta situación xa moi complexa se viu agravada pola orde de prisión para o Vicepresident e sete Consellers de carácter incondicional, que vista a gravidade do feito xustifica, senón o estaba antes do auto da xuíza señora Lamela, que o President e catro Consellers se marcharan para a capital da UE para preservar así a parte das institucións intervidas polo Goberno e os seus aliados e poder levar adiante unha campaña de denuncia do que está a acontecer no Estado Español; que non é só a represión sobre os independentistas de Cataluña, tamén as modificacións no Código Penal, a Lei chamada “mordaza” e a utilización do Fiscal Xeral e o “tribunal especial” chamado Audiencia Nacional en miña opinión non para “facer xustiza”, senón con ánimo de vinganza para quen se opoña ó réxime. Unha especie de “aviso a navegantes”.
Unha etapa definitiva.
O encarceramento dos
membros do Govern debe levarnos a diversas reflexións. En primeiro
lugar si a Audiencia Nacional debe xulgar os presuntos delitos
cometidos polos encausados. Este tribunal, herdeiro do Tribunal de
Orde Público da época de Franco, entendo actúa contra delitos de
terrorismo e narcotráfico, etc pero non para estes específicos de
carácter político, pero en calquera caso conculca o establecido na
Constitución de que toda persoa ten dereito a ser xulgado por un
xuíz natural, non especial. Pero non debemos tampouco esquencer que
é un Fiscal Xeral, nomeado polo goberno do PP, quen presenta a
querela, e a xuíza acepta cando o que opinan numerosos xuristas é
que debía renunciar e pasa-lo caso a un Tribunal ordinario e de
Cataluña. Fiscal Xeral reprobado polas Cortes que en calquera outro
país con democracia plena, debía ser cesado polo Goberno.
Unha segunda, é que
posiblemente o Tribunal Supremo que ten que xulga-los membros da mesa
do Parlament por estara “aforados”, non formule a cuestión como
“rebelión”, o que se pode considerar como unha rectificación ó
propio Fiscal Xeral o que debe ter unha inmediata repercusión sobre
a situación dos presos políticos.
Puido o President frea-la
aplicación do artigo 155, convocando eleccións autonómicas para
decembro?. As opinións son contraditorias; abrumadoramente hai
sectores dos medios hexemónicos que din que si, nun intento por
facerlle cargar ó Govern con toda a responsabilidade dos
acontecementos posteriores, pero outros opinamos o contrario, era
lóxico que para facelo se obtiveran garantías de que de convocalas
e disolve-lo Parlament, o PP, Psoe e Ciudadanos, non aplicarían o
artigo 155; eran as garantías que lle exixía o Govern e que o Pp e
os seus aliados non quixeron ofrecer. Sen garantías non as
convocaron e como se pode apreciar garantías de actuar con xustiza e
non cun sentimento de vinganza, moi poucas.
Centos de miles de
persoas celebramos, en Cataluña dun xeito máis manifesto, tamén no
resto do Estado, esta pseudo-proclamación da república que, se
queira admitilo así ou non, é un novo cravo no féretro do réxime.
Os anteriores, o comportamento da monarquía que levou a un rei a
abdicar, a corrupción sobre todo no PP pero tamén no Psoe, a crise
económica, o xeito como se gastou o diñeiro de tod@s en salva-los
máis poderosos, a miseria en que as políticas neoliberais aplicadas
inciden sobre unha parte da poboación, o 15 M e a denuncia do
bipartidismo, o célebre “non nos representais”, o rescate da
economía, sinatura do memorando e a intervención dos chamados
“homes de negro”...
Como afecta ó réxime
esta declaración e todo o procés, é algo que moita xente de
esquerda non analiza e ante o que se pode considerar “unha
chirigotada” que abre un período de incerteza, chaman a volver á
orde establecido pola Constitución e as leis do réxime. Estas
xentes se sitúan como defensoras do actual réxime e eu creo que
ninguén que se considere de esquerdas pode defendelo, e no caso de
Cataluña, por moitos agravios que os independentistas teñan feito
as xentes da esquerdas, e os fixeron sobre todo aplicando políticas
neoliberais e de austeridade determinadas pola “troika”, iso non
debe levarlles a tomar posicións cercanas ó outro bando, os do 155,
os do encarceramento por ideas e por accións que, en calquera caso,
non se poden cualificar como se fixo por parte do Fiscal Xeral de
“rebelión”, os que aplican sistemáticamente as mesmas políticas
que os independentistas catalás.
A campaña contra as
liberdades das nacións, en marcha
Os medios hexemónicos
teñen unha consigna clara, non informar, senón desprestixia-lo
proxecto soberanista centrándose na figura de Puigdemont en base a
súa dobre estratexia, xudicial e política e levala a cabo desde
Bruxelas a capital da UE e un dos centros políticos mundiais. Esa
actitude se lle reprocha con numerosos insultos, cobarde,
insolidario, que pola súa culpa atópanse presos @s outr@s
compoñente do Govern etc.O único que amosan é a preocupación do
réxime por esa dobre función que o Govern planificou, mártires na
cadea por unha banda, denuncia política e argumentario por outra.
Esquencen que é o President, cesado pola aplicación do artigo 155
da Constitución utilizado de “calquera xeito” e que no corazón
da UE ten un labor político moi importante que levar a cabo,
denunciar sistemáticamente o que está a acontecer no Estado Español
en relación ás liberdades e os recortes das mesmas, a incapacidade
do PP para negociar, deixando empodrecer ó longo destes anos un
problema como o de Cataluña que si se atopa nese estadio é
resultado da concepción neofranquista que o PP ten de España como
Estado e que se aprecia, non se vai solucionar ca convocatoria e a
celebración de eleccións o 21 de decembro.
O futuro pasa polas
próximas eleccións?
Cataluña é unha nación
articulada durante moitos anos arredor do “catalanismo”, onde
tod@s tiñan o seu espazo, naceras alí ou
non, agás casos excepcionais como o de Albiol, máximo dirixente do
PP que se apresentou en Badalona e gañou a alcaldía cun programa
xenófobo; pero pouco a pouco, e penso pola incapacidade para
comprende-la situación e pensar que todos os problemas se resolven
pola vía autoritaria, o que hoxe en día articula a unha grande
parte dos catalás é o “independentismo”, digamos lembrando a
Lenin “fase superior do catalanismo”. Por iso o PP non entende e
parece que PSOE e Ciudadanos tampouco, o PSC debía entendelo, que
non toda a sociedade que se mobiliza é independentista, pero é
catalanista e ten un enorme respeto polas súas institucións e si
pensaron que permitindo, si permitindo, que o Fiscal Xeral presente
esa querela, xusto na Audiencia e a determinada xuíz, consiguen o
efecto contrario de desmantelar o bloque que gañou as eleccións no
2015, posiblemente lle agregue novos votantes e o afortale.
Ós independentistas lle
deron feito o programa, “a loita polas liberdades democráticas, a
amnistía”, etc e o bloque do 155 que vai a presentar, máis
Estatut, menos autonomía, castelaniza-los nen@s,
programa dun Ministro de Educación...?
Que vai face-la esquerda,
se existe en Cataluña? Aliarse con algún deste dous bloques? Coido
que as xentes de esquerda deben presentar un programa no que estexan
presentes como mínimo, a defensa dos valores republicanos, a loita
contra as políticas neoliberais e de recortes, a defensa das
liberdades e a apertura dun proceso constituinte.
Pero tamén é moi
importante, do mesmo xeito que desde o Goberno e os seus aliados lle
preguntaban a Puigdemont se declarara a independencia ou non e lle
exixía unha resposta sinxela, un “si” ou un “non”, lle
exixamos ó PP e tamén ós seus aliados na aplicación do 155, se
están dispostos a acepta-lo resultados do día 21 de decembro; é
moi fácil contestar, só teñen que dicir “si” ou “non”,
pero que se expliquen, pois non está nada claro.
En calquera caso os
independentistas se gañan as eleccións e teñen maioría absoluta
teñen dúas opcións, seguir cara adiante dando por bo todo o
actuado, ou rectificar e volver a propoñer unha negociación. O PP
seguir co art 155, utilizando a violencia e escondéndose detrás do
Fiscal Xeral ou aceptar agora sí, a negociación para atopar vías
de encontro.
En Galicia no mes de
novembro de 2017.
No hay comentarios:
Publicar un comentario