Roberto Laxe
O acordo
asinado este 22 de Xuño polo goberno grego co Eurogrupo, presentado
cinicamente por Tsipras como o "fin dos memorandos" que
desde o 2010 non equivale a outra cousa que a certificación da
conversión de Grecia nunha semicolonia da UE, de Alemaña
especificamente, e como mínimo ata o ano 2032 nun protectorado ao
servizo da devolución da débeda coa UE e o capital financeiro
europeo.
O acordo
prorroga 10 anos o pago da débeda pendente (a un interese do 4.14%)
e permite de novo a Grecia financiarse nos mercados
financeiros, para o que o Fondo Europeo de Estabilidade Financeira
facilítalle unha remesa de 15 mil millóns de euros ( que o pobo
grego seguirá sen ver) que lle sirva de garantía para que os bancos
présten-lle diñeiro.
Os datos de retroceso social antes do acordo son demoledores, o PIB está aínda un 25% por baixo do que tiña antes do comezo da crise, a débeda está no 178%, o que significa que cada grego ou grega “soporta” unha débeda de 30 000 euros. A taxa de paro subiu 16 puntos desde o 2008 e supera o 20%. O poder adquisitivo dos gregos, que era o 93% da media europea, na actualidade esborrallouse ao 68%. Os salários caeron durante esta década máis do 30% de media. A porcentaxe de gregos que vive na pobreza duplicou-se: hoxe son o 22%. E 500 mil novos gregos abandonaron o país.
A
ruína social e a entrega do país
O goberno de
Syriza-Anel, para asinar este acordo, comprometeu-se á aplicación
de 88 novas medidas sociais e económicas contra o pobo traballador
grego, e a que non se derrogará nin reverterá ningunha das brutais
medidas impostas nos anteriores memorandos (reformas laborais,
privatizacións, pensións, salarios...). Ademais, aceptan tomar
medidas adicionais como o aumento dos impostos pagos pola clase
traballadora e novas reducións das prestacións da Seguridade
Social.
Así mesmo
seguen coa venda en "parcelas" do patrimonio grego: á
venda do porto do Pireo (o maior de Grecia) a capital chinés, súmase
a privatización da empresa estatal de eletricidade (DEI) e do
sistema de distribución de augas das dúas principais cidades,
Atenas e Salónica, así como todos os térreos públicos cuxo valor
sexa amortizable en mercado imobiliário... É dicer, que sexan
rendibles. Lembremos que a comezos da crise, sectores do capital
alemán afirmaron, sen rubor, que se Grecia quería ser resgatada,
debería vender "ata as súas illas do Exeo".
Como mecanismo
de controle de que este acordo se cumpre, mantén-se as auditorias
trimestrais, os informes sobre o cumprimento dos acordos, as sancións
en caso de incumprimento, etc. Pareceria que se está ante o "cuarto
memorando", mais o certo é que pola súa duración e condicións
é un verdadeiro tratado semicolonial que engloba os anteriores
memorandos, profúndaos e prolonga a dependencia de Grecia máis de
15 anos, en que será renegociado.
A burguesia
grega, débil pero que existe, mostrou unha dependencia extrema e
cumplicidade co saqueo. Sobrevive beneficiando-se da caida dos
salários e as condicións de vida provocada polas reformas e
contrareformas, que lle permiten superexplotar á clase traballadora
e aumentar a taxa de explotación. Por iso, non é de estrañar o
apoio ao Acordo por parte de Anel (no goberno) e a morna resposta
dada pola dereita burguesa de Nova Democracia e polo fascista Amencer
Dourado; sobre todo este último, que tivera como eixo a demagoxia
contra a UE, limitándose a sinalar os "erros do acordo".
A
trampa da Débeda
O
argumento-"xustificación", para imporlle ao pobo grego
estes sacrificios é a devolución dunha débeda xerada nos anos de
expansión económica, falseada ante a UE co asesoramento do banco de
investimentos yanki Goldman Sachs, do que Mario Draghi, actual
presidente do Banco Central Europeo, era representante para Europa.
Unha débeda que afetaba como acredores a moitos bancos europeos,
desde o Deustche Bank ata o Santander; non esquezamos que o
capitalismo español era o quinto acredor de débeda grega. Fronte ao
pobo grego, a unidade de Europa do capital era real:
Pero, porque os
estados, ou organismos supraestatales como a UE, tendo teoricamente a
potestade de crear diñeiro, teñen que asumir débedas de grandes
dimensións como a grega, que nos 2017 foi do 178,6 % do seu PIB.
Asumir unha débeda de este calibre supón entrampar ao estado, é
dicir ao conxunto da sociedade, nuns pagos que na práctica
demóstranse como imposibles, ao superar por moito a súa capacidade
produtiva. A partir do seu recoñecemento, éntrase nunha dinámica
de usura; así, o acordo asinado en xuño supón uns tipos de
interese do 4.14%. Tendo en conta que o BCE vende o diñeiro ao
sistema financeiro a practicamente o 0% de interese, o negocio é
máis que obvio.
Esta dinámica
usurera lévanos a contestar á pregunta de "porque os estados
asumen débedas de leste calibre". A resposta é dobre, primeiro
económica, e segundo político-legal.
Desde os anos
80, co triunfo do neoliberalismo, á vez que se desmantelaban os
servizos públicos, que pasaban a xestión privada aínda que a
titularidade seguise en mans do estado, co aumento de custos que isto
significa ("público é servizo, privado beneficio"), o
sistema fiscal inclinábase dunha maneira descarada a beneficiar aos
grandes capitais. Na maioría dos paises, Grecia incluída, o esforzo
fiscal para soster os gastos do estado apoiábanse nas rendas do
traballo, liberando cada vez máis ás rendas do capital; ao que se
suma a fraude, os paraisos fiscais, etc. Este fenómeno provocou que
no 2009 o déficit publico grego estivese realmente no 12.7% do PIB,
e non no 3.7 que dicían coas contas falseadas de Goldman Sachs. A
economía grega era incapaz de soster este gasto.
Aquí entra a
trampa político-legal do Tratado de Maastricht. Ata o 92, en que se
asinou ese Tratado, verdadeira Constitución da UE, os estados
europeos financiábanse con caixa propia; é dicir, o goberno
elaboraba o orzamento, e dáballe a orde ao banco central ou
ministerio que tivese as competencias, a fabricar o diñeiro
necesario para cubrir ese orzamento. O estado endebedábase consigo
mesmo; e só marginalmente acudíase ao capital privado, por iso a
débeda publica non adoitaba superar o 50% do PIB.
O Tratado de
Maastricht no seu articulo 104, seguindo o exemplo francés que o
introduciu nos 70, prohibe taxativamente aos estados (e despois á
UE) financiarse con caixa propia. Teñen que emitir bonos,
débeda,..., ir aos mercados financeiros e de aí sacar os fondos
necesarios para financiarse. A prima de risco é un dato para medir a
solvencia dun estado en relación ao de referencia, o alemán, que
determinará o tipo de interese que eses mercados financeiros
imporán. Por iso élles tan facil crear crise de débeda, con
especular desde os "mercados financeiros" basta-lles para
xerar unha situación como a que Grecia, Italia, Irlanda, Portugal ou
o Estado Español viviron a comezos desta crise, cando se disparou a
especulación ao redor da débeda soberana destes estados.
Grecia é de
todos eles, o máis débil, e esta trampa da débeda levouna á
situación actual; como na EE UU pasou con Porto Rico. Na EE UU
varios estados e cidades como a mesma California ou Detroit,
declaráronse en quebra, pero o goberno federal rescatounos
fabricando diñeiro, e con medidas moi semellantes ás de Grecia... A
Porto Rico, que non é un estado, senón asociado, deixouno caer sen
achegar nin un dólar para o seu rescate. O afundimento da economía
portorriqueña provocou meses de grandes mobilizacións sociais.
A débeda
pública creada desta maneira convértese nun nó corredizo ao redor
do pescozo dos pobos, e se non lla rexeita rotundamente, rompendo
coas entidades financeiras acredoras e negándose ao seu pago,
sérvelles de xustificación moral para esixir uns sacrificios
bárbaros á clase traballadora e o pobo: "como non imos pagar a
débeda, é deshonroso". Esta é a lóxica infame do articulo
135 da Constitución Española, pagar custe o que custe.
O
problema non é Grecia, é a UE
O salto cara
atrás social que supuxeron os tres memorandos, e que vai cristalizar
neste acordo é unha imposición do capital europeo, preocupado,
primeiro, pola recuperación das cantidades prestadas, e segundo,
pola estabilidade da UE. Este acordo prodúcese despois do Brexit, e
a poucas semanas do susto que deron os resultados das eleccións
italianas co triunfo da xenófoba Liga Norte
Tamén lles
preocupa a inestabilidade do sistema financeiro europeo. Un banco de
referencia a nivel europeo, "sistémico" na xerga oficial,
como é o Deustche Bank, leva anos de retroceso, no 2016 as súas
accións baixaron o 30% e o seu valor como entidade é inferior á da
BNP Paribas. A banca italiana é un quebradizo de cabeza para toda
Europa, ao mesmo tempo en que o BSCH "compraba" por 1 euro
o Banco Popular, o estado italiano inxectaba en dous bancos
venecianos 17 mil millóns de euros. É obvio que os problemas de
Grecia teñen un nome: capitalizar unha banca incapaz de saír da
crise na que eles nos meteron; e se para iso hai que destruír unha
sociedade, destrúese. "Poderoso cabaleiro é don diñeiro".
A Unión
Europea non é máis que o reflexo da economía europea,
aparentemente unida pola moeda e politicas comúns de destrución de
conquistas sociais e laborais, pero tremendamente enfrontadas entre
as diferentes burguesias nacionais por defender cada unha a súa
"parcela". Grecia é o fracaso da Unión Europea que paga o
pato a clase traballadora e o pobo.
A liberación
do pobo grego de acordos humillantes, semicoloniais, como o asinado
co Eurogrupo o pasado xuño non é alleo á loita dos / as
pensionistas españois, dos traballadores / as franceses,... Son
parte do mesmo problema, a Unión de Capitalistas Europeos, que é a
UE. O non pago da débeda grega ten exactamente o mesmo sentido que o
rexeitamento ao desmantelamento do sistema público de pensións
español, ou a privatización da SNCF francesa orixe das últimas
folgas; por iso, calquera perspectiva de avance pasa pola construción
da unidade da clase traballadora Europea contra a UE.
E
que din os nosos progresistas
En setembro do
2015, dous meses despois da primeira claudicación de Syriza ante a
UE e a Troika, Pablo Igrexas participou na campaña electoral grega
con Tsipras e afirmou o seguinte: "É verdade que cando se fan
negociacións, ás veces te podes atopar en situacións difíciles,
pero desde logo os gregos non van querer volver ao pasado, non van
ter posturas serviles nin van axeonllarse ante Alemaña, saben que
con Alexis Tsipras van ter un león que vai defender á súa xente a
pesar das dificultades".
Non se sabe o
que significa para Pablo Iglesias “non ter posturas serviles”,
porque o seu silencio ante Grecia é clamoroso; pero ata o xesto de
Tsipras de por-se gravata ante os xerifaltes do Eurogrupo -Tsipras
prometera que cando acabasen os memorandos, poríase gravata-, cando
se asina non un memorando, senón un Tratado que ratifica o carácter
semicolonial de Grecia paréceselle moito. A firma deste acordo, para
máis humillación, chega a 3 anos xusto da traizón de Syriza ao
pobo grego, quen con toda a rotunidade dixera en referendum que NON É
NON ao memorando que desde a UE impúñanlles.
A realidade e
os feitos destes anos puxeron branco sobre negro que sen acabar coa
UE, a Europa do Capital, sen un programa de loita por unha Europa
Socialista dos e as Traballadoras e os pobos, sen unha politica de
ruptura coa Unión que se apoie na mobilización independente da
clase traballadora, na solidariedade e a unidade internacional, o
único que pode suceder é o que sucedeu: a claudicación de Syriza e
a derrota da clase traballadora grega e, con ela, do conxunto de
traballadores e traballadoras europeos.
O que fose
ministro de economia con Syriza, Yanis Varoufakis, comento nun
entrevista poucos meses despois que cando chegou a Bruxelas a
negociar, o ministro de finanzas alemán díxolle, “sei que tedes
razón, pero ímosvos esnaquizar”. Por que?, porque Grecia, o pobo
traballador grego, coas súas folgas xerais e mobilizacións, puñan
en cuestión a estabilidade do conxunto da UE; se gañaba a clase
obreira grega, a greta na Unión era descomunal.
Por iso
dixéronlle, “ímosvos a esnaquizar”; querían derrotar ao pobo
grego, imporlle os plans que despois, servilmente, aplicou Syriza e
Tsipras, e pechar a crise política que se podria abrir se os e as
gregas conquistasen as súas esixencias contra a UE. O silencio
ominoso de toda a esquerda cando desde Grecia se enfrontaba ese
“ímosvos a esnaquizar”, converteu a esas forzas en parte do
problema, non da solución.
Grecia, ademais
do fracaso da UE, é o fracaso da chamada “nova” política,
convertida nunha útil e servil ferramenta de desmobilización.
Galiza, no mes
de xullo do 2018
No hay comentarios:
Publicar un comentario