Carlos Dafonte
Pido perdón por
copiarlle a García Marquez o título dunha das súas celebradas
novelas, pero creo que é a realidade que está a vivir nestes tempos
o partido da dereita conservadora do estado.
En primeiro lugar, pois
se enfronta a súa saída do goberno e á desaparición de “M.
Rajoy” da escena política, abrindo un proceso de pseudodemocracia
política interna, con chatas moi considerables. O acontecido nas
primarias, onde trunfou unha das candidatas, é corrixido no congreso
celebrado o pasado fin de semana, e non vale dicir, como fan moitos
destacados militantes e numerosos periodistas, que se trata dunha
segunda volta como “nas eleccións francesas”, cousa que non é
certa; nos países con segunda volta, nela teñen dereito a vota-los
mesmos que votaron na primeira, e no caso do Pp, non é así. Tamén
estas eleccións primarias puxeron en evidencia que non é o grande
partido que propagandisticamente nos querían facer crer, o número
de inscritos para participar nas primarias foi ridículo e xa non
poden seguir a mante-lo engano.
Polo tanto o Pp necesita saír deste primeiro labirinto no que se meteu ca escapada de “M. Rajoy” e perde-la protección do seu dedo, que debía elixir @ futur@ president@; o labirinto de xogar a ser un partido cunha certa democracia interna cando o congreso ten amosado que non o é, e que os militantes contan pouco, situación que pode levarlle a que se abran feridas moi fondas que o poden converter, nun partido de tendencias, que nas súas circunstancias, perda do goberno, acosado pola corrupción e queda nas enquisas o poden levar a ser inoperante; non lle vai ser fácil, parecéndose nestes anos máis ó Movemento Nacional que a un partido que actúa de acordo ca constitución cun réxime interno democrático, no que prevalezan e poidan convivir diferentes opinións, que se produza un cambio tan radical.
En segundo lugar tamén
está o labirinto chamémoslle “ideolóxico”, aínda que sei que
empregar esta verba para cualificar o “debate” entre Sainz de
Santamaría e Casado, é excesivo; pero pode servir para entendernos
entre o que significa o “marianismo” que pode representar a
primeira e o “aznarismo” que representa o segundo.
Polo que puiden observar
na campaña previa ó congreso, @s candidat@s
no superaron nunca , o “contraste de pareceres”, establecido no
ano 1967 na “Lei Orgánica do Movemento Nacional” ca que o
franquismo pechaba o seu ciclo lexislativo.
O goberno de Aznar era un
goberno corrupto, e a realidade é que moitos ministros ou se atopan
encartados ou condenados, que continuou a senda iniciada por los
socialistas con González, unha senda que o ten levado hoxe a ter un
horizonte xudicial a curto prazo, moi complexo; sentou ademais as
bases económicas para que a crise que se nos viña enriba e que os
socialistas no goberno pensaron que facendo como o avestruz, non ía
ter incidencia no país, a tivera aínda maior. As medidas tomadas
sobre urbanismo permitiron a enorme burbulla inmobiliaria e a
política de privatizacións de empresas públicas permitiu que
parecera que a situación económica era boa, pero non era máis que
“pan para hoxe e fame para mañá”, e non falemos do desprestixio
do país a nivel internacional aliándose cos “das Azores”,
poñéndose ó servizo dos EEUU, para meternos nunha guerra,
rexeitada pola ONU e fabricada a base de mentiras, como a existencia
de armas de destrución masiva nos arsenais de Iraq.
Se estes son feitos
obxectivos da etapa de Aznar, Casado segundo as súas declaracións
destes meses enfróntase e non comparte os devezos das mulleres a
acada-la igualdade, así como a todo o que lle cheire a progresismo,
chegou un día a falar do “perigo do comunismo”, nese intento de
recuperar aspectos do neofranquismo sociolóxico máis recalcitrante
que representan personaxes como os que formaron VOX; alenta
modificacións constitucionais e do Código Penal para perseguir os
que defenden o dereito de autodeterminación e o dereito a decidir.
Considera que nos pode
enganar falando de reconstruír esa entelequia que é o “centro
dereita”, superando a Ciudadanos pola dereita?
O “marianismo” deixa
este país nunha situación moi parecida a como o atopou e nalgunhas
cuestións moito peor, por exemplo elevou a débeda o 100 % do PIB,
impagable nunha situación como a actual e que non vai mellorar,
baleirou as arcas da Seguridade Social, aprobou a chamada “lei
mordaza” que reduce xunto ca modificación do Código Penal,
dereitos fundamentais, foi incapaz de dar unha resposta negociada ás
reivindicacións de Cataluña levando as súas institucións a un
enfrontamento ca Administración Central do Estado de moi difícil
solución, no punto en que se ten chegado; aprobou unha Reforma
Laboral complementaria ca do Psoe que deixa @s traballador@s
e os sindicatos sen instrumentos de defensa fronte á patronal;
axudou ó Psoe a modifica-lo artigo 135 da Constitución, ataque sen
precedente ós servizos públicos e servilismo diante da banca
europea.
Pois ben estes dous
“proxectos” foron os que se enfrontaron no congreso, que son
idénticos en materia económica e social e que teñen como obxectivo
seguir defendendo o proxecto de acumulación capitalista para unha
etapa de crise; no fondo é o proxecto reaccionario de determinados
sectores hexemónicos da burguesía. Por iso en todos este tempo os
diferentes candidatos adicáronse a lanzar consignas e “slogans”
prefabricados, pero non falaron en ningún momento de que políticas
económicas e sociais ían levar adiante; se vai producirse creba co
“marianismo” e cal alternativa ó mesmo.
De aceptar a tese de que
había dous proxectos enfrontados, cousa que non acepto, hai que
recoñecer que o congreso do Pp estivo cheo de contradicións e foi
moi confuso; por exemplo a que significa a exaltación de “M.
Rajoy” como o grande presidente que salvou España e a derrota do
continuísmo con esas políticas que representaba Saínz de
Santamaría; neste senso ca súa derrota pódese falar dunha segunda
moción de censura; a propia contradición de querer presentar a
Casado como algo alleo o actual Pp, ocupando como ocupaba, xunto con
algúns do que acompañaban na súa equipa, cargos orgánicos do
mesmo, e as acusacións a Sainz de Santamaría de non terse
involucrado nos problemas do partido nesta difícil etapa; a
fundamental, de gañar quen perdeu cando votaron os militantes ou a
que amosa Javier Maroto cando afirmou despois de coñecerse a vitoria
de Casado de “vamos a construír un proxecto”, recoñecendo que
non o teñen o que me parece grave e antidemocrático, que nin nas
primarias nin no congreso se teña presentado. Farano nun despacho de
costas á militancia ou continuarán a vía “marianista”
salpimentada con algúns toques ideolóxicos do aznarismo máis
reaccionario.
Nada que poida ilusionar
a ningún votante e menos a quen dependa dun salario para poder
vivir; o Pp segue a se-la dereita reaccionaria, que se complementa
moi ben ca dereita progresista que é o Psoe, para ternos engaiolados
na falsa dicotomía de dereita-esquerda.
En Galicia no mes de
xullo de 2018.
No hay comentarios:
Publicar un comentario