Carlos Dafonte
A crise económica non
debe ser para as xentes da esquerda revolucionaria a principal e
única consideración a salientar na situación actual. Esta é un
proceso consubstancial co capitalismo, o seu desenvolvemento a xera,
e sérvelles, ós máis poderosos para concentrar capital, eliminar
competidores e modificar no seu beneficio as condicións de
explotación da forza de traballo.
O que nos debe preocupar
máis e que despois de varios lustros de ataque organizado a nivel
mundial contra os traballadores, sobre todo no centro do sistema
capitalista, é si o que afirmou Trotski no Programa de Transición
aprobado en 1938, de que “a situación política mundial
caracterizábase pola crise histórica da dirección do proletariado”
é hoxe tamén unha realidade, nunha situación na que non hai máis
saída, de acordo ós intereses dos asalariados, que a substitución
do capitalismo por unha nova formación social onde o modo de
produción capitalista non sexa hexemónico.
Naquel intre o
revolucionario soviético referíase a quen tiña a responsabilidade
de dirixi-la revolución mundial, a Internacional Comunista ou III ª
Internacional. organismo que naceu como resultado da visión
política, do traballo e da necesidade que Lenin consideraba para a
extensión da revolución, consideraba inviable a posibilidade do
“socialismo nun só país”; pero Lenin morreu en 1924; hoxe por
non existir un organismo internacional desas características,
podemos afirmar que a incapacidade das forzas revolucionarias para
dar unha resposta organizada á agresión do imperialismo contra os
pobos e @s traballador@s
e como superala, debe ser un dos elementos centrais do análise
da situación política; posiblemente o máis importante. Mentres
non se solucione o problema da dirección política, o capitalismo
terá maiores facilidades para impoñe-los seus criterios e
cargará, como é lóxico nun sistema baseado na explotación, sobre
as costas da forza do traballo os custes de toda crise.
Pola contra, as forzas capitalistas coordínanse, chegan a acordos para actuar a nivel planetario, a traveso de mecanismos, moitos convertidos en institucións, Unión Europea, OTAN, Fondo Monetario Internacional, Banco Mundial, Organización Mundial de Comercio, etc, ou G-8, G-20; neles discuten as súas diferenzas, múltiples contradicións e planifican a economía e a saída da actual crise, no seu exclusivo beneficio.
A crise da dirección
política fai que sindicatos e movementos sociais se atopen nun
“carreiro sen saída”, como amosan, salvo contadas excepcións as
respostas ás medidas do capital, que non son todo o contundentes que
se precisan, nin contan ca perspectiva estratéxica nin ca
coordinación necesaria para que en grandes áreas do planeta se dean
respostas unitarias. Os intentos de coordinación dos análise e das
respostas, os Foros Sociais, sen poder afirmar que foran un total
fracaso, non cubriron as espectativas que levantaran.
Nun segundo termo hai que
destacar, ó tempo que foi avanzando a crise, organismos que foron
moi belixerante, cos países que abandonaran o sistema capitalista,
como a Internacional Socialista, que facían bandeira “doutro
socialismo”e que se consideraban alternativa fronte o proxecto
neoliberal, teñen desaparecido do panorama político, integrada na
esfera deste, e reforzando a capacidade do proxecto neoliberal para
cooptar a aqueles sectores do movemento obreiro onde, os que se fan
chamar socialistas, aínda teñen influenza.
Nun terceiro, a
restauración do capitalismo na antiga URSS, Europa do leste e China,
pon en maior evidencia as contradicións que se xeran dentro do
sistema capitalista, ó tempo que lle restan ó imperialismo
norteamericano a súa capacidade política para dirixi-lo planeta
terra, polo que terá que recorrer ó seu poderío militar para
tentar impor o seu dominio. Nesta perspectiva temos que entende-la
creación de AFRICOM a mediados da década anterior, que por moito
que digan, e o organismo encargado para intervir en todos os países
de África agás Exipto e a revitalización da IVª flota, inoperante
durante moitos anos cuxa actividade oriéntase a área de América
Latina.
E curioso e digno de ser
salientado, o feito que cando a URSS e China dicían querer
construí-lo socialismo tiñan diferenzas que parecían insalvables,
e agora, cando o capitalismo volve a se-lo modo de produción
dominante nas súas formacións sociais, todo indica que as relacións
teñen mellorado.
Se a isto engadímoslle a
necesidade de importantes países como Brasil, India e Suráfrica, a
quen se lles denomina, xunto con outros, co cualificativo de
emerxentes, de facer unha política ó marxe das potencias
imperialistas centrais, explica a aparición do grupo denominado
BRICS, formado por Brasil, Rusia, India, China e Suráfrica, nun
intento de establecer un “imperialismo de baixa intensidade”, que
lles permita solucionar as súas necesidades e penetrar en numerosos
lugares do planeta. Non debemos esquecer que representan ó 42 % da
poboación mundial, o 45% da forza laboral do planeta e o comercio
entre os mesmos, acada un monto de 500.000 millóns de dólares ano
De consolidarse esta
perspectiva, podíase inaugurar a nivel planetario unha nova dinámica
de bloques, onde países como Cuba baixo constante ameaza, ou aqueles
outros que tentan desembarazarse da influencias dos EEUU e os seus
máis fieis aliados, a U.E., poidan integrarse e atopar axudas
pagando uns menores custos, tanto no eido económico, como no
político e social.
Permitirán os USA a
consolidación deste proxecto, onde China, o seu inimigo fundamental
que vai camiño de se converter na primeira potencia económica do
planeta, xoga un papel central?. Sen dúbida tentará por todos os
medios que non sexa así, sobre todo polo que representaría de
consolidarse, para certos países de América Latina, continente que
os ianquis sempre consideraron o seu “patio traseiro”, que
nestes momentos amosan un distanciamento certo respecto das
directrices de Washington, creando o ALBA, como alternativa ós
Tratados de Libre Comercio e a Alianza do Pacífico, que os USA
impoñen e toda outra serie de institucións económicas e
políticas, MERCOSUR, que os imperialistas non controlan, e garanten
a autonomía económica e política dunha parte da rexión respecto
do núcleo central imperialista.
Os USA necesitan impor os
seus criterios no resto do planeta, golpeados por una grande crise
económica que ten importantes repercusións no nivel de vida dos
seus habitantes; entre 2007 e 2010 a renda media caeu un 40%, e a
distancia entre o 1% máis rico e o resto da poboación fíxose
maior; ten unha débeda pública do 120% do PIB, máis de 16.699
billóns de $. da que un 37 % atópase en mans de países
estranxeiros, sobre todo China e Xapón. Como se coñeceu en días
pasados, o debate sobre subir ou non o teito da débeda, en 1,1
billóns de $, mantivo en vilo á economía mundial, pois de non
facerse, non poderían pagar os vencementos, se declararía en
bancarrota, o que significaría o inicio dunha nova recesión
mundial.
Polo tanto a primeira
potencia militar do mundo necesita seguir roubando a maior parte da
plusvalía que producen os traballadores do planeta, para seguir
mantendo tamén o seu “status” de primeira potencia económica o
que vai abrir toda unha serie de enfrontamentos, a maior parte das
veces non directos, con quen lle disputan ese “status”. Necesita
seguir a ser o país refuxio para a maior parte do capital mundial,
procedente moitas veces de negocios ilegais como o narcotráfico,
venda de armas, etc., que lle permite paga-los intereses da súa
débeda.
Mante-lo seu status de
potencia económica levoulle ás constantes intervencións nos
territorios do próximo e medio oriente, onde se atopan fontes de
enerxía moi importantes, comezando polo apoio ó xendarme da zona,
Israel e continuando pola xa afastada intervención en Afganistán,
para desaloxar os gobernos de corte comunista. Para levalo a cabo
financiou e prestou apoio político e loxístico ó movemento
muhaidís formado por miles de islamistas fanatizados procedentes
tamén dos máis diversos lugares, pero que unha vez expulsados os
“pro-soviéticos”, a pesares da intervención ó seu favor da
URSS, volveron para os seus países e constituíron os núcleos
principais do islamismo máis intransixente, que comezou a
organizarse e crear problemas, aínda que sexa un paradoxo, a aqueles
gobernos que os USA apoiaban.
Produciuse máis tarde ó
apoio a Sadam Houssein na guerra Iraq-Irán e as “garantías” ó
primeiro, recibidas da embaixadora norteamericana, para intervir en
Kuwait sen consecuencias, retiradas no momento da invasión do
pequeno territorio, o que deu lugar ás dúas guerras do golfo e a
partires do 2001, a invasión de Afganistán.
Outro trazo a subliñar,
son a dificultade que teñen as rebelións producidas no norte de
África e países árabes, onde as clases populares derrubaron a
gobernos monicreques do imperialismo, para consolidar réximes
democráticos, onde non se conculquen sistematicamente os dereitos
humanos, pola estratexia do capital de impedir que os pobos sexan
donos do seu destino e seguir a mante-lo seu dominio o que converte a
eses países, en focos de permanentes conflitos sociais.
A intervención directa
en Libia da OTAN, cuxas consecuencias, a fragmentación do poder, o
fortalecemento de sectores islamistas radicais, o estrago de
numerosas forzas produtivas, conduce a un futuro cheo de imprevistos
o que obriga ó imperialismo a pensar mellor a súa intervención en
Siria. Sería interesante analizar como o afianzamento do islamismo
na costa sur do Mediterràneo, axuda a implantación do mesmo no
Sahel, a fronteira sur do deserto do Sahara; a condenable
intervención francesa en Malí ten moito que ver con este desorde
que eles mesmos introducen.
Tampouco debemos esquecer
con relación a este tema, que despois da descolonización do
continente africano, o imperialismo apostou polo islamismo para
contrarresta-las tendencias socialistas e panarabistas que xurdiron.
Destacaría outra
característica da nova situación mundial que se ten valorado pouco,
que ten moito que ver ca crise e que afecta a clases intermedias
entre a burguesía e o proletariado; refírome ó proceso de
proletarización que se está a producir a nivel mundial que leva a
contra as teorías que falan da desaparición da clase obreira. Son
centos os millóns de campesiños, chineses, da India, Bangla Desh,
Brasil, etc, os que nas últimas décadas, e sobre todo na última,
deixaron de pasar fame e penurias cultivando a terra e se
incorporaron, nos cintos urbanos, en condicións moi precarias, como
forza de traballo asalariada. Nesta nova condición, segundo vaian
adquirindo conciencia, van protagonizar importantes loitas nos seus
países. No ano pasado producíronse en China máis de duascentas mil
folgas con motivo de reivindicacións de carácter laboral esixindo
melloras nas condicións de traballo e salariais. De consolidarse
este proceso, en numerosos países, onde empresas do centro do
sistema capitalista foron deslocalizadas, se pode dar lugar, en
poucos anos, a modificacións importantes na estrutura do traballo.
A INESTABILIDADE DA UNIÓN
EUROPEA
Da Unión Europea
destacaremos os seguintes trazos que cada vez máis nos aproximan ó
modelo norteamericano de explotación, posible pola ditadura que o
capital exerce a traveso dos dous partidos, o demócrata e o
republicano, sendo moi cativas as posibilidades de que se abra camiño
unha alternativa; en primeiro lugar a desaparición das garantías da
antiga democracia burguesa, que ten tres vertentes salientables,
todas elas xustificadas polos representantes da clase dominante, na
existencia dunha fonda e prolongada crise. A primeira consiste no
traslado do poder de decisión a institucións non elixidas polos
cidadáns e sobre as que teñen unha grande influenza o que se coñece
como os “mercados”, eufemismo do poder financeiro, permanecendo
nembargantes, activas institucións nacionais que se podían
considerar innecesarias, adicadas a aplicar as medidas que se toman
fora dun xeito antidemocrático. A segunda o ataque á lexislación
laboral e social específica, para facer desaparecer numerosos
dereitos, que na UE parecían consolidados e inamovibles, aumentando
así o grao de explotación da forza de traballo; a terceira as
modificacións que os partidos no poder en cada estado, diante das
protestas da cidadanía, polas novas condicións ás que se lles
somete, levan a cabo na lexislación punitiva para afoga-lo dereito
de protesta. Isto tradúcese nunha perda de numerosos dereitos
políticos e democráticos, incluso dereitos humanos, como se a
cidadanía fose culpable da crise e non tivese dereito a ningún tipo
de protesta. Non hai que esquecer que un dos argumentos máis
utilizados pola clase dominante é o de “vivíamos por enriba das
nosas posibilidades”, como causa da crise. Argumento
insuficientemente combatido polos sectores da esquerda.
En segundo lugar, parece
como se a crise unificara os criterios das oligarquías mais
importantes da UE, que se situaron todas na liña que marca a alemá
a favor das políticas de loita contra o déficit público e de
austeridade. Moi desesperadas e sen moitas perspectivas de saír da
crise deben ter cando todas apostan por poñer en marcha en primeiro
lugar a “locomotora alemá”, acosada pola febleza dos seus bancos
que de non recupera-lo prestado poderían quebrar, e o amparo da
mesma inicia-lo seu proceso de recuperación económica.
Neste senso as próximas
eleccións o Parlamento Europeo, non teñen sentido algún, pois se
algo debemos aprender do que estamos a vivir é que cando se
manifesta a tendencia á caída da taxa de ganancia e a crise afoga,
para as oligarquías non existe democracia algunha, paralízanse as
institucións, leis, directivas etc e impóñense os seus criterios
por enriba de calquera outro obxectivo.
En terceiro, estanse a
senta-los alicerces para a UE a dúas velocidades, a do norte,
formada por Alemaña e os seus satélites con Francia e Gran Bretaña
e a U.E. dos rescatados e algún país máis.
En cuarto, é necesario
salientar os avances da extrema dereita en case todos os países da
área, con boas perspectivas electorais para as próximas eleccións
europeas, consecuencia da integración da socialdemocracia e partidos
ecoloxistas, como os verdes alemás, no proxecto neoliberal, a
incapacidade da esquerda para redefinir un novo proxecto e o
“trasvestismo político-ideolóxico” dunha parte da mesma.
Estamos a falar da dereita racista e xenófoba, que coincide con
moitas das medidas tomadas pola dereita conservadora e a antiga
socialdemocracia cando chega ó poder, polo que os campos dentro da
dereita perden as fronteiras o que posibilita que os seus argumentos
cada vez gañen máis adeptos na sociedade.
Nos estados onde a clase
obreira tivo unha actitude máis opositora e combativa, comezan a
aparecer as primeiras organizacións de carácter nazi-fascista, caso
de Grecia, pero van ter pouco percorrido, polo de agora, posto que a
clase obreira non está en condicións de disputarlle o poder á
burguesía. Se esta condición se dera, a “democrática U.E.”
vería aparecer de novo o nazi-fascismo, financiado, como sempre
polos grandes grupos económicos. Non esquezamos que naceron para
defende-lo capital e non son outra cousa, como o franquismo, un
estado de excepción permanente dentro do sistema capitalista.
Como consecuencia de todo
o anterior aparece un novo trazo da situación, a perda de apoio do
sistema democrático burgués por parte de sectores importantes da
sociedade e a baixa consideración que a cidadanía ten dos políticos
e das organizacións de todo tipo, sindicais, políticas, etc., polo
que cada vez é máis importante situar nun primeiro plano a
necesidade de que debe solucionarse, canto antes mellor, a crise na dirección do
proletariado.
En Galicia no mes de
outubro de 2013
No hay comentarios:
Publicar un comentario