Roberto Laxe
O goberno,
asustado ante a reacción social que podería provocar o anunciado “tarifazo” do
11% no prezo da electricidade, sumado ao 63% desde o comezo da crise, decidiu
anulalo. O goberno da liberalización total da economía para “saír da crise”
fíxose intervencionista anulando a poxa do 19 de decembro, e impuxo por decreto
un prezo notablemente inferior, o 2.3% no trimestre.
Nesa decisión
influíu o que remata o período de “graza” electoral que o PP tivo estes dous
anos. En 2014 son as eleccións europeas, un verdadeiro referendo das políticas
de recorte e axuste, e no 2015 son as municipais, onde este referendo pódese
concretar na perdida de poder de concellos e deputacións.
Neste cadro electoralista hai un transfondo de crise dun sistema de produción e distribución da enerxía eléctrica oligopólico, que esta controlado por cinco grandes compañías: Endesa, Iberdrola, Gasnatural/Fenosa, HC Energia e E.On, profundamente interrelacionadas cos grandes bancos (BBVA, Caixabank, BSCH) e nun 50% en mans de capital non español, a italiana ENEL controla Endesa, E.On é alemá e HC Enerxía hoxe está en mans chinesas.
O déficit
tarifario, chispazo do “tarifazo”
Este mercado tan
concentrado foi posto patas para arriba pola aparición das enerxías renovables
(eólica, solar,...) e novas formas de xeración de enerxía (os ciclos
combinados), que as obrigou a uns fortes investimentos que ou contaban co aval
e respaldo do estado, ou estaban chamadas a ser inviables: o viejísimo método
de “socializar” os costes e privatizar os beneficios.
A orixe do
déficit tarifario ten que ver co mecanismo establecido en 1997 por Rato para
subvencionalas, adiando o pago e a recuperación dos investimentos realizados de
maneira que as empresas non o repercutisen na tarifa “liberalizada”, a que vai
a poxa, senón trasladándoo á parte “regulada” da tarifa, controlable polo
goberno de quenda; é dicir, a que procede de subvencións e primas, establecidas
polo estado por “paróns nucleares”, subvención ao carbón, investimentos
abortados como os plans eólicos (en Galiza foi un desastre financeiro a
anulación polo PP do Plan Eólico do Bipartito), etc., e que se socializan a
través dos Orzamentos Xerais do Estado.
Pero que se
aprace un pago non quere dicir que non sexa parte do prezo, como a parte
aprazada dunha hipoteca é parte do prezo total da vivenda. Por iso, para a
industria a pinga que colmou o vaso foi a negativa de Montoro a pagarlles as
cotas correspondentes para este trimestre, cifrado en 3600 millóns. Ante esta
negativa, as empresas reaccionaron repercutindo na tarifa “liberalizada” o que
Montoro negáballes pola vía da parte “regulada”, de aí a subida do 11%.
Non é que
Montoro volveuse favorable aos intereses da poboación, iso nunca, dous días
antes rexeitaran a proposta de Esquerda Plural de moratoria ante os cortes de
luz por falta de pagamento de familias traballadoras; senón que as contas non
saían: o déficit publico en novembro xa estaba por cima das previsións do
goberno para todo o ano, e deste control do déficit teñen que responder ante a
Unión Europea e a Troika. Nesta liña, leste mesmo ano aprobaran unha lei que
impedía que o déficit tarifario superase o 2%, atando de pés e mans ao goberno.
Expropiación e
nacionalización
A electricidade
é no século XXI un ben de primeira necesidade que non pode estar ao albur
dunhas poxas nas que as empresas produtoras e distribuidoras, xunto con fondos
de investimento e especuladores varios, xogan cos seus prezos. O goberno non
ten a menor intención de controlar estas manobras, o que discuten mesmo desde
sectores “críticos” da sociedade é como perfeccionar o sistema irracional do
mercado, non acabar con ele. Se agora interviron, non é que a Montoro ou o
ministro Soria importáselles a subida -á fin e ao cabo, eles mesmos e moitos
dos seus colegas pasaron pola “porta xiratoria” da industria eléctrica-, senón
por medo ao estalido social.
O “tarifazo”, e
os que poidan vir, son produto da liberalización dos prezos, que caen sobre os
mermados ingresos da clase traballadora, polo que se impón a esixencia da
conxelación dos prezos e a moratoria inmediata dos cortes de luz por falta de
pagamento dunhas tarifas que nos últimos anos subiron un 63%.
A poboación non
ten a menor responsabilidade destas políticas neoliberais que só provocou
débeda e déficit; ante isto, é preciso garantir o acceso a este ben de primeira
necesidade ao seu custo real, e non o especulativo, expropiando e
nacionalización baixo control dos traballadores e as traballadoras da industria
eléctrica.
O goberno
“tremou” ante a reacción social, e pretendeu adiantárselle: é hora de que o
susto pase á realidade coa mobilización social da poboación traballadora.
A “porta
xiratoria” é o estado burgués
Desde hai algún
tempo vén falando da “porta giratoria” entre os políticos e a empresa privada,
coas eléctricas e os bancos á cabeza, con ministros e presidentes do goberno
pasando aos consellos de administración daquelas, con chans millonarios.
A lista é
interminable; en Endesa atopamos a Aznar, Elena Salgado, Miguel Roca, Luís de
Guindos, agora ministro, Pio Cabanillas fillo, Martín Vila; en Iberdrola a
Angel Acebes, Ramón de Miguel, exsecretario de Estado de Política Exterior; en
GasNatural/Fenosa a Felipe González, Narcis Serra; na italiana ENEL (Endesa) a
Pedro Asubiar, etc., etc.
Amplos sectores
da esquerda sorpréndense desta interrelación estado/goberno e empresa privada,
posto que ven nas institucións organismos situados por encima das clases,
supostamente neutrais; e ven esta “porta xiratoria” como un síntoma de
corrupción do estado democrático. Pero para un marxista a “porta xiratoria” é a
quintaesencia do estado burgués, democrático ou non.
O estado, as
súas institucións como o goberno, son aparellos creados polo sistema para a
defensa dos seus intereses, sexa como “grupo de home armados” sexa como “comité
central” da burguesía. Das categorías marxistas, a que mellor define esta
“porta xiratoria” é a de “consello de administración do capital”; así, se
durante unha lexislatura uno foi membro dese “consello de administración”, que
ten de estraño que cando o deixe, pase a outro “consello de administración”. É
coma se a un piloto militar criticáseselle o seu paso á privada, cando a
esencia da súa profesión é ser piloto, na civil ou na militar.
Por iso, medidas
como as “control” da porta giratoria desvían o problema de fondo; vaian na
dirección que vaian, eses Sres. e Sras son representantes dunha clase social
concreta, a burguesía, e actúan como tales. Fronte á “porta xiratoria” só cabe
a expropiación e a nacionalización baixo control dos traballadores e
traballadoras.
Na Galiza no mes de xaneiro de 2014
No hay comentarios:
Publicar un comentario