Carlos Dafonte
A celebración estes días pasados do “ Cumio dos Países do Mediterráneo” en
Barcelona, para falar entre outras cuestións do terrorismo practicado por
algunhas organizacións de musulmáns radicais nos territorios onde se fixeron
fortes e o perigo que para as sociedades de Europa representan, serve de marco
para facer toda unha serie de consideracións sobre o problema.
En primeiro lugar, a contradición que se desprende de determinadas
políticas de países e organizacións europeas no espazo da ribeira sur do
Mediterráneo e Oriente Próximo e Medio, que hoxe se xuntan en Barcelona para
combater algo, cando son as súas propias actuacións as que provocan o problema
que despois din combater. En segundo, a
inexistencia dunha análise fonda, dunha autocrítica, sobre os erros cometidos
en moitas das actuacións dos imperialistas europeos representados pola UE, que levaron ó pulo do que hoxe se quere
erradicar en zonas onde, estaba perfectamente controlado, por exemplo Iraq,
Siria e Libia.
Poñamos un exemplo. A intervención da OTAN e a UE en Libia, que tivo como consecuencia a desaparición do réxime existente e o asasinato do presidente, o coronel Gadafi, fíxose en nome da implantación dos dereitos humanos que segundo a alianza militar o réxime conculcaba, para levar a democracia e acada-la estabilidade interna que a acción do réxime estaba a poñer, ca súas actuacións, en perigo nunha zona moi sensible de África e fronteira sur da Unión Europea.
Zona sensible si que o é, agora máis que antes, pois en Tunisia e
Exipto leváranse a cabo rebelións populares contra ditaduras que, de resultados
incertos polo de agora, significaron a queda dos ditadores, algo que a tod@s
nos debe alegrar, pero que si a saída a curto prazo do proceso non é a apertura
dunha etapa onde a xente se poda expresar e se avance na consecución de todo
tipo de dereitos, o islamismo radical, pode gañar adeptos, ser a alternativa
para a frustración; na Alxeria hai poucos anos que finalizou unha sanguenta
guerra civil, iniciada pola incapacidade do réxime deturpador dos principios da
revolución contra o dominio colonial de Francia, de asumi-la súa derrota e non
permitir que nunhas eleccións limpas e democráticas, o FIS acadara o dominio
das institucións que os votos lle deran.
Polo tanto debía ser lóxico esperar, que a agresión contra Libia ía
poñer en evidencia toda unha serie de contradicións internas, comezando pola
tribal, a existente entre a zona de Tripolitania e a Cirenaica, e outra
chamémoslle ideolóxica a que enfronta os restos da ideoloxía do panarabismo co
islamismo, creando un longo período inestabilidade; e sobre estas contradicións
actúan diferentes “potencias rexionais, Siria e Alxeria por un lado e Arabia
Saudita e Qatar por outro como axentes principais, ó marxe do que podan
considerar Tunisia e Exipto de trunfa-lo islamismo radical”.
A situación de desmembramento territorial de Libia, de multiplicidade
de poderes, de actuacións de numerosas milicias, de consolidación de diferentes
ramas do radicalismo e a integración de algunhas no Estado Islámico, é hoxe o
elemento fundamental de inestabilidade da zona. Así como quen vai aproveita-la
grande riqueza petroleira que ten o territorio. Que os obxectivos que dicía ter
como obxectivo a UE non se acadaron, deba valer como mostra, de que a coalición
a quen apoia dentro de Libia está acusada por diferentes organismos
internacionais, entre outros Amnistía Internacional, de conculcar
sistematicamente os dereitos humanos chegando incluso a ser acusada de “crimes
contra a humanidade”. Como dixo algún analista sobre estes feitos, “grazas a
intervención humanitaria da OTAN e a UE, Libia deixou de se-lo país co nivel económico
e social máis alto de África”.
Todas estas circunstancias, tendo os medios e grupos de expertos que
teñen, non as estudaron os “hábiles” políticos da OTAN, co ex-presidente de
Francia, Sarkosy á fronte, cuxa campaña electoral fora pagada con cartos libios,
e viron, pola contra, a necesidade de desestabilizar e poñer fin a un réxime
que era un firme bastión na loita contra o integrismo islámico, moitas veces
hai que recoñecelo, utilizando métodos que conculcaban os dereitos humanos, sen
considerar as consecuencias dunha intervención como a levada a cabo, que se
concretou nun pacto cunha feble oposición e apoio a grupos integristas algúns
claramente ligados a Al Qaeda. Pacto e apoio que se traduciu en importantes
axudas en cartos, armamento e apoio loxístico e político, que unha vez
desmembrado o réxime, converteuse nun panorama que non só trouxo o caos ó pais,
senón a todo o seu entorno comprendida tamén a rexión do Sahel, o sur do
deserto do Sahara, onde Francia segue a exercer o seu papel neocolonial ca
axuda do estado español.
A preocupación na zona subsahariana é máxima como quedou amosado na
Conferencia celebrada en Nouakchott en decembro de 2014 na que participaron
Mauritania, Burkina Fasso, Malí, Niger e Chad, para trata-la situación de Libia
considerado un santuario yihadista cada vez máis ameazante. Ou no Foro
Internacional sobre a Paz e a Seguridade en África celebrado en Dakar onde os
presidentes de Chad, Malí e Senegal, pediron ós países occidentais que
“finalizaran o traballo” en Libia, convertida nunha ameaza para o Sahel. Os
presidentes destes tres países foron moi duros cos dirixentes dos países
europeos, ca OTAN e a ONU, sobre todo Idriss Deby, un presidente a quen Francia
mantén no posto, que afirmou que “os conflitos actuais naceron en 2011, cando
os nosos amigos europeos e occidentais atacaron Libia sen pedir a nosa opinión.
E tampouco cando partiron o Sudán en dous” ou “ningún exército africano pode ir
a mata-los terroristas. A solución atópase en mans da OTAN que creou o desorde
e ten que elimina-los terroristas. Libia converteuse nunha cova de todos os
bandidos. Si se quere resolve-los problemas do Sahara hai que resolve-la
cuestión libia. E corresponde os nosos amigos occidentais atopa-la solución”.
Criticou moi duramente a Francia e o Reino Unido e as Nacións Unidas que tamén
dixo, “son responsables posto que deron
o aval”
Por iso supoño que en boa lóxica, habería que levar adiante en
Barcelona unha reflexión sobre o acontecido en Libia e tamén unha autocrítica
por parte daqueles países involucrados e responsables do caos no que hoxe se
atopa mergullado o país. Pero sería
tamén moi san que o presidente naqueles momentos, Rodríguez Z, a súa Ministra
de Defensa, Carma Chacón e o partido que apoiaba o goberno, o PSOE, así como
todos os que atopándose na oposición apoiaron a intervención armada, con grande
espírito guerreiro e redentor, corresponsables de esnaquizar un país tan
importante da fronteira sur da UE, que xogaba un papel xeoestratéxico
fundamental de tránsito entre o Mediterráneo e a zona que bordea o Sahara,
dixeran algo, que non miren para outro lado como si con eles non fora o
problema, como se non tiveran responsabilidade algunha en que hoxe o chamado
Estado Islámico, ese enxendro que non se coñece moi ben quen o crea e financia,
son as noticias que saen nos medios, se
atope instalado en Libia.
En Galicia no mes de abril de 2015
No hay comentarios:
Publicar un comentario