Carlos Dafonte
O estado español é un
caso asombroso; desde que morreu o ditador tivemos vixentes cinco
leis de educación, outras dúas, elaboradas e aprobadas pola UCD no
ano 1980 e polo PP na segunda etapa de Aznar, non entraron en vigor
por ser recorrida a primeira diante do Tribunal Constitucional e
necesitar fondas modificacións que a vitoria do PSOE deixou en
suspenso, e a segunda derrogada polo PSOE cando gañou as eleccións
no 2004. Outra máis a LOMCE (Lei Orgánica para a Mellora da
Calidade Educativa), se abate como unha ameaza sobre toda a mocidade
e sobre a sociedade en xeral..
Fagamos un repaso de
toda esta lexislación. En 1970, no tardofranquismo, etapa na que a
represión era cotiá e moi violenta, sendo ministro Villar Palasí,
apróbase a “Lei Xeral de Educación e Financiamento da Reforma
Educativa”, que entre outros aspectos, aprobaba a ensinanza
obrigatoria ata os 14 anos, establecendo a Ensinanza Xeral Básica de
oito anos, finalizada esta o alumn@ podía escoller entre o
Bacharelato (BUP) de tres anos ou a Formación Profesional (FP); unha
vez finalizado o bacharelato, para accede-la Universidade realizábase
o Curso de Orientación Universitaria (COU).
Despois das eleccións xerais do ano 1977, que lle deron o trunfo á UCD de Adolfo Suárez, continuou vixente ata a fin do seu mandato pois a aprobación da LOECE en 1980, e as vicisitudes posteriores non lle permitiron entrar en vigor. En 1985 gobernando o PSOE apróbase a LODE, que entre outras “perlas” establece os colexios concertados, unha das grande concesións dos “progresistas” á igrexa. En 1990 o goberno do PSOE aproba a LOGSE e en 1995 un goberno do mesmo signo, aproba a coñecida como LOPEG, que abría as portas da privatización do ensino.
Neste senso hai que
salientar que os poderes económicos utilizaron o PSOE para abrir as
portas á privatización de servizos públicos tan importantes como o
ensino e a sanidade; sobre esta última non debemos esquecer as
medidas tomadas polo PSOE en 1991 que culminan ca lei 15/97 de “Novas
Formas de Xestión” en tempos de Aznar, á que os chamados
“socialistas” deron o seu apoio.
No ano 2002, o goberno de
Aznar aproba a LOCE, que non chegou a entrar en vigor pois foi
derrogada polo primeiro goberno de Rodríguez e no 2006 aprobase a
LOE, que será lembrada sobre todo por introduci-la materia de
“Educación para a Cidadanía”, que levantou numerosas críticas
no ultracatolicismo, os sectores máis retrógrados da Igrexa e
serviulle ó PP como ariete contra o goberno. Gobernos, todo hai que
dicilo, dos máis sometidos ós intereses da institución relixiosa.
Esta lei tamén recibiu a
crítica polo que se consideraba unha rebaixa nas esixencias @s
alumn@s ó pasar de curso
con materias suspensas. Esta nova lei derrogaba as dos anos 70, 90,
94, 95 e 2002.
E agora temos a LOMCE
pulada polo ministro Wert, que do mesmo xeito que a lei sobre o
aborto, promovida polo ministro Gallardón, parecen o pago que lle
fai o PP a Igrexa presidida por Rouco Varela, polo apoio ó partido e
polas mobilizacións convocadas, que como un partido político máis,
levaron a cabo para desgastar ó goberno anterior.
Pero ó marxe desas
consideracións debiámonos preguntar que ocorre neste estado para
ter tan grande cantidade de Leis sobre a Educación e converternos
nun caso singular que induce ó asombro dentro, cando menos, da Unión
Europea.
AS CONTRADICCIÓNS QUE
ACTÚAN SOBRE O ENSINO NO ESTADO ESPAÑOL.
Creo que entre outras,
hai tres fundamentais: En primeiro lugar as contradicións
propias dunha sociedade dividida en clase sociais, que descarta a
igualdade de oportunidades. Alguén podía pensar que nunha situación
caracterizada por un ataque sistemático contra os dereitos e modo de
vida dos asalariados, non tería a súa correspondencia na educación?
Que as sucesivas reformas laborais non se reflictirían no xeito de
organiza-lo estudo e as necesidades da patronal?. Non debemos ser
inxenuos, baixo o capitalismo todas as leis son clasistas, é dicir,
benefician a unha clase, a burguesía ou sectores e capas da mesma e
a súa aplicación vai contra os intereses das demais, aínda que
algunhas veces ese carácter é difícil de detectar.
A LOMCE, como non podía
ser doutro xeito por ser redactada pola dereita conservadora,
descarta formar xente libre, críticos co sistema e tenta prepara-los
mozas e mozos do futuro para aceptar as novas condicións de
contratación e explotación da forza de traballo que se están a
impoñer; non só no estado español, pois a reestructuración
capitalista que se está a levar a cabo, lle vai facer xogar un papel
cada vez máis periférico e o centro, Alemaña e os seus aliados,
van necesitar man de obra barata, especializada e sometida.. O que
queren son especialistas sen moitas ideas na cabeza, que se deixen
explotar mansamente, que acepten as súa condición de vida como algo
“normal”, que están dentro do que “debe ser”, que non poña
en cuestión nin as condicións na que viven nin os alicerces sobre
os que se atopa a sociedade capitalista. Sabemos desde hai moito
tempo o papel que queren que xogue e xoga, o Ensino no rol de
construi-la “mentalidade sometida”, polo tanto era o esperado;
ninguén con certas luces débese sorprender.
Unha segunda
contradición, dentro do marco da anterior, é a xerada polo
enfrontamento entre “progresismo” e “conservadurismo”, dous
pensamentos que atinxen a dous sectores da burguesía, que se fai
patente desde mediados do século XIX, toma maior pulo no XX e ten a
súa culminación no período da IIª República.
A Igrexa tivo o monopolio
da educación que lle permitía moldea-las mentes para o servizo da
casta dominante, e ter unha fonte saneada de ingresos, e loitou con
todos os seus medios contra as alternativas que xurdiron, como foi a
Escola Nova do pedagogo de fama universal Ferrer i Guardia, que foi
fusilado despois dos sucesos da coñecida como “semana tráxica de
Barcelona” en 1909, a quen a Igrexa acusou de ser o causante da
mentalidade dos revoltosos, ou contra a Institución Libre de
Ensinanza que nace uns anos máis tarde con Giner á cabeza.
Non debemos de esquecer
que o Conde de Romanones, que non era moi “vermello”, nunha das
súas etapas como ministro de educación, xa tivo problemas ca Igrexa
a causa da relixión na escola.
Pero o máximo
enfrontamento produciuse cando os republicanos no poder a partires de
1931, tentan facer unha escola laica, que integrase a nenos e nenas,
creando un corpo de mestres, sobre o que se abateu, unha vez
terminada a guerra civil, unha brutal represión ca anuencia
eclesiástica, que viu na derrota republicana, o trunfo dos seus
espurios intereses e gozou de múltiples privilexios ca implantación
do nacional-catolicismo, ideoloxía aínda moi presente na vida
política actual.
A terceira é a
que enfronta ó nacionalismo centralista ca peculiaridade, nunca
aceptada, de que o estado español é un estado multinacional, onde
existen tres nacións sen estado, Galicia, País Vasco e Cataluña,
que non gozan de dereito de autodeterminación, dentro da
constitución; esta contradición expresouna moi ben o ministro Wert
cando afirmou que entre outras cousas, a súa lei tiña como
obxectivo “españoliza-l@s alumn@s
cataláns”, pero o mesmo, seguro que o pensa dos vascos e galegos.
O que se traduce, entre outras cousas, nun ataque as linguas
propias, como cando son relegadas dentro dos diferentes grupos de
materias, troncais, especificas e especialidades, a esta última
categoría, con horarios reducidos e non avaliables en probas
estatais. Pero tamén do estudo da historia propia, etc
Polo tanto, o tema de
poñer fin á democracia interna nos centros impoñendo a figura dun
director non elixido pola comunidade educativa e marxinar a esta, ten
moito que ver ca propia lei de seguridade, ó crear unha autoridade
conectada co goberno que actúe sen contemplacións contra a
comunidade escolar cando proteste sobre toda unha serie de medidas
que se van tomar, como pode ser o de seguir avanzando na
privatización do sector. A segregación que se vai dar nas aulas,
agrupando ós alumn@s con
dificultades, pero non ós que non queiran estudar, que non permiten
moitas veces o desenvolvemento normal da actividade, dos que si
queren. Acepta-la separación por sexos a pesares da sentencia do
Tribunal Supremo ó respecto. A perda de horas de Historia da
Filosofía e a desaparición de Ciencias do Mundo Contemporáneo e
Educación para a Cidadanía. A imposición das reválidas ó final
das diferentes etapas e a necesidade de superalas para obte-lo
título, que como afirma Aguilera Mochón, non van valorar o que o
Proxecto de Lei di tentar conseguir, como a “autonomía persoal, o
pensamento crítico, o desenvolvemento de potencialidades, a
dedicación, o esforzo”, que sabemos que non pode facer unha proba
puntual e aínda menos outros aspectos como os que teñen que ver ca
diversidade, diferencias culturais e sociais dos alumnos; pero as
reválidas tampouco van detectar problemas educativos en alumn@s
capaces de superar exames nos que unicamente valóranse determinados
coñecementos; pola contra a existencia de reválidas pode determinar
o proceso educativo cara a súa superación o que vai traer consigo é
que aquelas materias que non se van a avaliar, se convertan no que se
chaman vulgarmente “marías” etc.. Son cuestións que indican un
talante conservador en certos aspectos retrógrado do partido
gobernante, polo que é de esperar que cando entre a gobernar a
“alternancia”, o PSOE, se antes non fomos capaces de acabar con
ambos, vexamos como imos ver outra nova lei.
O tema fundamental é dar
resposta a esta pregunta. Se o PP e o PSOE teñen pactado nun 98%
todas as leis vixentes no estado, cales son as razóns para que non
se poñan de acordo nunha lei de educación e xogar así os dous
partidos maioritarios con algo fundamental para a poboación e o seu
futuro?.
Creo que actúan dese
xeito por ser uns irresponsables, que escolleron o tema educativo, e
algún outro como o do aborto, para escenificar as súas diferenzas
e manter esa falsidade da existencia dunha dereita e unha esquerda; é
dicir, fomenta-lo bipartidismo, cando as diferenzas hai que buscalas
entre o que quere dicir unha dereita conservadora e unha dereita
progresista, algo moi distinto.
A realidade é que si no
estado existira unha esquerda anticapitalista forte, capaz de
presentar un proxecto educativo con ese carácter, de impo-lo seu
debate na sociedade, PP e PSOE tamén neste campo, chegarían a
acordos.
En Galicia no mes de
marzo de 2014
No hay comentarios:
Publicar un comentario