Roberto
Laxe
Feijoo,
tentando barrer para a súa casa, ironizou coa presenza do ex Xefe do Estado
Maior na listaxe de Podemos -se non me equivoco, non falamos dun xeneral de a
pé, senón o terceiro na cadea de mando do exercito no seu momento: primeiro, o
rei, segundo, o ministro de defensa, terceiro, o Xefe do Estado Maior- ,
dicindo "benvidos a España", referíndose, obviamente, a ANOVA e a
Beiras, no concreto.
Feijoo
fai ben en sacar a relucir as incongruencias da organización que, cando se
constituíu AGE, situou o problema político no centro: Beiras foi o primeiro
político institucional que recoñeceu a situación de "emerxencia social e
nacional", e chamou á ruptura co réxime do 78. Para iso, e utilizando a
Castelao e Bóveda, fronte ás criticas que lle fixeron desde o BNG, argumentou
que nunha situación de "emerxencia", eles tamén pactaron coa Fronte
Popular do Estado Español.
Fai pouco, nunha entrevista feita en Catalunya reafirmábase nesta liña, dicindo que se vivira en Catalunya votaría ás CUP.
Ate aquí,
e dentro das diferenzas, todo correcto... Entón que demo fai
"avalando" unha candidatura que acepta a OTAN, que respecta as bases
ianquis, que admite a educación "concertada", que non cuestiona a
relixión nas aulas, que leva meses manobrando para evitar que na Galiza houbera
unha candidatura de esquerdas, ... Que xa non fala nin do réxime nin da
monarquía.
É moi
difícil entender que toda a teoría que deu orixe a AGE, apoiada en Castelao e
Boveda, dera como resultado un pacto cunha organización do réxime como é
Podemos.
Onde
queda a situación de "emerxencia social e nacional", onde queda a
ruptura co réxime, onde queda o voto ás CUP,... Que pasa, amigos e amigas de
ANOVA; que pasa amigo Beiras, Galiza non ten dereito a ter unha organización
rupturista, anticapitalista?
A
candidatura promocionada por IuP, aínda que o BNG defenda a ruptura co Réxime,
faino, como diría o outro, "os dias de festa"; porque o seu
verdadeiro eixo é o do "grupo parlamentar" que agrupe a sectores da
dereita burguesa galega (Coalición Galega, Terra Galega, e, ate un punto
Compromiso por Galiza), nun acordo nacional sen un sentido anticapitalista,
senón só nacional.
Esta
candidatura non resposta aos interese da clase traballadora, senón a pon ao
servizo de esos sectores da burguesía galega cara a conseguir un
"lobbi" de presión no parlamento que saía das eleccións do 20D. Non
ten no seu ADN a loita independente da clase traballadora, senón que esta
subordinase a eses interese, que lle son alleos e contraditorios: a burguesía
galega, aínda que sexa nacionalista, non deixa de seren propietarios de medios
de produción, o que inclúe a forza de traballo contratada por eles.
Isto
supón poñer á CIG, a organización sindical mais combativa da Galiza, ao carón
de burgueses como os de Coalición Galega, Terra Galega ou Compromiso por
Galiza, para construír umha nazón... Burguesa ou obreira. Que nazón queren
construír?
Nesta tesitura,
a clase traballadora galega, como ven sendo desde fai moito anos, fica orfa de
organización política: uns pactando con versión PSOE.2, tan centralista como
el, outros, pactando con burgueses galegos incapaces de recoñecer que só
rompendo con "España" pódense desenvolver como clase dominante.
Nesta
tesitura, os que consideren que existe unha terceira vía ha que xuntarse para
retomar o fío vermello das experiencias da loita obreira galega (e
internacional), do 72 e das folgas da transición; das 11 folgas xerais de estes
anos de “Réxime do 78”, das loitas estudantís contra a LOU ou Nunca Máis. Que
parta do feito de que na Galiza o 70% da súa poboaciòn activa é asalariada, son
obreiros e obreiras, traballadores do naval e o metal, do mar, do comercio e a
administración publica, da téxtil e da madeira... e que como clase teñen os
seus interese propios, diferentes dos ex Xefes do Estado Maior e dos burgueses
galegos, e unha alternativa propia, o anticapitalismo e o socialismo.
Feijoo
equivocase se pensa que co xiro de ANOVA a loita polos dereitos nacionais da
Galiza desaparece, 40 anos de franquismo con toda a súa represión non
conseguiron domar á clase traballadora galega, e non o vai facer o amigo dos
narcotraficantes. O invés, o xiro de ANOVA, e a política interclasista do BNG,
clarifican a escena política e deixan a porta aberta ao xurdimento dunha
organización verdadeiramente anticapitalista, socialista, na Galiza, que teña
como eixo a loita contra o réxime do 78, que visualice a loita política mais alo
do simple calculo electoralismo e o xogo de tronos polas listaxes, a ver quen
encabeza as listaxes, sen que exista un debate político e programático de
fondo.
Abrir o
melón desta discusión e a organización de todas aquelas persoas que rexeitan os
acordos cupulares e electoralistas dos últimos meses, poñendo no centro a
mobilización social, a súa autoorganización e a súa coordinación, como único
método de loita ao que se subordinan todos os demais, como as candidaturas
electorais, é o que ha que facer.
Contactar,
debater, coordinar e intercambiar experiencias é un primeiro paso para superar
o fracaso, real, dunha confluencia que "entre todos mataron, e ela soa
morreu".
En Galiza no mes de novembro de 2015
No hay comentarios:
Publicar un comentario