Carlos Dafonte
Outros dous resultados da
xornada electoral que merecen reflexión.
En primeiro lugar que é a primeira vez en todo o proceso electoral
autonómico, no que as forzas partidarias de aplicar as receitas neoliberais,
perden peso no Parlamento. Hai un grupo que dentro da súa heteroxeneidade
cualifico de neokeynesiano, que conta con 20 deputados, 14 de En Marea e 6 do
BNG, que non se pode dicir que constitúan unha esquerda, pero si que hai a
posibilidade de que se produza con maior forza que noutras lexislaturas, unha
certa denuncia das intencións da UE de seguir ca política de recortes que serán
aceptadas polo goberno que máis cedo ou máis tarde, se vai constituír en
Madrid.
O segundo a destacar, é o do BNG, que dende o ano 1997, no que obtén os
mellores resultados da súa historia, 18 deputados fronte ós 15 do Psoe, leva
preto de dúas décadas de queda continuada en momentos no que o nacionalismo nas
outras dúas nacións sen estado, son capaces de obter resultados moi
importantes. Creo que o BNG trabúcase se considera que supera-los prognósticos
das enquisas é unha vitoria; seguramente esa circunstancia non lle permitirá
ver dun xeito nidio a realidade que está a vivir. E non debía esquecer que
estas “cocíñanse”, e moitas veces os resultados das mesmas son os que interesan
que sexan a quen manda elaboralas.
Espero que pasados os momentos nos que “todos ganan e ninguén perde”, se
inicie na forza nacionalista unha fonda reflexión sobre as circunstancias que a
levan a situación actual que non lle permite levar adiante o seu proxecto
político.
Como todo o mundo comprende estes resultados teñen unha influenza
importante sobre o que acontece na fase política na que se atopa o réxime;
afondan na súa crise ou axudan a superala?. A resposta estará en función de
como evolucionen as diferentes forzas políticas.
Si no Psoe a crise aumenta, e iso parece ser o que vai a acontecer,
sobre todo despois das propostas de Pedro Sánchez do 27 de setembro, de que a
súa intención e dar un xiro á política do Psoe e situalo á esquerda, ó tempo
que fai unha convocatoria á militancia para avanzar cara a un congreso que
confirme esa tendencia, a crise pode aumentar e non hai que esquecer que este
partido é o xenuíno partido do réxime.
Por outra banda considero a proposta como unha manobra de supervivencia
no cargo, e aínda que ganara, cousa difícil pois os poderes económicos teñen
alicerces moi fortes no partido, non debe tentar confundir á opinión pública e
@s traballador@s, ó definir unha política que non vai ser máis que darlle un
suave lavado de cara ó réxime e polo tanto a súa estrutura económica o
capitalismo, con unha verdadeira política situada á esquerda que debe
significar, nun proceso transicional, unha creba co Tratado de Maastricht e
todo o que significa na construción europeas e as políticas que se implementan
dende Bruxelas; a defensa dun referendo para saír da OTAN; acepta-lo dereito a
decidir para Cataluña, Euskadi e Galicia, que non é aceptar a independencia
destas tres nacións; a denuncia da débeda e a realización dunha auditoría; a
defensa inequívoca dos servizos públicos como sanidade, educación, etc e polo
tanto a revogación de toda unha serie de leis; deixar sen efecto as reformas
laborais dende a do ano 2006 en adiante e elaborar un novo marco
xurídico...Sánchez atópase nunha complexa conxuntura, seguir a perder votos
pola súa esquerda se permite a investidura de Rajoy ou perdelos pola dereita se
formula o que chama o “xiro á esquerda” aínda que non o sexa; o que tenta e
abrir ese debate que en certa medida é falso para gañar tempo e xogarse a súa
pervivencia política nunhas terceiras eleccións.
Se no debate que se pode dar no Psoe, se chega a dar a circunstancia de
que o actual secretario xeral e a Comisión Executiva son relevados, que polas
súas actuacións ata o de hoxe, podemos afirmar que non sabían moi ben o que
tiñan que facer co seu partido, pactan hai un tempo con C’s agora prometen un
suposto “xiro á esquerda”, e son substituídos por unha xestora que saiba o que
facer co partido, que teña claro que o fundamental é apoia-lo PP na
investidura, poñer fin a actual situación de provisionalidade do goberno, pode
saír reforzado momentaneamente ó réxime; pero esa mesma circunstancia, que
afasta o pacto Psoe-Unidos Podemos, debía liberar ó mesmo tempo a esta última
organización, para outra política distinta que ata o de agora formulou: a
suicida proposta de pacto de goberno co Psoe, que o único que conseguiu foi
integralo no réxime, facerlle perder votos pola súa esquerda e esquecer a
presencia na rúa e a mobilización social, como factor que permita avanzar.
Se esta segunda parte se produce e ó peso institucional de Unidos
Podemos que é importante, se lle suma a mobilización social, aparece un
proxecto político claro de enfrontamento ca UE polas políticas económicas e de
recortes que vai levar o PP unha vez investido Rajoy, de defensa dos parados,
contra a pobreza de todo tipo, social e enerxética, mobilizacións contra o pago
da débeda, pola defensa do medio ambiente, pola igualdade da muller, a defensa
dos servizos públicos, etc, cuestión todas elas que se atopan no sentido común
da xente, que non son revolucionarias, pode axudar á creación dun bloque social que enfronte a crise
dende outra perspectiva.
A posición enganosa do PP.
O PP está contento, en Galicia ficou como estaba pero daba a impresión
seguindo a campaña de moit@s dos seus candidat@s, vendo os cartaces, o propio lema, “En Galicia si”, que é tanto
como dicir noutras partes do estado non, de que o PP non se presentou ás
eleccións. E non hai máis que estudar as intervencións do candidato, que non amosou
unha grande capacidade dialéctica, para comprender ben o que é o “populismo” en
estado puro, que o réxime en numerosas instancias, condena.
O PP apostou moi forte no País Vasco, enviou a un ministro, dos de
Rajoy e Saenz de Santamaría, e retrocedeu, en Galicia non avanzou, pero do
mesmo xeito que cando no mes de decembro perdeu 65 deputados e cinco millóns de
votos e para os medios de comunicación hexemónicos o PP e Rajoy gañaron, agora
non avanzar e retroceder, tamén é unha vitoria que consolida ó partido e ó seu
lider.
E aínda que estes resultados podan permitir a investidura do candidato
do PP, “Partido Podre”, que di o Beiras, máxime se no Psoe prodúcese a vitoria
dos aceptan que o PP goberne, a lexislatura vai ser curta; no social e no
laboral chea de recortes, de enfrontamentos sociais pois é de esperar o pulo da
mobilización obreira e popular; e de ser así, o réxime da oligarquía estaría
amosando en pouco tempo, a súa real debilidade, a súa incapacidade para o
consenso e polo tanto para impor a hexemonía como non sexa por métodos
coercitivos, constantemente ca “lei mordaza” na man.
En Galicia no mes de setembro de 2016.
Que razón tes.vendo as actuacións do PSOE nestes días teño a impresión de que xa están en campaña electoral
ResponderEliminar