Carlos Dafonte
Nos últimos anos da segunda guerra mundial os EEUU tiñan unha idea
fixa, evitar que a desmobilización dos exércitos trouxera unha nova depresión e
para elo era necesaria a reconstrución das outras dúas potencias industriais do
planeta moi afectadas pola contenda, Xapón e Alemaña e crear un área de libre
comercio onde chegasen os produtos norteamericanos. Pero segundo Perry Ánderson
en “Imperium et Consilium”, este obxectivo tívose que retrasar pola existencia
de dous exércitos o vermello e o popular de liberación, que o podían poñer en
cuestión. Polo tanto a primeira idea deixou paso á de ser o garante de todo o
sistema capitalista, que seguro tamén tería a súa recompensa, aínda que o prazo
alongábase.
En Europa, as antigas potencias do Eixe, debían converterse en
prósperos baluartes do “mundo libre” e as primeiras casamatas defensivas fronte
“o comunismo” do poder militar norteamericano xunto as potencias vitoriosas que
tamén foran arruinadas pola guerra, Francia e Gran Bretaña. Dean Acheson, o
principal forxador da política exterior de USA e Secretario de Estado de
Asuntos Exteriores con Truman, consideraba esta rexión nunha alocución no
Congreso, “a pedra angular do mundo” e o cambio de estratexia dos EEUU, o que
coñecemos como Guerra Fría, vai impor o Plan Marshall a Gran Bretaña, que en un
ano a levaba a ruína, a creación da OTAN, a división de Alemaña para que a URSS
non puidera “mete-lo nariz” no seu control, a depuración dos gobernos onde
entraran os partidos comunistas e a integración europea, onde Alemaña
occidental tiña que xogar un importante papel baixo o control anglonorteamericano.
O primeiro elemento de ruptura que da inicio a esta estratexia se produce en
1947, cando se pon en coñecemento da URSS que non vai percibir ningún tipo de
indemnización polos enormes estragos, materiais e humanos, sufridos como
consecuencia da invasión do seu territorio polo exército nazi.
Polo tanto os primeiros alicerces da actual UE, nacen dentro da estratexia de Guerra Fría deseñada polos EEUUU e tiñan, entre outros xa apuntados, tamén dous obxectivos fundamentais, por unha banda o de crear un proxecto de confluencia das burguesías máis poderosas, das vitoriosas e das derrotadas na guerra, tentando poñer fin ó emprego da violencia para solucionar as súas contradicións que as levaran ó enfrontamento e a dúas guerras na primeira metade do século XX, e na mesma lóxica, afianza-lo seu dominio sobre un movemento obreiro ó que, como xa expliquei noutros artigos, pola súa fortaleza, polo desprestixio do capitalismo pai do nazifascismo, da existencia dunha URSS triunfante e poderosos imperios coloniais, lugar idóneo para roubar enormes beneficios, se lle van ter que facer concesións mediante o que se chama o “pacto social”.
Dende a CECA, Comunidade Europea do Carbón e o Aceiro, ata a
actualidade hai todo un camiño, con fitos como o Euratom, Comunidade Económica
Europea (CEE) e a Unión Europea (UE) actual, que afianzan o proxecto
imperialista que é a UE e que a causa da crise que nos azouta, convertese cada
vez máis, no proxecto case exclusivo da oligarquía, o sector da burguesía
minoritario pero o máis poderoso economicamente, o sector transnacional.
As políticas da UE
enfróntanse ca maioría da sociedade
Polo tanto hai sectores da pequena e media burguesía, sectores
empresariais, que non se consideran defendidos nos seus intereses pola UE e os
aparellos burocráticos de Bruxelas fronte á mundialización da economía e o
proceso de centralización e
concentración do capital. Para eles a UE, é moi importante, sérvelles para
disciplinar ós traballador@s cas políticas de recortes que pula, pero ó mesmo
tempo créalles importantes contradicións cas políticas económicas ó servizo da
oligarquía; nos países do sur os máis afectados pola crise, son milleiros e
milleiros as empresas pequenas e medias que teñen desaparecido nestes anos,
resultado de non poder competir e perder os seus mercados fronte a fortaleza e
a maior capacidade de enfrontarse ca crise, das grandes empresas transnacionais
que son as que teñen o respaldo das grandes institucións planetarias, OMC, FMI,
UE, etc.
Dende a U.E. téñense pulado as políticas que no sector agrícola fan desaparece-lo pequeno campesiño,
substituído polas grandes empresas con consecuencias como a destrución do medio
ambiente, contaminación e a degradación dos produtos que chegan ós
consumidores.
As que inciden sobre a desaparición dunha parte importante do pequeno
comercio, incapaz de competir cas grandes áreas comerciais que impoñen un “modo
de vida” baseado no consumismo e o emprego do vehículo particular; atópanse
afastadas do centro, contan con supermercados, todo tipo de comercios
franquiciados, cinematógrafos, bares, restaurantes... e son unha das causas do
esmorecemento dos centros urbanos.
Poténciase a concentración de industrias en grandes empresas
transnacionais, cuns presupostos maiores as veces que moitos estados, que
tentan adecua-la lei ós seus intereses; no camiño da defensa das empresas
transnacionais atópase a orixe do acordo que asinou con Canadá, o CETA, e do
que se tenta asinar cos EEUU, pactados en segredo e que nestes días obtén o
rexeite de moit@s traballador@s da UE;
que tamén rexeitan as políticas que se permiten dende a UE como o proceso de
deslocalización, o poder traslada-las empresas a lugares onde @s traballador@s
teñan menos dereitos, salarios baixos e o medio ambiente non se protexa,
políticas que levan o desemprego no centro do sistema a unha calexa sen saída,
xa que as minorías dominantes, non están dispostas como noutros tempos de
fortaleza do movemento obreiro, a facer concesión algunha, comezando por un reparto do traballo, o que se coñece
como “as 35 horas” sen redución salarial, para que tod@s podan traballar.
Necesitan un amplo exército de reserva,
que prema sobre os salarios e as condicións de traballo cara a seguilos
recortando, nun proceso que a burguesía denomina, nunha operación ideolóxica
que ten como obxectivo apropiarse de verbas que sempre utilizaron os sectores
da esquerda, de austeridade, cando a
realidade é que nada ten que ver cas políticas que nos anos setenta do século
pasado, unha parte da esquerda europea situou no centro do debate e que segue
presente na memoria colectiva de importantes sectores do movemento obreiro; a
austeridade actual, a pulada pola burguesía son recortes nos dereitos laborais, políticos e de todo tipo. A austeridade defendida polas
organizacións d@s traballador@s era unha política de enfrontamento co capital
na busca dun mellor reparto da riqueza producida.
Qué significa austeridade
dende o punto de vista d@s asalariad@s?
Como non pode ser doutro xeito entre clases que son irreconciliables,
antagónicas, e refírome á burguesía e ó proletariado, determinados conceptos,
segundo dende que clase o analices, ten contidos completamente distintos.
Así, democracia, para unha
persoa con conciencia de pertencer á burguesía, ou que teña asumidas as ideas
desta clase como propias aínda que non pertenza a ela, é un sistema político
que lle garante o poder a esta clase fronte ós intereses da maioría da
poboación, baseado na soberanía nacional que corresponde ás Cortes, con
deputados e senadores irrevogables, que non renden contas máis que cada catro
anos nos procesos de eleccións, con leis electorais que axuden a monopoliza-las
institucións ós partidos que defenden ó réxime, cos medios hexemónicos de
información en mans da propia burguesía, que lle serven para transmiti-los
valores da clase como propios de toda a sociedade e “construír sempre un
relato” da realidade, ata chegar á manipulación, para que estes partidos acaden
o control das institucións e cunha separación de poderes ficticia, onde os
partidos do réxime teñen capacidade para intervir en cada un deles e que lle
presten os servizos necesarios. Ademais os poderes económicos, grupos de
empresas e fondos de investimento moi poderosos, que non se presentan ás
eleccións teñen a capacidade para determinar as políticas, preferentemente
económicas, que se deben adoptar; ese slogan tan manido “dun home unha muller
un voto”, so serve para crear consenso
na sociedade arredor do poder, para que os explotados se sintan partícipes do
que acontece, pensando que co seu voto poden cambia-las circunstancias nas que
viven.
Para un o unha traballadora, con conciencia de a que clase pertence, de
sufrir a explotación como man de obra asalariada, a democracia é outra cousa distinta. A soberanía reside no pobo e
polo tanto hai que consultarlle as decisións que se queiran tomar e non figuren
no programa electoral; o pobo debe intervir na elección dos xuíces e tribunais;
os medios de información deben estar en mans dos periodistas; as leis
electorais deben permitir do xeito máis nidio posible representación ás
diferentes posicións programáticas que hai na sociedade; os elixidos deben
render contas cada pouco tempo ós seus electores e de non cumpri-lo programa
deben ser revogados; a democracia debe entrar en todos os eidos ata na economía
o que significa, no control da mesma pol@s asalariad@s...
Pois ben sobre o tema da austeridade
acontece o mesmo, nese proceso por parte da burguesía de apropiación das verbas
que son propias do movemento obreiro e das organizacións de esquerda; non
esquezamos que á implantación das políticas actuais lle chaman “revolución
neoliberal” nun intento máis de deturpar unha verba, revolución, que ten un
contido moi determinado. Ca verba austeridade
definíase unha proposta dende a esquerda comunista que xorde nos primeiros anos
setenta do século pasado, para enfronta-la crise iniciada a finais da década
anterior e que se agrava ca suba do prezo do petróleo.
Pero dende aqueles anos ata a actualidade moito ten mudado a situación
política; naquela época a clase obreira facía con certa inxenuidade, a proposta
dun pacto pola austeridade ca
burguesía, para tentar evitar todas as medidas que se vían vir, proposta que nunca foi aceptada. A cambio a
burguesía comezou a aprobar políticas económicas de corte neoliberal, medidas
que a partires da crise as conceptúa de austeridade e que só afectan os
traballadores e sectores populares, cos recortes de dereitos e privatizacións
que coñecemos.
Na actualidade, para a clase burguesa que utiliza esta verba, son
recortes para @s asalariad@s, desaparición de determinadas funcións do estado
que exercerá cada vez un menor control sobre a actividade privada;
privatizacións de servizos que non funcionarán co obxectivo de mellora-la
calidade de vida da xente, senón como un medio máis para acadar beneficios; o pago da débeda privada que moitos gobernos
converteron en pública, en concreto o que se tenta é poñer por enriba dos
intereses da maioría social os intereses dos grupos económicos máis poderosos.
Para @s traballador@s a austeridade
debe significar poñer fin ó malgasto do capitalismo, comezando pola agresión
constante ó medio ambiente, tamén ó consumismo
individualista como modo de realización persoal, potenciando o consumo
social; poñer termo os investimentos improdutivos levados a cabo polas
administracións que producen enormes beneficios a unha minoría e defender que o
proceso de acumulación non debe contar ca participación das mesmas. Neste senso
a austeridade era enfrontarse co sistema capitalista.
A UE enimiga d@s
traballador@s
@s traballador@s europeos que pertencen os países da UE, teñen
conciencia como amosou a votación para a saída de Gran Bretaña da mesma, que as
políticas de recortes que lles afectan nos seus dereitos, tanto laborais,
sociais ou políticos se acordan nas institucións europeas. Así amosouse tamén cando
os pobos votaron non en Francia e
Holanda nos referendos sobre o proxecto dunha Constitución para a UE. A clase
traballadora coñece ben quen é o seu adversario, que medios utiliza para
impoñe-los seus criterios e mobilízase como no caso de Francia contra toda unha
serie de medidas que o goberno por exixencias da UE tenta impor. Pero atópase
cun problema importante, que as organizacións de esquerdas que chamaremos
tradicionais, Partidos Comunistas e organizacións que saíron da disolución dos
mesmos, así como os movementos sociais que se foron creando, non tomaron nestes
anos unha posición política clara de loita
contra a Unión Europea, defendendo a
saída dos seus países da mesma, polo que sectores importantes da clase
asalariada, dende hai anos votan en diferentes eleccións a partidos e
organizacións políticas que sinalan a UE e o euro, como a causante de toda unha
serie de medidas e dificultades e propoñen a saída do país da mesma. Pero ese
voto ten un problema engadido, que xunto a defensa da saída da UE, nos seus
programas introducen cuestións que podemos considerar xenófobas e racistas e
rachan ca unidade da clase traballadora ó tempo que formulan a aplicación para
o marco nacional, de políticas económicas de carácter neoliberal. Pero ademais
debemos entender que non existen solucións dentro dos marcos dos estados ás
contradicións do capitalismo e hoxe, coma sempre hai que tentar levantar un proxecto internacionalista d@s traballador@s. Os
episodios de Grecia e Portugal, onde a mobilización social conseguiu formar
gobernos distintos pero que non foron no caso de Grecia e tampouco o é no caso
de Portugal, capaces de crear unha alternativa ó neoliberalismo e as políticas
de recortes que pula a UE. No caso grego pola razón de que o goberno, contando
cunha maioría da poboación que estaba disposta a loitar, rendeuse diante das
exixencias de Bruxelas.
E non hai posicións intermedias, como é a que formula a necesidade de
loitar dende dentro para reformala; opcións como o coñecido como “Plan B para a
UE”, que pula Varoufakis antigo ministro de economía de Syriza en Grecia, que
considera posible, a partires do existente chegar a unha Europa máis social
posta ó servizo dos traballadores e demais clases explotadas polo capital,
aínda que nos seus manifestos como o de Madrid, non expliquen como se vai levar
a cabo esa transformación.
A UE actual como instrumento imperialista non pode ser reformada; a
oligarquía e Alemaña a grande beneficiada, non o permitirían, só ca súa derrota
a todos os niveis se podería facer e no caso de darse a mencionada
circunstancia, non hai razóns para que sobreviva nada das estruturas
imperialistas e antidemocráticas existentes. A construción da Europa dos pobos
e socialista, débese facer de acordo con criterios distintos e sobre alicerces
diametralmente opostos ós actuais.
É preocupante que na situación actual, nas campañas celebradas neste
amplo ciclo electoral vivido en Galicia, o tema da UE e o euro non se teñan
debatido en profundidade cando contamos ca ameaza dos tratados comerciais con Canadá
e USA, o chamado CETA xa aprobado e descoñecido pola poboación e o TTIP
negociándose secretamente, que van dar ás empresas transnacionais unha posición
superior a dos estados, ó tempo que vai afondar no modelo atlantista da UE.
Compre pois que en Galicia se abra un debate sobre todos estes temas
que son cruciais para o noso país, tanto na sociedade, nas institucións como no
interior do movemento que se está a configurar, pois unha grande parte das
decisións, sobre todo en materia económica que se toman no estado e ás que o
bipartidismo e cómplices foron sumisos, son aprobadas previamente polos
burócratas non elixidos que dirixen a UE e a Unión Monetaria. E tra-lo debate
ou ó mesmo tempo, débese abrir un período de mobilizacións; non se poden
aceptar sen loita os recortes que nos van a impor, nin a suba de impostos que
agora o PP, despois de tantos meses de período electoral no que o negou parece
vai levar adiante, nin que se aproben tratados comerciais secretos, nin que
unha vez máis se engane a todo o electorado con promesas que despois non se compren.
En Galicia no mes de novembro de 2016
me gusta moito o artígo
ResponderEliminar