Carlos Dafonte.
Finalizado o ano 2017 que
coincidía cos 100 anos da chamada “revolución rusa”, dos
libros, actos, simposios, artigos e todo o que queiramos agregar, dos
que teño coñecemento sobre a celebración desta efemérides que
relatan a toma do poder no antigo Imperio Ruso polo proletariado e os
campesiños pobres, podemos sacar dúas conclusións.
En primeiro lugar
o medo que ese proceso segue producindo nas burguesías, que se
manifesta a traveso dos seus intelectuais orgánicos que participaron
nesta celebración; medo a que se interprete a revolución soviética
tal como foi e hai que dicir que neste senso, fixeron enormes
esforzos para tentar seguir impoñendo toda unha serie de argumentos
e interpretacións que pouco teñen que ver ca realidade.
Un dos máis utilizados é interpretar o estoupido popular contra a autocracia tsarista de febreiro de 1917, como unha especie de revolta democrático burguesa, que máis tarde por medio dun golpe de estado dos bolxeviques, convértese nunha sanguenta ditadura cernando o proceso revolucionario iniciado a principios de ano e os seus logros democráticos. A realidade é que as masas que se sublevan, as mulleres traballadoras que padecían os rigores dunha guerra interimperialista na retagarda, en Petrogrado, saen ás rúas cunha consigna moi clara, Paz, Traballo e Pan. É un movemento espontáneo na súa maioría, pero que nunha situación crítica polas dificultades que a guerra e a derrota que nas frontes se estaba a producir, levan a un sector da aristocracia e a burguesía, apoiados por partidos burgueses e reformistas a solicitar a abdicación do tsar e a formación dun goberno presidido polo príncipe Lvov, á espera de que a situación se tranquilizase e o tsar volvera a “retoma-lo rumbo”. Como fixeron sempre determinados sectores da burguesía, aproveitáronse da loita das masas para poñerse á fronte e iniciar o camiño que máis lles interesaba.
Se crean nese período
inicial, do mesmo xeito que aconteceu na revolución de 1905, os
soviets, expresión democrática do pobo, que en mans dos partidos
reformistas non representan un perigo para o novo poder
aristocrático-burgués; non son o “dobre poder” necesario para
toda revolución, os bolxeviques aínda que teñen presenza nos
mesmos con aproximadamente 8.000 membros en todo o territorio do
Imperio, non son aínda o partido capaz de facerse co apoio da
maioría da sociedade; tardarán algúns meses en gaña-la confianza
de amplas masas.
Pero dende antes do
inicio da I ª Guerra Mundial en 1914, tiveron unha postura moi clara
e firme, formularon por parte de Lenin nos órganos da II
Internacional e despois nas conferencias que xuntaron a algúns
dirixentes, pouc@s, en Zimmerwald e Kiental, contrarios a apoiar ás
burguesías respectivas, a necesidade de converter a guerra
interimperialista en guerras civís contra as clases hexemónicas,
aristocracia e burguesía, que mandaban ó matadoiro a millóns de
traballadores para conseguir novos mercados e materias primas,
facerse con novas colonias e multiplica-los seus beneficios.
O tema da paz a calquera
prezo, se vai converter na conciencia de moit@s traballador@s no
elemento fundamental e o que fará que os bolxeviques pouco a pouco,
a pesares das diferencias internas que sobre o tema tiñan, vaian
medrando nas súas posicións tanto dentro dos soviets como na
sociedade, ata converterse en nove meses, nun partido de máis dun
cuarto de millón de militantes; un partido democrático onde se
podían manter posicións contrarias e onde Lenin a maior parte das
veces, tanto no ano 17 como con anterioridade, estivo en minoría na
discusión de numerosos problemas, ata que foi capaz de ir gañando a
adhesión d@s compañeir@s de partido e máis tarde das masas
proletarias e campesiñas.
A paz para o proletariado
e os campesiños pobres do Imperio, converteuse nun obxectivo
fundamental, pois sen ela, non habería nin pan nin traballo, só
morte nas frontes de combate e miseria nos campos e nas cidades. O
resto dos partidos, os constitucionalistas, tamén chamados “cadetes”
máximo representante da grande burguesía, menxeviques, socialistas
revolucionarios e as institucións que dominaban, eran firmes
partidarios de continua-la guerra, seguir mantendo vivos os pactos
que asinara a autocracia tsarista cas outras potencias imperialistas
europeas e apoiar ó goberno provisorio.
A paz, e a idea
formulada por Lenin a súa chegada a estación de Finlandia no mes de
abril, de que o goberno provisorio burgués tiña que ser
substituído polo goberno dos soviets, idea
ca que non estaba de acordo a maioría do Comité Central do Partido
Bolxevique, pero que atopou o apoio de Trotski e o seu pequeno grupo
que se integrará no mesmo, van se-los dous pes sobre os que os
bolxeviques van acada-la súa maioría social.
Hai
que dicir que cando Lenin chega en abril a Rusia atópase cun partido
moi fragmentado respecto a esta cuestión do poder soviético; había
dirixentes que consideraban que a revolución tiña que ser
democrático-burguesa e que polo tanto había que apoia-lo goberno
provisorio, outro grupo consideraba que o Partido Bolxevique era o
que debía loitar polo poder e unha minoría que compartía a tese de
Lenin de “¡todo o poder para os soviets!”.
Tivo que facer un grande esforzo debatendo con dirixentes e base ata
que a súas teses, coñecidas como as “teses de abril” se
converteron en maioritarias e despois de que o partido comprendeu o
alcance das mesmas, a loita nos órganos de dirección dos propios
soviets en primeiro lugar, onde moitas veces Lenin e os bolxeviques
foron apupados polas súas posicións sobre a paz, o goberno
provisorio e todas as teses que presentaron; por exemplo no Congreso
Pan Ruso dos Soviets, que estaba a debater o tema da unidade. Foron
combates dialécticos moi duros nun contexto en que se acusaba a
Lenin de ser un espía alemá por chegar a Rusia nun tren que cruzou
territorio xermano.
A
partires do intento de golpe de estado do xeral Kornilov, que contaba
co apoio do Goberno, cuxo obxectivo de implantar unha ditadura e foi
derrotado polo movemento de masas, os bolxeviques van conseguir
maiorías nos soviets e estes comezan a tomar medidas que significan
a existencia dun poder paralelo, se suprime a policía política,
legalización dos sindicatos, control por parte dos traballador@s
de servizos básicos como correos e teléfonos, os soviets dominan
unha grande parte das forzas armadas, ata que chegados a outubro polo
vello calendario, 7 de novembro polo noso, expulsan ós restos do
goberno provisorio do Pazo de Inverno; goberno que había tempo
deixara de controlar a situación e cuxo presidente Kerenski se había
fugado. Polo tanto non foi un golpe de estado a xornada do 7 de
novembro perpetrado por un reducido grupo, foi o colofón lóxico a
todo un proceso de toma de poder por parte da maioría do pobo,
pacífico e feito non en nome dun partido, senón dos órganos
democráticos que o propio pobo creara. Pódese afirmar que foi a
incapacidade do goberno provisorio para satisface-las necesidades das
masas, nun claro proceso de loita de clases o que leva ós
bolxeviques ó poder.
Hai
que entender os procesos revolucionarios como ben dicía o propio
Lenin, non como “un acto único, nin unha única batalla nunha
fronte illada, senón toda unha época de agudos conflitos de clase,
unha longa serie de batallas en todas as frontes, é dicir, batallas
a redor de todos os problemas da economía, da política, que só
poden culminar ca expropiación da burguesía”. Polo tanto, esa
idea dun golpe dun pequeno grupo contra as masas, un feito illado,
non ten ningunha verosimilitude.
Outro
argumento esgrimido pol@s crític@s co
proceso revolucionario soviético é o de que o pensamento e actuar
de acordo cas propostas de Lenin, sempre vai conduci-lo proceso
irremisiblemente cara ó stalinismo, pois o leninismo sempre é o seu
limiar, é a mesma cousa; denominando co nome de stalinismo á
burocratización do Estado e o Partido, a ditadura persoal, a falla
de liberdades, o usufruto da riqueza producida polo país por parte
da burocracia e a eliminación sistemática do adversario por métodos
violentos.
O
que as clases dominantes tentan traslada-la sociedade en todos cantos
países utilizan estes argumentos, é que o tipo de sociedade que
queremos construi-los comunistas hoxe, e “calco e copia” da
sociedade que se edificou na URSS a partires de 1929, cando Stalin e
toda a burocracia toman o poder dun xeito explícito.
Pero
tamén se tenta transmitir outra idea fundamental á sociedade, que a
organización pola que Lenin batallou toda a súa vida, o partido
revolucionario dos traballadores, se chamara Partido Obreiro
Socialdemócrata de Rusia, máis tarde Partido Bolxevique e despois
Partido Comunista, non é a organización adecuada para facer
política na época que vivimos, pois ese instrumento serviulle a
Stalin para impor o seu réxime polo tanto non é un partido
democrático acorde cas liberdades da democracia burguesa.
As ideas de Lenin
sobre o Estado e o Partido.
Morreu
en xaneiro do ano 1924 e os derradeiros dous anos da súa vida
estiveron sucados por longas crises de saúde, pero decatouse, sen
ter moitos medios para poñerlle fin, e amosou a súa contrariedade,
do proceso incipiente de burocratización do Estado e do Partido,
proceso que despois da súa morte deu pe a unha forte loita dentro do
Partido Comunista ata que a Oposición de Esquerdas é derrotada e a
partires de 1929 Stalin faise con todo o poder. Lenin combateu con
diferentes artigos este proceso contrario ás súas ideas, escritos
en 1921; “A crise do Partido”, “Novos tempos vellos erros”,
“A cerca da significación do ouro despois da vitoria completa” e
“Sobre as purgas no Partido”. Sendo consciente do dano que Stalin
podíalle facer á organización solicitou publicamente a
substitución do mesmo como secretario xeral do Partido na súa
“Carta ó Congreso”, na que se atopa unha frase moitas veces
esquecida: “O camarada Stalin chegado a Secretario Xeral, concentra
nas súas mans un poder inmenso que non estou seguro de que sempre
saiba usalo con suficiente prudencia”, e solicitaba a súa
substitución.
Na
cuestión relativa ó Estado, Lenin baseándose nos escritos de Marx
sobre a Comuna de París, escribe en 1917, mentres se atopaba na
clandestinidade despois dos acontecementos de xuño-xullo, “O
Estado e a Revolución” onde formula elementos moi importantes que
serán recollidos no ano 1919 no Programa do Partido, ó celebra-lo
seu Congreso; son as catro condicións do “poder soviético”: 1ª
eleccións libre e democráticas e dereito de revogabilidade para
todos os elixidos. 2ª ningún funcionario debe recibir un salario
máis alto que o que recibe un obreiro cualificado. 3ª non existirá
exército permanente senón o pobo armado. 4ª Gradualmente todas as
tarefas do Estado deberán ser realizadas por tod@s.
Cando todo o mundo sexa un burócrata ninguén poderá ser un
burócrata. Engels a esta estrutura chamoulle “semi Estado”, un
sistema político de carácter transitorio co obxectivo de avanzar
cara ó socialismo. Este esquema ten algo que ver co sistema político
que se impuxo cando Stalin tiña o poder?. Conseguiu o poder
eliminando a todo o antigo Comité Central do Partido Bolxevique e a
cantos bolxeviques se opuxeron ás medidas tomadas.
Lenin
tiña unha idea nidia do que sería o poder soviético; expresouno en
outubro de 1917: “Unha vez co poder nas súas mans os soviet
poderían aínda agora, asegura-lo desenvolvemento pacífico da
revolución, a elección pacífica dos deputados populares, a loita
pacífica entre os partidos no seo dos soviets, a comprobación na
práctica dos programas dos diferentes partidos, o paso pacífico do
poder dun partido a outro”.
Foi
a intervención violenta dos chamados “exércitos brancos”, cando
non estaba creado o exército vermello, a actitude da “lexión
checoslovaca” que ocupou importantes territorios, o desembarco de
exércitos de Inglaterra, Francia, Xapón, EEUU e outras potencias
imperialistas, ocupando partes moi importantes do territorio do
antigo Imperio Ruso, a ocupación por parte dos exércitos de Alemaña
de toda a Ucraína, foron os elementos repito, que obrigaron ós
soviets a loitar e inicia-lo camiño da guerra na defensa da
revolución.
Se a
actitude da burguesía e todos os seus aparellos de propaganda que se
mobilizaron este ano, para dar unha idea moi determinada e contraria
á revolución hai que considerala como normal, non poden aceptar ser
desplazada do goberno dun territorio determinado, quero destacar en
segundo lugar, a pouca importancia que a esquerda lle deu a
esta conmemoración. Era previsible, pola razón de que dominada
ideolóxicamente polas posicións liberais, a revolución dos soviets
no Imperio Ruso, analizala, estudala, sacar conclusións e
ensinanzas, non é algo que teña en mente; ó máis que se atreveu
facer, como non podía ser doutro xeito, foi celebrar algún acto.
Estuda-la
revolución soviética e polo tanto todo o seu entorno, a alemá, a
húngara, non casa ca actitude reformista que a esquerda
institucional leva adiante; e non vou a especificar, sería tanto
como adicarme a dar certificados, que partidos e organizacións son
ou non de esquerdas. Pero penso que ser de esquerdas é ter unha
actitude contraria a manter o sistema capitalista e iso só se fai
dun xeito coherente sendo marxista; non hai esquerda sen
anticapitalismo, xestiona-lo capitalismo doutro xeito pode ser
progresista, pero non de esquerdas, en calquera caso unha actitude
moi trabucada.
Lenin
o que fixo durante toda a súa vida foi defende-lo marxismo fronte ós
numerosos intentos da socialdemocracia de quitarlle o seu carácter
revolucionario e xunto cos soviets e os Comisarios do Pobo, levaron a
cabo, a pesares das dificultades polas que pasaba a revolución no
primeiro ano, a toma de medidas tan importantes como: Aproba-los
decretos sobre a paz, para que o proletariado e os campesiños pobres
non seguiran a ser a maioría dos mortos nas frontes de combate;
aprobar decretos e facelos efectivos sobre a entrega da terra ós
campesiños; control obreiro das empresas nun primeiro momento e máis
tarde a nacionalización das mesmas; aprobación da Declaración de
Dereitos dos Pobos, onde se establecía a igualdade e soberanía dos
pobos, o dereito a dispor do seu propio destino ata o punto de poder
separarse e constituírse en Estado e abolición dos privilexios
nacionais e relixiosos; establecemento da xornada de 8 horas;
creación do ensino público; decretos instituíndo o matrimonio
civil, o divorcio e o aborto; creación do organismo de defensa da
maternidade e a infancia; prohibición da prostitución; organización
do Exército Vermello; nacionalización da banca e creación do Banco
do Estado que garantira todos os depósitos; nacionalización da
grande industria; apertura do diálogo cos traballadores de relixión
musulmá; etc.
Moshe
Lewin, no prefacio do seu libro “ O século soviético” á
edición de 2017, afirma “A Unión soviética xa non existe. Como
din algúns 'é historia', ou o que é o mesmo, esquézanla”,
afirmación absurda afirma máis adiante, pois a antiga URSS vai
seguir presente e durante moito tempo.
Esta
posición é complementaria co afirmado por Josep Fontana de que non
é posible comprender todos os acontecementos do século XX sen
entender o acontecido en Rusia en 1917 e na URSS e engado, elementos
tan importantes como o xeito de sortea-la crise do 29, a vitoria na
segunda guerra mundial, as cesións do capitalismo ó movemento
obreiro na etapa que se coñece en algúns países de Europa como
“estado de benestar”, a planificación económica, as loitas
anticoloniais e pola liberación nacional e todo un longo “etc”
Creo
que hai elementos moi importantes que merecen por parte da esquerda,
un análise máis fondo do que foi a “revolución rusa” e as súas
consecuencias, do que neste centenario levaron a cabo.
En
Galicia no mes de febreiro de 2018.
No hay comentarios:
Publicar un comentario