Roberto Laxe
É un feito indiscutible que o
desenvolvemento do capitalismo xerou un nivel tecnolóxico e capacidade
produtiva que pon en perigo, non só à natureza, senón à base de
sustentación do ser humano, o posto de traballo; afectando a todo tipo de nivel
de cualificación profesional. As dúas forzas produtivas fundamentais que Marx
sinalaba, “a terra e o ser humano”, están en perigo pola supervivencia das
relacións sociais de produción capitalistas.
Ante esta ameaza máis que real, coas
consecuencias de aumento das desigualdades sociais, distúrbios e crises
sociais, púxose na axenda política o debate sobre a necesidade de estabelecer
unha Renda Básica, presentada, por certo, polos seus sectores máis progresivos,
como “sementeiro de subversión” e que xera ilusións en sectores sociais de que é posible
unha saída “pacifica”á crise do sistema.
Dúas visións da Renda Básica
Neste cadro xurdiron voces expondo
que a sociedade xera riqueza suficiente como para que exista unha “renda básica”, igualitaria
e incondicional para todos os cidadáns /as, independentemente dos seus ingresos
ou de se teñen traballo ou non. Neste camiño, países como Finlandia cun goberno
de centro dereita, xa comezaron a experimentar cunha renda básica, universal,
de 560 euros, para pasar nun segundo momento, aos 800; independentemente da
situación laboral do cidadán / a.
Pola súa banda, grandes empresas do
Silicon Valley e sectores do capital, están a estudar introducir propostas
semellantes e introducen unha variante, que modifica o carácter “incondicional” da proposta,
transformándoa nun Ingreso Mínimo, condicionado ao cumprimento duns requisitos,
a que se cumpran unhas condicións de pobreza, traballo,... , como fan agora as
Rendas de Inserción.
Esta concepción non deixa de ser a
caridade cristiá elevada á categoría de política de estado. Os
pobres, os ameazados de “exclusión social” como se di agora, non terían que
mendigar unha esmola na porta dunha igrexa, fariam na porta dunha institución
do estado (ou dunha ONG subvencionada para tal fin) para recibir esa esmola. O
drama social é que a “exclusión social”, a pobreza, este camiño de deixar de
converter-se nun feito marxinal e ser a forma de vida de máis da metade da
clase obreira. Hoxe, “ter traballo xa non é garantía de non ser pobre”.
Os sectores máis progresistas que defenden a Renda Básica Incondicional preséntana como unha alternativa, “dentro dun programa económico máis amplo”, como unha “semente dun poder político subversivo” (O Debate sobre a Renda Básica, aspectos políticos, filosóficos e económicos, D Raventós e J Wark). Con este ingreso, din, garantirían a democracia; liberarían da obrigación de ter que aceitar “traballos lixo”, dá “capacidade de negociación ás persoas”, non só económica senón tamén politicamente. Combateria as desigualdades sociais e económicas, e como debe ser parte dunha política económica máis ampla, non só é unhas medidas contra a pobreza, senón que estimularia o crescimento e a liberdade efetiva de todos os membros da sociedade.
Parte dun programa máis amplo
A Renda Básica Incondicional
preséntase, non como unha medida única, illada, senón dentro dunha “política
económica máis ampla”; por iso para comprender o verdadeiro carácter
da proposta é preciso ver que tres medidas centran ese programa “máis amplo”, e que son os obxectivos “aos que a
política económica do Estado debería aspirar”.
1.- Renda Básica Incondicional, é dicir, todo
cidadán ten dereito a unha renda, máis aló dos seus ingresos reais e da súa
localización no mercado de traballo. A esta proposta, desde a dereita burguesa
respóndese que se “desincentivaría” a procura ativa de traballo,
apoiados no seu darwinismo social conxénito, “a letra con sangue entra”. Está claro que
as consecuencias deste darwinismo social son o empobrecimiento e o aumento
exponencial das desigualdades.
Doutro lado,
é inegável,
desde un punto de vista formal, que a RBI reduciría a presión á procura de
traballo. O “exército industrial de reserva” que o capitalismo mantén para
presionar á baixa as condicións dos traballadores / as activos, atizando a
competencia entre eles, reduciría a súa efectividade para a imposición se
contase cuns ingresos básicos para a supervivencia. Pero, en realidade redúcese
esa presión ou favorece os capitalistas a negociar a rebaixa nos salarios?.
Entramos de cheo no térreo das
relacións sociais de produción. En abstracto, nunha sociedade sen clases, sen
propietarios de medios de produción e distribución que buscan a optimación dos
beneficios, esta proposta podería permitir avanzar á sociedade
nunha distribución xusta da riqueza xerada por ela. Pero vivemos nunha sociedade onde a sociedade
xera unha riqueza da que se apropian os proprietários do capital, os
capitalistas. Nestas condicións, a existencia dunha RBI o que lles permite, e “lexitima” socialmente, é o pago de
salários máis baixos... porque o traballador / a xa cobra unha RBI, e ademais
non se cuestiona as reformas laborais impostas ata agora, mitiga os seus
nefastos efectos, nada máis.
O produto do traballo, e os
beneficios que xera, seguirían indo aos petos do capitalista; mentres a clase
traballadora recibe da sociedade, é dicir, do que todos eles producen, “socializaría” unha parte do
salário, que sería abonado a través da RBI. Porque non se pode esquecer nunca
que a riqueza non a xera o capital, senón a parte variable do capital, é dicir, o
traballador / a. Só o traballo humano xera excedente de valor, e
toda a riqueza social constrúese ao redor deste excedente, parasitándolo,
especulando, ... Se a RBI a paga o estado, págase co diñeiro xerado por ese
excedente; polo que os capitalistas estar a aforrar unha parte do salário, que
pagariamos todos.
Por iso, se o estado subvenciona,
socializa, unha parte dos salarios a través da RBI, o capitalista individual
ten “lexitimidade” para negociar á baixa,... porque xa se cobra unha
RBI, e de ser unha suposta panacea para a loita obreira, transfórmase no seu
contrário; nun freo á loita dos traballadores / as por un
posto de traballo e un salário digno... E sobre todo, á loita contra as raíces da
desigualdade social, as relacións sociais de produción capitalistas.
Leva ao extremo a contradición
central do capitalismo entre o carácter social da produción e o carácter
privado da apropiación dos beneficios xerados.
2.- Banca Pública. Se hai un tema
que se ten mitificado ata a extenuación entre as “novas” alternativas ao neoliberalismo é este; que
de novo e actual ten ben pouco. No Estado Español ata fai moi pouco, o 50% do
sistema financeiro era público a través das Caixas de Aforro. En China o
sistema financeiro é estatal, e en Alemaña, Noruega,...
segue funcionando un amplísimo sistema de banca pública na forma de Caixas de
Aforro.
O caso español é paradigmático;
as caixas de aforros estaban supostamente controladas polas institucións
estatais (concellos) e a sociedade civil (sindicatos, confederacións
empresariais, usuários / as). Aínda así non se aforrou a crise; senón que
foi fonte de moitos problemas por ser parte dunha estrutura económica
capitalista; e acabou como acabou.
A esixencia dunha Banca Pública ten
un efecto desmobilizador ante o verdadeiro problema, o capital financeiro, a
banca privada, as aseguradoras e os fondos de investimento. Se existe unha
Banca Pública que financia ao pequeno aforrador ou investidor, “honestamente”, “eticamente”, non se
necesita nacionalizar a banca. Non é preciso desmontar o ovo da serpe, os
grandes bancos privados, que a través de mil fíos accionariais interrelaciónanse
coa industria e o comercio, formando o que Lenin chamou “capital financeiro”, base da fase
imperialista do capitalismo.
3.- Establecemento dunha renda
máxima. Novamente tentando porlle portas ao mar da propriedade privada dos
medios de produción e distribución. Con toda a rede legal que construíron, o
conxunto do capital, desde o máis pequeno ata o máis grande, non declara a
renda real nunca.
A través das dobres ou triplas
contabilidades, subvencións á contratación, tarifas planas para os
autónomos, bonus para executivos, descontos no imposto de sociedades, e o cume,
as SICAV ou os paraísos fiscais, a burguesía e os seus axentes non declaran
nunca cal é a súa renda. Para logralo, habería que esixir a apertura dos libros de
contas reais (non confundir cos legais), e iso o capitalismo nunca o faría,
salvo que a clase obreira esíxao e conquísteo.
Esta “política alternativa” ten unha
guinda fiscal pola que se financiaría a RBI, facendo que “os ricos paguen un pouco mais” (op. citada).
Toda a rotundidade da política fiscal defendida pola esquerda ao longo anos, “que pague
quen máis tem”, reducida a ese “que paguen un pouco mais”. É o colmo do conformismo, para unha
proposta que se vende como “sementeiro de subversión”.
A RBI, o bálsamo de Fierabrás do capitalismo
Don Quixote, nun momento dado, dille
a Sancho Panza que hai un bálsamo, o de Fierabrás, que ten unha gran capacidade
de curar feridas, e mesmo de “sanar” os mortos. “Se iso hai -dixo Panza-, eu renuncio desde aquí o goberno da prometida insua”. Calquera traballador / a, na disxuntiva de ter que loitar polo goberno
da sua “insua” e recibir un bálsamo que lle curará as feridas da explotación, a RBI,
contestaría como Sancho Panza; “se é certo que existe”, renuncio á loita.
Esta é a lóxica reacionária que introduce a
esixencia da RBI, ante a posibilidade de sen tocar as bases do sistema
garantirse un mínimo de subsistencia, todos seriamos “panzistas”. Da mesma maneira que Don Quixote
coa promesa do bálsamo de Fierabrás quería desviar a Panza do seu obxectivo de “gobernar a
súa insua”, os vendedores de fume da RBI desvían a solución da crise do sistema
capitalista pola alternativa socialista, a propostas que caben dentro do
sistema.
O capitalismo, queiran que non os
vendedores de fume, está ferido de morte; como morra depende de se a
clase obreira chega puntual á súa cita coa história, ou como
sucedeu en moitas ocasións déixase embaucar como Sancho Panza por Don Quixote
O capitalismo ten unha contradición
que é como unha ferida gangrenada, a relación entre sobreproducción de
mercadorías e o valor destas, que froito da capacidade produtiva do sistema,
cae sistematicamente, reducindo os beneficios empresariais. Esta caída dos
beneficios tradúcese nun aumento do “exército industrial de reserva”, do desemprego
e a exclusión de cada vez máis amplos sectores sociais. Foron os chamados “estados
errados”, que pronto trasladaron-se aos barrios obreiros e populares das grandes
potencias imperialistas. Os EEUU, Francia, Gran Bretaña, Italia, Estado
Español... teñen grandes bolsas de pobreza, que afecta xa a amplos sectores da
clase obreira, aos que o sistema non dá a menor oportunidade.
A Renda Básica aparece como ese
bálsamo capaz de curar feridas, mesmo sanar os mortos, e así non ter que
tocar a raíz do problema, as relacións sociais de produción de capitalismo que
están na orixe desa exclusión social.
Como combater esa exclusión social
Ata agora hase visto que a RBI é un
paliativo a un problema estrutural do sistema que, regularmente, provoca
grandes crises coas súas consecuencias de desemprego e empobrecimiento. É un
paliativo porque non atenta contra as causas do problema, a crise capitalista,
senón contra as súas manifestacións, pobreza e exclusión.
Ao comezo da crise, alá polo 2007,
comezou a porse na fala da xente unha palavra de orde, "a crise, que a
pague o capital". O que significa isto.
Primeiro, e antes de nada,
recuperando unha vella consigna o movemento obreiro, a “escala móbil de horas de traballo”; é dicir,
traballar menos para traballar todos e todas, sen redución de salario. De
feito, a precariedade e os contratos a tempo parcial que abundan tanto nos últimos
tempos en todo o mundo (desde os minijobs alemáns, ata os contratos “cero horas” británicos)
non son máis que a forma que o capitalismo se adapta ás esixencias da produción.
Segundo, enfrontando a concepción da
subvención, sexa vía incondicional RBI sexa o condicional Ingreso Mínimo, non
ligado á loita por un posto de traballo digno: a esixencia é a de seguro
de desemprego ata que non se atope traballo digno, o que supón a derrogación de
todas as reformas laborais que abaratan a prestación para obrigar a aceptar
traballos lixo.
Terceiro, á clase obreira o capital non lle
regalou nunca nada que non fose produto da súa loita; o capital vive da explotación
dos traballadores / as, son a súa fonte de riqueza, con ou sen RBI. A clase
obreira debe ser consciente de que só a través da súa mobilización e
organización pode avanzar en conquistas que lle liberen da escravitude do
traballo asalariado, cousa que a RBI non fai. A RBI converte o capitalismo
nunha “gaiola de ouro” da explotación capitalista.
As condicións para o socialismo
Trotski, no Programa de Transición
escribiu: “As condicións obxectivas da revolución proletaria non só están
maduras mas tamen que empezaron a descomporse”. Todas as grandes invencións do último
século, e aceleradamente os últimos 25 anos coa informática, a robótica ou
a nanotecnoloxía sentaron esas bases obxectivas, comezando pola redución do
tempo de traballo necesario para a súa produción; pero baixo as condicións de
propiedade privada do capitalismo, estes inventos non aumentan a riqueza
social, senón que enriquece a uns poucos, empobreciendo
á inmensa
maioría.
Neste sentido, podemos afirmar con
Trotski, que o aumento da produtividade do traballo, non significa o
desenvolvemento das forzas produtivas, posto que a maioría dos produtos do
traballo humano terminan almacenados, sen entrar no mercado, converténdose en
capital morto que hai que destruír regularmente.
A RBI é presentada como unha solución a esta
acumulación de capital morto, ao aumentar a capacidade de compra dos
traballadores / as, aos que se lles garantiria un ingreso mínimo, poderían dar
saída a esa sobre produción, a partir da máxima de que “o diñeiro da parte máis pobre da
poboación é tres veces máis eficaz en impulsar o crecemento económico que o diñeiro
dos ricos”, as persoas con ingresos pequenos “gastan o seu diñeiro rapidamente e
os ricos atesouran”.
É certo; os pobres precisan gastar o
que gañan rapidamente porque con eses ingresos, só chegan a cubrir as súas necesidades
vitais, mentres que os ricos esas necesidades xa as teñen cubertas sen
problema, e os seus gastos son fundamentalmente suntuarios.
A sobreproducción non vén porque
haxa compradores ou non, senón non habería nunca crise: nunca tantos
compradores de vivendas houbo nos anos previos ao estalido dunha crise que viña
incubándose anos antes, coa caída da taxa de ganancia desde os anos 80. A crise
produciuse, non porque houbese saturación de mercadorías (afetou a case todos
os sectores), senón porque os capitalistas nun momento dado constataron que os
investimentos de capital que facían non eran devoltas coa rendibilidade que
delas esperaban (taxa de ganancia).
O valor das mercadorías, froito das
invencións e o aumento da produtividade, baixaba; e isto, tarde ou cedo
maniféstase nas contabilidades das empresas e bancos, que non lles cadran as
contas entre o que invisten e o que reciben. Ao final, o capitalista decide
deixar de investir, e desviar o seu capital cara á especulación, o aforro ou a compra
de ouro.
Por moito que millóns de seres
humanos reciban agora unha RBI, e póñanse a comprar como tolos, non resolverían
o problema do valor das mercadorías; ao revés, agudizaríano, pois obrigarían
aos capitalistas a baixar os prezos para competir, arruinando a moitos. O único que
se lograría a curto prazo, é un novo ciclo de produción sen
control, posto que máis capitalistas entrarían na competencia, e ao final
volverían os problemas.
A vía neoreformista que ofrecen os
defensores do RBI, non é“semente de subversión” como prometen, senón que se mantén
dentro das estreitas marxes dun sistema cada vez máis en crise, que aperta as
clavijas como ninguén; a súa aceptación pola clase obreira significaría que
esta fixera como Sancho Panza, a cambio do bálsamo renunciaría á loita por “o goberno da
insua”.
A tarefa é xusto a contraria; na decadencia
absoluta do capitalismo, cando todas as medidas que adopta afunden máis á humanidade
na pobreza económica, social e moral, hai que pór sobre a mesa a única saída
posible, a transformación socialista da sociedade, a partir da expropiación dos
capitalistas. Esta é a única garantía dunha repartición
equitativa e xusto da riqueza xerada pola maioría traballadora, que non se
limite a “que os ricos paguen un pouco mais”.
En Galiza no mês de abril de 2017
No hay comentarios:
Publicar un comentario